Manipud Kadagiti Agbasbasa

Istrok Dagiti serye ti “Panangdaer iti Istrok” (Pebrero 8, 1998) ti sungbat iti kararagko. Naistrok ni lakayko idi tinabunuanmi ti maysa a Nakristianuan a kombension sumagmamano a tawenen ti napalabas. Bayat nga inkagumaannak a suratan, nailigsay ti imana iti papel; naapektaran ti intero a kannawan a paset ti bagina. Ad-adu ngem iti kabaelak nga iyebkas ti naipaay ti artikulo kaniak. Nagsayaat a maammuan a saannakami a binaybay-an ni Jehova.

F. S. H., Estados Unidos

Sumagmamano la nga oras sakbay a naawatko daytoy a magasin, ikagkagumaak idi nga ilawlawag koma ken baketko no kasano ti panagriknak, ngem diak nakapagsao a kas iti dati gapu iti pannakaistrokko. Namitlon a nabasak daytoy a magasin. Nabasa metten ni baketko.

R. Z., Italia

Itay napan a tawen, ni tatangko a matalek nga adipen ni Jehova iti adun a tawen, ket natay gapu iti istrok. Ti artikulo ti timmulong kaniak a mangtarus iti kababalin nga impakitana sakbay a natay. Dagiti nailawlawag maipapan kadagiti panagbalbaliw ti rikriknana, agraman ti gapu a mabalin a marigatan ti naistrok nga agsao, ti nakatulong kaniak a nangtarus a nasaysayaat iti sinagaba ni tatangko.

V. C., Estados Unidos

Naistrokak makatawenen ti napalabas ket an-anusak pay laeng ti kinakapuy ti makinkannigid a paset ti bagik. Dagitoy nga artikulo ti mangpasardeng iti sumagmamano a misterio ken danag a mainaig ti istrok. Sarsarita ti ibagbagada a dagiti laeng lallakay ken babbaket ti maistrok. Ag-47 laeng ti tawenko idi naistrokak.

A. A., Inglatera

Nagdakkel ti naitulong kaniak ti artikulo tapno maawatak ni Lucia a balasangko, a nagsagaba iti nakaro a pannakadangran ti ulo idi naaksidente iti kotse idi dua pay laeng a bulanna. Dina mayebkas ti rikriknana. Nupay kasta, ti artikulo ti timmulong kaniak a mangtarus iti makagapu.

N. K., Slovakia

Rehistradoak a nars a lisensiado iti rehabilitasion ken adun ti kapadasak a mangasikaso kadagiti naistrok. Ti apresiarek unay maipapan iti artikulo ket ti napasnek ken mannakipagrikna a wagas ti panangdeskribirna iti sagsagabaen ti adu a pamilia dagiti biktima ti istrok.

L. C., Estados Unidos

Napasaran ni nanangko ti transient ischemic attack. No bagi ti pagsasaritaan, kasla naan-anay a naimbaganen. Ngem nakaro ti pannakaapektar ti kababalinna. Dati a natured ken agtalek iti bagina, ngem ita, nagbalinen a nakasensensitibo. Pagyamanan iti panangyunay-unayyo iti epekto daytoy a sakit iti kababalin.

R. C., Italia

Dua a tawenen ti napalabas, namindua a naistrok ni nanangko. Ti immuna ti makagapu a nagbalin a mananglilipat, ket ti maikadua ti nangparalisado iti makinkannawan a paset ti bagina. No dadduma, diak makaan-anus kenkuana ken makapagsaoak iti pakasairanna. Ti artikuloyo ti nangparegta kaniak nga agbalin nga ad-adda a mannakaawat.

R. T. S., Brazil

Nakristianuan a Panagduduma Agyamanak unay iti artikulo a “Ti Panangmatmat ti Biblia: Ti Nakristianuan a Panagkaykaysa Ipalubosna Kadi ti Panagduduma?” (Pebrero 8, 1998) Bayat nga umad-adu ti pannakaammok ken Jehova, ad-adda met a naragragsakak ta pasetak ti organisasionna, nga iti dayta matagtagiragsakmi ti kinanadumaduma dagiti personalidad.

I. P., Slovenia

Agtawenak iti 15 ken regular nga agbasbasaak iti Agriingkayo! Nangnangruna nga apresiarek daytoy nga artikulo. Ti maysa a benneg sinagudayna ti Paraiso ken ti kasasaadto sadiay. Pampanunotek idi no anianto ti kasasaad dagiti perpekto a tattao ken no agpapadanto ngata ti langa ken kapanunotantayo. Maawatakon nga agpadpada nga adunto ti pagdudumaan dagiti tattao ken animal.

J. C., Estados Unidos