Panangibtur iti Cystic Fibrosis
KAS INSALAYSAY NI JIMMY GARATZIOTIS
Idi Hulio 25, 1998, naitarayak idiay ospital a napalalo ti panagut-ot ti barukongko. Nasalun-at ti pusok, ngem nakaro ti impeksion ti barak ta marigatanak unay nga aganges. Agtawenak la idi iti 25, ngem agngangabiten ti biagko.
DUA nga aldaw kalpasan a naipasngayak, imbaga dagiti doktor kadagiti nagannak kaniak nga addaanak iti grabe a jaundice. Imbagada a no saanak a mayalisonan iti dara, mabalin a matayak wenno madadael ti utekko. Nakalasatak a saan a nayalisonan iti dara—ken saan a nadadael ti utekko.
Sinagabak ti adu a narikut nga an-annayen ken masansan a panagkidar ti pulmonia iti umuna a dua a tawen ti panagbiagko. Kamaudiananna, nailasin ti maysa a doktor a cystic fibrosis (CF) ti sakitko. Idi, dagiti tattao nga agsakit iti kastoy agbiagda iti promedio a pito a tawen. Ngem gapu ta immadelantado ti medisina, umad-adun ti ubbing nga addaan iti CF a makagteng iti kinaadulto.
Ania ti CF?
Ti CF ket maysa a di maagasan a natawid a sakit. Dayta ti pakaigapuan dagiti dumegdegdeg nga an-annayen iti pagangsan, ket masansan a dagiti agsakit iti CF marigatanda unay a mangtunaw iti taraonda.
Dandani 1 iti 25 a tattao ti addaan depekto a gene ti CF. Iti kaaduan a kaso dagiti addaan iti kasta a gene dida pay ketdi ammo nga addaanda, tangay awan ti aniaman a makita a sintoma ti sakit. No addaan ti ama ken ina, mabalin a 1 kadagiti 4 ti tsansa a maaddaanda iti anak nga addaan iti CF.
Ti kasok ket maysa kadagiti manmano a kaso a nailasin nga addaanak iti CF gapu iti kaadda dagiti polyp iti agongko. Gapu kadagitoy, dagus a sinukimat dagiti doktor ti kaadu ti asin iti ling-etko, nga isu ti kadawyan a pangsukimat iti CF. Masansan a dagiti nagannak ken apong ti damo a makadlaw ti asin iti kudil no naapgad ti maramanan ti bibigda kalpasan nga inagekda ti ubing.
Marigatanak nga umanges gapu iti panagtubo dagiti polyp iti agongko, isu a dandani tinawen a maoperaak iti sinus tapno maikkat dagiti polyp. Marigatanak kadagita nga operasion, ken narigat ti agpaimbag. Napeggadda met gapu ta nadara. Ngem namin-adu a naoperaak, ket naaramid amin dagitoy nga awan ti nausar a dara. Anian a yamanko ta saanak nga agdanag kadagiti komplikasion a mabalin a rumsua gapu iti panangyalison iti dara!
Panangibtur iti Sakit
Nupay kedngan ti panagsakitko dagiti maaramidak, no mabalin ikagumaak ti agbalin nga aktibo. Ti naisangsangayan nga aldaw iti biagko isu idi Agosto 1, 1987, idi nagpabautisarak a nangisimbolo iti dedikasionko ken Jehova a Dios.
No bumangonak iti agsapa, mangsay-upak iti ventolin solution a mapasarunuan iti saline solution. Daytoy ti tumulong a mangpalukay kadagiti agruar iti barak ken lukatanna ti pagangsak tapno nasaysayaat ti panagangesko. Agarup 15 a minuto ti panagagasko. Kalpasanna aramidek ti 40 a minuto agingga iti maysa nga oras a physiotherapy tapno lumukay ken maikkat dagiti agruar iti barak. Kalpasanna, mangsay-upak manen ti sabali nga agas, a maysa nga antibiotiko tapno malabanak ti impeksion. Maulit ti intero a proseso iti malem ken iti rabii.
Agarup uppat nga oras iti inaldaw ti tallo a sesion ti panagagas. Gagangay a manganak kalpasanna, tangay nasaysayaat ti panagagasko no awan ti karga ti tianko. Nupay adu a tiempo ti busbosen ti inaldaw a panagagasko, inyugalik ti tumabuno kadagiti gimong iti kongregasion dagiti Saksi ni Jehova a Griego ti maus-usar a pagsasao iti London, Ontario, Canada. Kadagiti rabii ti gimong itantanko ti panagagasko agingga iti alas 10:00 t.r. Para kaniak, napatpateg dagiti bendision a magun-odak kadagiti gimong ngem dagiti panagsakripisiok. Napateg met kaniak ti regular a pannakiramanko iti ministerio.
Panangiranud iti Pammatik
Ti pannakayospital inikkannak kadagiti naisangsangayan a gundaway a mangiranud iti Nakristianuan a pammatik. Naminsan, naaddaanak iti gundaway a makisarita iti padi a Greek Orthodox, a maysa idi a pasiente iti sabali a kuarto. Imbagana a maysaak a mapagraraeman nga agtutubo ket kinunana a pampanunotenna a maysaak a nasayaat a pagwadan kadagiti agtutubo iti komunidad dagiti Griego. Ngem dina ammo idi a pagaammok nga idadauluanna ti panangbusor iti ministerio dagiti Saksi ni Jehova kadagiti tattao a Griego ti pagsasaoda.
No adda bumisita iti padi, ibaonna met ida a bumisita kaniak. Nabigbig dagiti bisitana dagiti miembro ti pamilia ken gagayyem a bumisbisita kaniak a dagitoy ti simmarungkar kadakuada iti ministerio. Nagtalinaed ti dadduma a bisita ti padi, ngem masmasdaaw a nagsubli ti dadduma iti padi tapno saludsodenda no apay nga imbaonna ida a bumisita kadagiti Saksi ni Jehova. Uray idi naammuannan a maysaak a Saksi, nagtultuloy latta ti panagsaritami maipapan iti Biblia. Nagsaritaanmi dagiti topiko a kas iti nagan a Jehova, ti Trinidad, ken ti kinaneutral iti politika dagiti Saksi ni Jehova idiay Grecia. Bayat ti panagsaritami, nadlawko a saanen a nakaro ti panangbusorna.
Inamin ti padi nga ammona ti kinapudno maipapan iti sumagmamano a topiko ti Biblia a nagsaritaanmi ngem impudnona a dina isursuro ti kinapudno maipapan kadagitoy a bambanag ta maamak a mapukawna ti trabahona. Kalpasanna, bimmisitakami ken adingko nga Esther iti pagtaenganna, ket inawatna ti literatura ti Biblia. Saan unayen a mabusbusor ti panangasabami iti teritoriami. Kinapudnona, dimngegen ti adu a nakadamag maipapan iti iyiimdeng ti padi. Ngem, di nagbayag, naidestino ti padi iti sabali a lugar.
Adda manen nasayaat a napasamak kas resulta ti panangiranudko iti pammatik bayat ti maysa a pannakayospitalko. Nakasaritak iti maysa nga agtutubo nga agnagan Jeff, nga immay bimmisita ken lolona. Ti ad-adu pay a pannakisarita nagbanag iti panangyadal iti Biblia kenkuana. Idi agangay, kayat ni Jeff ti tumabunon kadagiti gimong iti kongregasion. Nupay kadawyan a tumabtabunoak iti kongregasion idiay London, iti sumagmamano a tiempo nagbiaheak a mapan iti asideg laeng nga Stratford tapno mapankami makigimong sadiay. Ti panggep ket tapno adda tumulong kenkuana nga agin-indeg iti asideg ti pagtaenganna.
Nakalkaldaang ta pinanuynoyan ni Jeff ti pananglapped ti pamiliana ket saan a rimmang-ay iti naespirituan. Nupay kasta, bayat ti itatabunok kadagiti gimong idiay Stratford, naam-ammok ni Deanne Stewart. Nagam-ammokamin idi nakiramankami iti pannakaibangon ti maysa a Kingdom Hall. Naaddaankami iti relasion, ket nagkasarkami idi Hunio 1, 1996.
Nagbalbaliw ti Kasasaadko
Nakalkaldaang ta tallo nga aldaw kalpasan ti panagkasarmi, nagsakitak iti grabe. Daytoy ti nangrugian ti agsasaganad a pannakayospital a nagtungpal iti emerhensia a nadeskribir itay. Nanipud idin inaldawak a naka-oxygen iti 24-oras. Dinaerak dagiti gurigor, panagling-et iti rabii, pleurisy, di pannakaturog gapu iti panaguyek iti rabii, ken panagut-ot ti susuop, saka, ken barukongko. No dadduma agsaruaak pay iti dara no aguyekak, a makapaamak gapu ta no di agsardeng, mabalin a kellaat a pakatayan.
Itan ta adda iti sibayko ti ingungotek nga asawa kas kadua ken katakunaynay, makiramramanak iti panangasaba kadagiti doktor, physiotherapist, pasiente, ken dadduma pay a mangay-aywan iti salun-at nga agtartrabaho idiay ospital agraman idiay pagtaengan no bumisitada. Nupay narikut dagiti an-annayek, matmatanmi amin dagitoy kas gundaway a mangidayaw iti nagan ni Jehova.
Ti Mangsustener Itan Kaniak
Gapu iti nabalbaliwan a kasasaadko, addaankami ken ni Deanne iti naisangsangayan a pannakaikonektar iti telepono isu a mabalinmi ti agimdeng ken makipaset kadagiti gimong iti kongregasion. Daytoy a naayat a probision makaipaay iti adu a pammaregta ken ipariknana kadakami nga aktibokami pay laeng a paset ti kongregasion, nupay kaaduanna saankami a makatabuno.
Maysa pay, karaman iti ministeriomi itan ti pannakisarita kadagiti tattao babaen ti telepono ken panangiranud iti naibatay-Biblia a namnamami. Nakairugikami kadagiti panangyadal iti Biblia, nga iyadalanmi babaen ti telepono. Makaparagsak unay kadakami ti pannakisarita kadagiti estranghero maipapan ken ni Jehova ken dagiti nakaskasdaaw a probisionna para iti matalek a sangatauan iti baro a lubong ti kinalinteg.
Makapabileg a pammaregta ken pakaliwliwaak ti panangandingay da tatang ken nanangko. Agyamanak a nangnangruna ken Jehova iti panangiparaburna kaniak ken ni Deanne, a nangaklon kaniak agraman dagiti an-annayek ket itan dakkel ti pasetna a tumultulong kaniak nga agibtur.
Bayat a dumegdegdeg ti an-annayek, tultulongannak ti panagmennamenna nga agtultuloy iti namnamak iti masanguanan. Makaliwliwa kadakami a dua ken Deanne ti inaldaw a panagbasami iti Biblia. Ammok nga iti asidegen a masanguanan, nasalun-atakton, ket saanen a masapul ti inaldaw a therapy tapno makaangesak. Iti naikari a Paraiso, inton nasalun-atton dagiti barak, makitkitak ti bagik nga agtartaray iti nawayang a tay-ak. Dayta laeng ti kayatko—ti agtaray iti nawayang a tay-ak iti sumagmamano a tiempo tapno masubokko dagiti barak.
Ti panangsirmatak kadagiti bendision nga inkari ti Dios a baro a lubong ti tumultulong kaniak a mangdaer iti tunggal aldaw. Kastoy ti kuna ti Proverbio 24:10: “No kumapsutka iti aldaw ti pagpaglan, ti pigsam bassit.” Imbes a mariknak a bassit ti pigsak, mariknak nga ik-ikkannak ni Jehova iti pannakabalin a nalablabes ngem ti gagangay. (2 Corinto 4:7) Daytoy ti tumulong kaniak a mangipaay iti panangsaksi iti naganna ken pangpanggepna agraman ti panangsaranget iti aniaman nga ipalubosna—dayta man ket ti pannakalasat iti panungpalan daytoy a sistema dagiti bambanag inton Armagedon wenno ipapatay itan ken ti panagungar kalpasanna iti baro a lubongna.—1 Juan 2:17; Apocalipsis 16:14-16; 21:3, 4.
[Dagiti ladawan iti panid 13]
Kaduak ti asawak a ni Deanne, a dakkel a mangan-andingay kaniak