Manipud Kadagiti Agbasbasa

Ti Daong ni Noe ken ti Arkitektura ti Barko (Enero 2007) Nabayagen nga ammok a naisangsangayan ti pannakaaramid ti daong, ngem diak idi a maawatan no kasano a naaramid dayta. Nalaka a maawatan ti panangilawlawag daytoy nga artikulo maipapan iti kaakaba, kalawa, ken kangato dayta a daong isu a nalagda nga aglayag. Napanunotko ti agaramid met iti modelo ti daong a kaduak dagiti agtutubo iti kongregasionmi ket inusarmi ti naipaay a diagrama. Nagaramidkami kadagiti origami (modelo a papel) nga animal sa inkabilmi dagita iti daong ken nagdrowingkami kadagiti ladawan ni Noe ken ti pamiliana. Gapu iti dayta nga artikulo, ad-adu ti naammuanmi maipapan iti pannakaaramid ti daong ni Noe. Pagyamanan unay.

T. A., Japan

Kaay-ayo ti innem ti tawenna nga anakko ti agaramid kadagiti modelo ti nadumaduma a banag. Kasta unay ti ragsakmi nga agama idi a nakitami iti ungto ti artikulo ti Agriingkayo! dagiti instruksion no kasano ti agaramid iti bassit a daong a kas iti daong ni Noe. Natagiragsakmi dayta a malem gapu iti nagsayaat nga artikuloyo! Nupay adu ti pakakumikoman ti lubong a pagnanaedantayo ken nagadu ti rigat a linawas a sarsarangten dagiti annaktayo idiay eskuelaan, talaga a maysa a bendision ti maaddaan iti katulongan a kas iti Agriingkayo! a mangbadang kadagiti nagannak iti panangpadakkelda kadagiti annakda iti dalan ni Jehova.

M. F., Estados Unidos

Agimtuod Dagiti Agtutubo . . . Kasano a Maparmekko Daytoy nga Aramid? (Nobiembre 2006) Natukayak idi nabasak ti artikulo ken naamirisko ti pannakaseknan ni Jehova kadatayo ken no kasano a tultulongannatayo a mangrisut kadagiti parikuttayo. Nupay masansan nga agkamalitayo, ni Jehova ket “sisasagana a mamakawan.” (Salmo 86:5) Dayta ti tumultulong kadakami nga agtutubo nga ‘umadayo kadagiti tarigagay a naikasigudan iti kinaagtutubo.’​—2 Timoteo 2:22.

V.F.F., Brazil

Agimtuod Dagiti Agtutubo . . . Apay a Nagadu ti Nasken nga Annurotek? (Disiembre 2006) Innem a tawenen nga agad-adalak iti Biblia. Nupay estrikto unay dagiti dadakkelmi, ammok a talaga a maseknanda kaniak. Idi nabasak daytoy nga artikulo, tinulongannak a mangtarus kadagiti pakaseknan dagiti nagannakko ken mangapresiar iti mismo a pannakaseknan ni Jehova kaniak.

K. T., Thailand

Maysaak Idi a Barayuboy nga Anak (Disiembre 2006) Am-ammokon ni Jehova sipud idi 1992. Ngem adda idi tiempo iti biagko a kayatko ti agbiag iti sabali a wagas. Kas ken Meros Sunday, namin-adu a napasarak dagiti tiempo ti kinaragsak ken kinaladingit iti pinilik nga estilo ti panagbiag isu a kalpasan ti tallo a tawen a saanko a panagserbi ken Jehova, rinugiak manen ti agpatulong kenkuana. Ita agserserbiak manen kenkuana. Pagyamanan iti ar-aramidenyo.

D. K., Ukraine

Agimtuod Dagiti Agtutubo . . . Kaano a Mabalin a Makiinnaremak? (Enero 2007) Agtawenak iti 15. Idi nagpasiarak kada ikit ken ulitegko, adda naam-ammok a barito a Saksi nga agtawen iti 17. Nangrugi ti komunikasionmi babaen iti Internet nupay saan a kanayon idi damo. Ngem idi agangay, inaldawen nga agsarsaritakami agingga a natnag ti riknami iti tunggal maysa. Di nagbayag, nabasak daytoy nga artikulo ken naamirisko nga aktual gayam nga agdedeytkamin! Babaen ti tulong dagiti dadakkelko ken ti artikulo ti Agriingkayo!, inaramidko ti kasayaatan a desision. Nakisinaak kenkuana. Kaskasdi nga aggayyemkami ngem ti ipangpangrunakon ket ti relasionko ken Jehova. Pagyamanan unay ta tinulongannak daytoy nga artikulo a mangamiris iti agpayso a kasasaadko.

D. D., Canada