Usigen ti Maysa a Pangulo ti Masakbayanna
MAAY-AYAT ken mararaem unay idi ti pangulo iti Makinlaud nga Africa kas agturay iti purokna. Iti maika-78 a panagkasangayna, nagtitipon dagiti gagayyem, pamilia, ken dadduma pay a maseknan unay kenkuana tapno kablaawanda. Iti maysa a bitla, pinili ti pangulo ti maysa a karkarna a topiko maipaay iti kasta nga okasion. Dinakamatna dagiti kapanunotanna maipapan iti biag kalpasan ti ipapatay.
Kinunana a kalpasan [ti panagbiag iti] daytoy a lubong “adda maysa a baro a lubong nga awanan panangallilaw, apal ken kinaagum.” Inladawanna dayta kas maysa a lubong a “naabbungotan iti misterio,” a pagtataengan laeng dagiti nalinteg, a mabalin a makiuman iti Dios.
Gagangayen dagiti kasta a pammati kadagiti tattao iti intero nga Africa. Sigun iti nagkauna a relihion ti Africa, ti ipapatay ket saan nga isut’ pagpatinggaan ti biag no di ket maysa laeng a panagbalbaliw, panagdaliasat nga agturong iti biag idiay lubong dagiti espiritu. Iti ipapatay, naikuna a bumallasiw ti maysa a tao manipud iti lubong a makita nga agturong iti di makita. Kas maysa nga espiritu, sumrek itan ti indibidual iti pagarian a pagnanaedan dagiti inapona.
Patien dagiti adu iti Makinlaud nga Africa a dagiti inapo, wenno espiritu nga inapo, ipatalgedda ti pagimbagan dagiti pamiliada ditoy daga. Kuna ti libro a West African Traditional Religion: “Awan ti nainget a panaglalasin ti bileg kadagiti kameng ti komunidad nga adda pay laeng ditoy daga, ken dagidiay adda iti sabali a lubong. Idi addada ditoy daga, [dagiti inapo] ket panglakayenda idi kadagiti pamiliada. Ita ta saantayon a makita ida, kaskasdi a papanglakayenda pay laeng iti lubong dagiti espiritu. Saan nga agsarday ti pannakaseknanda iti sapasap a pagimbagan dagiti pamiliada.”
Gapuna, namnamaen ti nataenganen a pangulo a nadakamat iti pangrugian ti pannakitipon kadagiti inapona ken makipagtrabaho kadakuada iti lubong dagiti espiritu. Kinunana: “Napigsat’ pammatik iti biag kalpasan ti ipapatay ken ti posibilidad ti panagtultuloyko nga agserbi—uray kalpasan ti ipapatay.”
Nupay kasta, gapu iti simmaganad a kinuna ti pangulo, kinuna ti pagiwarnak a Sunday Times nga isut’ “kasla saan unay a kumbinsido” maipapan iti biag kalpasan ti ipapatay. Imbagana iti nagtataripnong a bunggoy a nangngegna ti maipapan iti maysa a libro a nangilawlawag iti biag kalpasan ti ipapatay. Lima a tawen a binirbirok ti pangulo ti libro. Magagaran unay a mangbasa iti dayta ta intukonna ti katupag nga agarup $1,500 (E.U.) iti asinoman a makayeg kenkuana iti maysa a kopia.
Naliklikan koma ti pangulo ti narigat a panagbirok babaen ti panangsukimatna iti maysa a libro a saan a narigat a biroken. Daytoy ket maysa a libro a nalaka a magun-odan a saan a pinataud ti tao no di ket ti Namarsua kadagiti amin a tattao. (1 Tesalonica 2:13) Dayta a libro isu ti Biblia. Aniat’ kunaenna maipapan iti biag kalpasan ti ipapatay?