Tulong a Mangruk-at iti Kinadelingkuente
BABAEN TI KORESPONSAL TI AGRIINGKAYO! IDIAY FRANCIA
DAGITI nabiit pay a pasamak ti nangilatak iti makapadanag a panaglabsing iti linteg ken urnos iti adu a lugar dagiti napanglaw kadagiti siudad idiay Francia. Sigun iti Pranses a magasin nga L’Express, “iti innem a tawen, dandani naminlima ti immaduan ti kinaranggas kadagiti siudad.” Sa kellaat nga immadu dagiti menor de edad a naikalam-it kadagiti naranggas a krimen.
Malaksid iti pannakiramanda iti bandalismo, panaglako iti droga, panagkikil, arson, ken panagtakaw, direkta pay a pumpuntiriaen dagitoy a delingkuente dagiti pannakabagi ti Estado. Dagiti polis, bombero, ken agtartrabaho iti pangpubliko a transportasion, ti karaman kadagiti kanayon a makursunadaan a maranggasan.
Apay a nakaad-adu ti kinaranggas? Ilawlawag ti dua a mangad-adal iti kasasaad ti kagimongan a “gapu iti pannakadadael ti pamilia, dayta ket iyaalsa maibusor iti amin nga autoridad.” Dakamatenda pay “a marikna [dagiti agtutubo] a binaybay-an ida dagiti autoridad” ken awan “ti manamnamada a makapnek a masakbayan.”
Regular nga isursuro dagiti Saksi ni Jehova ti mensahe ti namnama a nailanad iti Biblia kadagiti lugar a nasaknap ti kinadelingkuente. Iti nabiit pay a programa iti telebision idiay Francia, kinuna ti maysa a periodista: “Agkaraapan dagiti Saksi ni Jehova iti nadumaduma a lugar ken kadagiti napanglaw a sangakaarrubaan—dagiti lugar a no dadduma ket kas man la binaybay-anen dagiti serbisio a para iti kagimongan, polis, ken ti gobierno. Kadagitoy a pasdek ken lansangan, agsao ken dumngegda.” Nasayaat ti epekto ti trabahoda, kas sagudayen ti surat ti maysa nga agtutubo nga agbasbasa iti Agriingkayo!
“Kayatko nga iyebkas ti naimpusuan a panagyamanko kadagiti publikasionyo. Saandak laeng a tinulongan no di ket simmayaat uray ti relasionko kadagiti dadakkelko. Agtawenak laeng iti 16 ken nagtaud iti pamilia dagiti Muslim.
“Kayatko nga ipakaammo a nagballigikayo a nangruk-at kaniak iti kinadelingkuente. Nagbanaganna, ad-addan nga al-alagadek ti relihionko, ngem agbasbasaak met iti Biblia. Gapu kadakayo, intultuloykon ti panageskuelak. Kanayonanna, natulonganyo ti sumagmamano a tattao iti sangakaarrubaanmi a rimmuk-at iti kinadelingkuente babaen kadagiti magasinyo—nga ipabpabulodko kada bulan. Agyamanak unay ken mariknak a nakautangak kadakayo.”