Manipud Kadagiti Agbasbasa

Kosmiko a Didigra? Sangapulo ti tawenko, ket nagustuak ti artikulo a “Ti Panangmatmat ti Biblia: Dadaelento Aya ti Kosmiko a Didigra ti Lubongtayo?” (Disiembre 8, 1998) Tinulongannak a makaawat nga awan gayam ti kosmiko a didigra a mangdadael iti planetatayo agsipud ta kayat ni Jehova nga agbiagtayo iti paraiso a daga.

J. P., Estados Unidos

Panagopera a Di Mausar ti Dara Kayatko ti agyaman iti artikuloyo nga “Amirisen Manen Dagiti Doktor ti Panagopera a Di Agusar iti Dara.” (Disiembre 8, 1998) Talaga a nagagaranak a nangbasa iti dayta, tangay naballigi ti pannakaoperak iti kasta a wagas idi naan-anay a nasukatan ti padingpadingko. Adda idi kakuartok idiay ospital a naoperaan met iti kasta a wagas ngem nayalisonan iti dara. Awan pay makalawas, nakaawidakon. Ngem nabati pay laeng daydi a kakuartok tangay naaddaan iti komplikasion gapu iti virus.

N. H., Estados Unidos

Isardengmo ti Agsigarilio! Espesial kaniak ti artikulo a “Maisardengmo​—Naisardengmi!” (Disiembre 8, 1998) Kalkalpasko nga inyadalan iti Biblia ti maysa a mannigarilio. Tabtabunuannan ti amin a gimongmi, ngem adda lapped iti espiritualidadna gapu iti bisiona. Inikkakon kadagiti dadduma nga artikulo maipapan iti panagsardeng nga agsigarilio, ket ikarkararagko a sapay koma ta daytoy nga artikulo ti makatulongto met laengen kenkuana a mangparmek iti bisiona.

E. C., Estados Unidos

Dagiti Kemikal ken ti Salun-at Nabiit pay a rinugiak ti kurso iti chemistry, ket idi nakitak ti Disiembre 22, 1998 a ruar, dagus a naallukoyna ti atensionko. Kanayon nga ammoyo no kasano nga ilawlawag ti maysa a komplikado a tema iti wagas a maawatan dagiti amin a tattao. Tangay awan ti lislisian dagiti mangmulit ken kemikal a produkto, masapul nga adda koma dagiti internasional a tulagan tapno mamimpinsan a marisuten ti parikut maipapan iti polusion. Ngem malaplapdan daytoy gapu iti kinaamen ken ti kinaagum ti tao. Yaman pay ta ammo ni Jehova ti manayon a pannakarisut daytoy a parikut.

C. V., Canada

Ipapatay ti Nagannak Pagyamanan iti panagsuratyo iti nagpintas nga artikulo nga “Agimtuod Dagiti Agtutubo . . . Kasanoakon no Awan Dagiti Nagannak Kaniak?” (Disiembre 22, 1998) Nakatulong a nangipanamnama kaniak iti abilidad ni Jehova a mangsalaknib kadakami nga agtutubo no matay dagiti nagannak kadakami. Sibibiag pay laeng dagiti nagannak kaniak, ngem sangkapanunotko idi no ania ti pagbanagak no matayda. Naparegtaak unay iti nagsayaat nga ulidan ni Horacio.

M. J., Trinidad

Repetitive Strain Nagrigat nga iyebkas ti riknam no makasarakka iti artikulo a mangisalaysay iti parikutmo. Kasta ti nariknak iti artikulo a “Repetitive Strain Injuries​—Ti Rumbeng a Maammuam.” (Disiembre 22, 1998) Kastoy ti napasamak iti pungupunguak, ket ita laeng a naamirisko ti makagapu. Dakkel ti naitulong ti balakad no kasano a tamingek daytoy a parikut.

S. T., Yugoslavia

Agtartrabahoak iti maysa a kompania a mangar-aramid iti alikamen a mangsalaknib kadagiti trabahador iti repetitive strain injury (RSI). Nangpataud ti RSI iti panagusioso ken kontrobersia, ngem nagsayaat ti pannakaisurat ti artikuloyo. Awan dasdasigan ken panangidumduma ti panangilawlawagna iti tema. Nagustuan unay ti board of directors-mi ta uray la a nagpedidoda kadagiti kopia a maipatulod kadagiti pannakabagimi iti intero a Brazil.

J. P. M., Brazil

Maysaak nga agtagtagibalay nga addaan iti trabaho a mangikalikagum nga agbagkatak kadagiti nadagsen a kahon a naaramid iti kayo. Nanipud pay idi damo, nadangrankon ti bukotko, dagiti takkiagko, ken pungupunguak. Agarup dua a tawenen ti napalabas idi rinugiak ti sangapulo a minuto a pananginatko kadagiti maselko sakbay a bumangonak. Impagarupko no makatulong dagidiay a panagehersisio, ngem ad-adu nga amang dagiti makatulong a pamay-an ti panangdaer nga imbinsabinsa kaniak daytoy nga artikulo. Ikkakto dagiti katrabahuak iti bukodda a kopia daytoy a magasin.

K. Y., Japan