“Kabbaro Dayta a Pamay-an!”

INUSAR ni Soo-jeong, a maysa a guidance counselor iti hayskul idiay South Korea, dagiti video iti website a jw.org iti klasena. Kinunana: “Nagmayat ti reaksion dagiti estudiante iti video nga Ania ti Pudno a Gayyem? Kalpasan a nabuyada ti video, imbagada: ‘Itak la a napanunot a kasta gayam ti pannakigayyem. Kabbaro dayta a pamay-an ti panangisuro!’ Adda dagiti nangibaga a bisitaenda daytoy a website no kasapulanda ti balakad.” Innayon ni Soo-jeong: “Inrekomendak daytoy a video iti adu a padak a mannursuro ket maragragsakanda a mangusar iti dayta a nagsayaat a katulongan iti klaseda.”

Ti sabali pay a video a nakita ti adu nga estudiante idiay South Korea a makatulong kadakuada ket ti whiteboard animation a Maabakmo ti Bully Uray Dika Lumaban. Maysa a mannursuro nga agtrabtrabaho iti The Foundation for Preventing Youth Violence ti nangipabuya iti dayta iti maysa a klase. “Maala ti video ti atension ti adu nga agtutubo gapu iti napintas nga artwork-na,” kinunana. “Maysa pay, makatulong ti video ta saanna laeng nga ipakita dagiti pamay-an a mangsango iti kinaranggas no di ket uray dagiti pamay-an no kasano a maliklikan dayta.” Dimmawat ti foundation iti pammalubos nga usarenda ti video kadagiti lecture nga aramidenda iti adu nga eskuelaan ti elementaria ken hayskul ket naaprobaran dayta. Uray dagiti polis ket agus-usar met kadagiti video iti jw.org.

No dimo pay napadasan a linuktan dayta a site, mabalinmo a bisitaen. Nalaka a masurotan, ken libre ti amin a mai-download—dagiti audio ken video, kasta met ti Biblia ken adu pay a publikasion.