Istrok!

TI KANGRUNAAN a pakaigapuan ti ipapatay ken nakaro a kinabaldado idiay Makinlaud nga industrialisado a lubong ket istrok. Ti mismo a sao nga “istrok” ipasimudaagna ti kellaat a pannakapasamak ti “pannakaatake ti utek.” Iti maysa a kanito, nalabit nasayaat ti riknam, ket iti sumaganad a kanito, mariknam a kasla nakimatka​—ti nakaro nga istrok giddato ken mamimpinsan a balbaliwanna ti panagbiagmo. Sidadangkok a ranggasan ken baldaduennaka, nalabit pagumelennaka, dadaelenna ti riknam, balbaliwanna ti personalidad ken panangbigbigmo, ken mapilitka a mangikagumaan iti kasla awan inggana a panangpasubli iti panagbiag a nakairuamam ken ti pamiliam.

Usigem ni Ellen Morgan.a Idi Mierkoles, nasalun-at, aktibo ti 64-anyos a ni Ellen. Idi Huebes, idi gumatgatang a kadua ni lakayna, kellaat a saanen a makasao ni Ellen, ket nagpiwisen ti rupana. Kimmapuy ti bagina, ken agibar-ibar a kasla nabartek. Nakaro ti pannakaistrok ni Ellen!

Kalpasan la unay ti istrok, nakaro ti pannakabaldado ni Ellen ta dina payen maaramid dagiti simple a banag, kas iti panagdigus wenno panagpelles. Gapu ta di makasurat, maka-knitting, wenno makadait, nariribukan kadagiti di magawidan a panagsangsangit ken manglapunos a pannakabannog. Iti unos daytoy a tiempo, saan a nadadael ti panunot ni Ellen; nupay kasta, mabain no mariknana a nalabit a dadduma ti mangmatmat kenkuana a kas nengneng. Idi agangay, inlawlawag ni Ellen: “Manmano ti makabigbig no kasano a ti pannakakigtot iti kastoy a kellaat a panagbalbaliw apektaranna ti maysa iti emosional ken sikolohikal. Nariknak a kasla daydin ti panungpalan ti panagbiagko.”

Ania ti pakaigapuan ti istrok? Agpapada kadi ti rikna ti tunggal maysa a naistrok? Kasano a dagiti nakalasat nadaeranda daytoy a sakit? Kasano a makadaer ti pamilia dagiti nakalasat iti istrok? Ania ti maaramidantay amin a mangsaranay? Amirisen ti Agriingkayo! dagita a saludsod ket mangipaay iti pannakaawat iti panagbiag dagiti nakalasat iti istrok ken dagiti pamiliada a nairaman iti pannakidangadangda.

[Footnote]