Ti ‘Spineless Yucca’—Naisalsalumina ti Kinamannakibagayna a Mula
BABAEN TI KORESPONSAL TI AGRIINGKAYO! IDIAY COSTA RICA
MULA nga agas, maaramid a sabon, naimas, ken nasustansia a taraon. Daytoy a naidaddaduma a mula ket addaan iti amin kadagitoy a deskripsion ken ad-adu pay! Am-ammo a naimbag dagiti taga Sentral America ngem saan a kas spineless yucca. No usarem dayta a termino idiay Sentral America, kaaduan a tattao ti mabalin a sumungbat a sidadayaw ken pumerrengda iti mangim-imtuod a pamay-an. Nupay kasta, dagus nga umisemda no dakamatem ti itabo, izote, wenno daguillo, kas nagan ti mula a kadawyan nga ammo dagiti taga Costa Rica, Guatemala, Honduras, ken Nicaragua. Maramanan dagiti taga Costa Rica ken dadduma a taga Sentral America dagiti sabongna iti nadumaduma a putahe.
Miembro ti Mabigbigbig a Pamilia
Iti kasla ginnuyodan, ti spineless yucca ti klinasipikar dagiti mangad-adal iti kita dagiti mula ken animal kas miembro ti pamilia Liliaceae ket itay nabiit pay kas miembro ti pamilia Agavaceae. Ti naud-udi a kategoria dagiti nakersang a mula buklen ti agarup 550 a kita manipud iti klase ti Liliales (lirio). Inawagan dagiti botaniko ti sientipiko a naganna kas Yucca elephantipes.
Adda mapattapatta nga 40 a kita ti klase ti Yucca, nga iti kaaduan a paset ket mabalin a masarakan idiay Amianan nga America, Mexico, ken Sentral ken Abagatan nga America. Dagiti agdindinamag a kabagian iramanna ti nagdakkelan a Joshua tree (Yucca brevifolia) ken ti babbabassit nga Spanish bayonet (Yucca aloifolia). Talaga a dakkel a pamilia!
Ania ti sumagmamano a pakabigbigan daytoy adut’ pakausaranna a mula? Saan nga elegante ngem naisalsalumina ti itsurana, ti nasikkil, paarintiddog a bulbulongna dumanon agingga iti 1 a metro manipud iti puon. Ti dakkel, natangken a puon, agraman ti napnuan ammurat a pakabuklanna ken ti dumapo-kayumanggi a kolorna, kaslattay kamauna ti elepante—isu a ti nasientipikuan a naganna ket elephantipes.
No damo a makita, ti spineless yucca, tangay dumanon iti kangato a 15 agingga iti 25 a pie, ket nalaka a mapagkamalian kas kayo. No kalgaw idiay Costa Rica, nangnangruna no bulan ti Pebrero ken Marso, ginasut a sukog ti kampana, krema-marfil ti kolorda a sabsabong ti mangkorona iti itabo a mula. Tangay mailaklakoda iti tiendaan ken iti bangketa, kaslattay addada iti amin a lugar iti isu met la a tiempo! Iti dakkel a nakaigiddiatanda iti nasikkil, kasla bayoneta a bulbulong ti mula, dagitoy a nalukneng ken nalami a sabsabong agbukarda a sangarekrek, a sipapatak nga agtuboda iti mismo a tengnga ti mula a sitatangar.
Ti itabo ket maysa a kita ti yucca a paborito dagiti man hardinero ken manangpapintas iti aglawlaw, tangay nalaka a makibagay iti nadumaduma a klima ken kasasaad ti daga ken mangipaay iti naisalsalumina, tropikal a buya. Tangay nausar idi kas natural nga alad para iti ketegan idiay Costa Rica, isu met la gayam a naruay ti nabunga a mula nga itabo iti gistay tunggal rehion ti pagilian.
Dagiti lokal nga umili sigurado a ginundawayanda ti adu a pakausaran daytoy a mula. Kas pagarigan, dagiti ammurat a maala kadagiti bulong ket mausar a pagaramid iti ikamen, barikes, ken bag a mayabaday. Kasta met, no iladam dagiti bulongna tapno lumap-it, mausar ida dagiti hardinero kas paggalut iti apitenda. Kaslattay awan patingga ti pakausaran daytoy a mula!
Nagimas a Kanen!
Kuna ti autor ti Flowers of the World a ni Frances Perry: “Dagiti busel ti kita dagiti Yucca ket kankanen dagiti Indian, ket dagiti prutas ken dagiti ramut nagalis [a kas iti sabon] isu a mabalin a paglaba iti kawes.” Ginundawayan a naimbag dagiti taga Sentral America ti usar ti yucca iti panagluto ken panagdalus. Magustuanda ti medio naalsem ngem nananam a ramanna. Dagiti sabong ket mailaok iti nalamiis nga ensalada wenno mailuto iti itlog ken patatas, a paborito dagiti taga Costa Rica ken dadduma a taga Sentral America. Nasustansia dagiti yucca agsipud ta nabaknangda iti bitamina ken mineral, kas iti calcium, iron, thiamine, phosphorus, ken riboflavin.
Nakadkadlaw met ti pannakausar ti yucca kas agas; maaramid a pampaganaygay babaen ti panangilambong ken ti nakayuperan dagiti sabong ket mausar a pangpakalma iti tian. Mausar dagiti bulong a pangagas iti albuminuria ken colitis ken mausar met kas agas ti sarsaripiten. Ket daytoy a mula nga agas, a maaramid a sabon, naimas, ken nasustansia a taraon, ket maysa laeng kadagiti parsua ditoy daga a magustuan ti panagramantayo!
[Ladawan iti panid 26]
Dagiti sabong ti yucca a mailuto iti itlog ken patatas, maysa a paborito a putahe idiay Sentral America
[Ladawan iti panid 27]
Dagiti yucca ket kaslattay kaykayo nga agtubtubo iti away