Ti Panagdayaw ken Satanas iti Panawentayo
AWAN duadua a ni Satanas kayatna nga isut’ maidaydayaw. Idi sulsulisogenna ni Jesus, intukonna nga itden kenkuana ti dakkel a gunggona iti maysa laeng a kondision: “No agrukbabka nga agdayaw kaniak.” (Mateo 4:9) Siempre, nagkitakit ni Jesus, ngem saan a tunggal maysa ti simmurot iti ulidanna. Ti panagdayaw ken ni Satanas ti nakasaksaknap iti moderno a lubongtayo.
Kas pangarigan, idiay Canada nangipablaak ti The Calgary Herald ti maysa a serie dagiti artikulo iti sidong ti paulo a “Devil’s Disciples.” Ti pagiwarnak ti nangadaw ti report ti maysa nga imbestigador a polis, a kunkunana: “Babaen kadagiti interview naammuak a ti Satanismo ket saan a naipamaysa iti aniaman a partikular a grupo iti sosiedad. Ti intelihensia a naurnong ti Calgary Police Service ken ti Royal Canadian Mounted Police impalgakna nga idiay laeng Calgary adda maipatpato a 5,000 a managalagad a Satanista.”
Dadduma a report ti panagipablaak ipakitana a ti kulto ni Satanas, iti nagduduma a langana, ti tumtumpuarda iti kalawaan ti Estados Unidos ken Europa. Uray ti polisia ti mangipakpakita ti interes iti Satanismo. Apay? Agsipud ta kadagiti adu a kaso makasarsarakda kadagiti kawing iti maar-aramid a krimen ken kadagiti sataniko a kulto. Di pay nabayag, maysa a detektib a polis ti naadaw nga agkunkuna: “Ti pakilanglangenantayo ket maysa a relihion ken tattao a mamatpati iti dayta kas ti panamatpati dagiti dadduma iti Kinakristiano, Judaismo wenno Islam. Ti makitkitayo ket saan a krimen gapu laeng iti krimen, no di ket dagiti krimen gapu iti maysa a relihion.”
Maysa a naisangsangayan a pangarigan isu dagiti panangpapatay ti grupo a Manson idiay California, idi 1969. Sigun iti propesor ti historia a ni Jeffrey Russell, “kuna ni Manson nga isut’ agpadpada a ni Kristo ken ni Satanas. . .. Ti pasurot ni Manson a ni Tex Watson ti nangiyanunsio, idi immay a papatayenna ni Sharon Tate, ‘Siak ti diablo; addaak ditoy tapno agaramid ti aramid ti diablo.’” Ngem ti Satanismo ket saan a kanayon a napanayag a kas iti daytoy.
Panangkulam, Espiritismo, ken Panagbaglan
Kinapudnona, ti panagdayaw ken Satanas ket saan a limitado iti direkta a panagdayaw ken Satanas babaen iti nagan. Namakdaar ni apostol Pablo: “Dagiti bambanag nga idaton dagiti nasion idatonda ida kadagiti demonio.” (1 Corinto 10:20) Ket ti panagdayaw iti demonio ti kinapudnona ket isu met laeng ti panagdayaw ken Satanas, yantangay ni Satanas ti maaw-awagan “ti agturay dagiti demonio.” (Marcos 3:22) Ania nga ar-aramid “dagiti nasion” ti mailasin kas panagdayaw iti demonio, wenno panagdayaw ken Satanas? Dagiti sao ti Dios iti Israel ti mangted kadatayo ti sumagmamano a pangarigan: “Awan ti masarakan kenka. . . a maysa a mangaramid iti panagpadpadles, a maysa a mammuyon wenno maysa a manangsalamangka wenno managanito, wenno maysa a managilabeg wenno mannakiuman kadagiti mangkukulam wenno maysa nga asuang wenno adda siasinoman a makiuman kadagiti natay. Ta siasinoman a mangaramid kadagitoy isu ti makarimon ken Jehova.”—Deuteronomio 18:10-12.
Gapuna, napakdaarantayo kontra iti panagidaton ti dara ken pannakiuman iti espiritu nga ar-aramiden dagiti papadi a voodoo idiay Brazil wenno babaen kadagiti houngans ken mambos ti Haiti. Ken mapakpakdaarantayo kontra kadagiti umas-asping nga ar-aramid ti Santeria, nga al-alagaden ti sumagmamano a naidestierro a Cubano idiay Estados Unidos. Mapakpakdaarantayo, met, kontra kadagiti baglan nga agkuna a mabalinda ti makisao kadagiti natay a kararua tapno mangimula ti panagbuteng kadagiti sibibiag.—Idiligyo iti 1 Samuel 28:3-20.
Ti panangkulam ti nasaknap iti nagduduma a paset ti Africa. Idiay Sud Africa, kas pangarigan, napigsat’ pannakabalin dagiti mangkukulam, ket serioso ti panamati dagiti tattao kadakuada. Dagiti nabiit pay a kaso a naipablaak kadagiti pagiwarnakan ti mangibagbaga maipapan kadagiti derraaw a nangpuor a sibibiag kadagiti tattao a naakusar a nangpataud ti kimat a nangpapatay kadagiti kabaryuanda! Dagiti lokal a mangkukulam ti nangakusar kadagiti inosente a biktima kadagitoy “di natural” nga ar-aramid ket sada inggalut ida iti maysa a kayo tapno mapuoran. Ti kasta a panamati iti panangkukulam wenno panagsalamangka ti panagdayaw met kadagiti demonio.
Ngem, ti panangkulam ket saan a naipamaysa idiay Africa. Idi 1985, ni Herbert D. Dettmer, nga agserserbi ti pannakasentensiana ti pagbaludan iti maysa a sentro korektional idiay Virginia, E.U.A., ti naikkan kalintegan babaen iti District Court for the Eastern District of Virginia a maaddaan kadagiti kawes ken artikulo tapno mabalinna nga alagaden ti relihionna idiay pagbaludan. Ket ania ti relihionna? Sigun iti rekord ti korte, isut’ maysa a miembro “ti Church of Wicca (ad-adda a pagaammo kas panangkulam).” Gapuna, ni Dettmer ti addaan legal a kalintegan nga agusar iti panagdaydayawna ti asupre, asin idiay baybay, wenno di napapino nga asin; dagiti kandila; insienso; maysa a relo nga adda alarmana; ken ti puraw nga abito.
Wen, sigun kadagiti panangipamatmat, nasaknap ti panangkukulam iti Laud. Ti periodiko a British a Manchester Guardian Weekly ti nagkuna: “Iti lima a tawen ti napalabasen, naipato nga adda agarup 60,000 a mangkukulam idiay laeng Britania: itatta [1985] ti bilang ti pinattapatta dagiti dadduma a mangkukulam a nagbalinen a 80,000. Ti Prediction, maysa a binulan a magasin para iti astrolohia ken ti okulto, ti addaan sirkulasion a 32,000.
Satanismo ken Musika
Ni Propesor Russell, idiay librona a Mephistopheles—The Devil in the Modern World, iyegna manen ti atensiontayo iti maysa pay a pamay-an a dagiti pangpanggep ni Satanas ti mapaadelantar. Insuratna: “Ti napanayag a Satanismo ti nagkupas a sipapardas kalpasan ti 1970s, ngem dagiti elemento ti kultural a Satanismo ti nagtultuloy kadagiti 1980s iti ‘heavy metal’ rock music agraman dagiti sagpaminsan a panangawag iti nagan ti Diablo ken ti kalalainganna a panangrespeto kadagiti Sataniko nga ipatpateg ti kinaulpit, droga, kinalaad, ladingit, kinamanaglablabes, kinaranggas, ungor ken pannakagulo, ken kinaawan-rag-o.”—Kuami ti italiko.
Nalabit dagiti musiko a nangigamer kadagiti elemento ti Satanismo kadagiti toktokarda ti saanda a serioso. Mabalin a padpadasenda laeng ti mangkellaat wenno agbalin a karkarna. Nupay kasta, sumagmamano a nalaka a maap-apektaran nga indibidual ti apektadoda unay. Kuna ni Propesor Russell a “ti kankanayon semiserioso a propaganda iti kinadakes ti addaan kadagiti mangparupsa nga epekto kadagiti luku-luko ken nakapuy nga is-isip. Maysa a resulta isu ti panaggarasugas dagiti nakaam-amak a nagdakes a krimen, agraman ti panangdangran kadagiti ubbing ken an-animal.”
Maysa a nabiit pay a kaso ti nangkigtot kadagiti taga Nueva York. Sigun ti maysa a padamag ti periodiko, maysa a 14-años nga ubing a lalaki, “a nakayawan unay ti Satanismo,” binagsolna ti inana agingga ken patay ket kalpasanna nagbekkel. Maysa a taga Canada a manangbalakad ti pamilia ti nagkuna, kas naipadamag idiay Maclean’s magasin, a ti dumakdakkel a bilang dagiti nariribukan a tin-edyers ti nagipudno iti panangal-alagadda ti “satanismo, masansan kakombinasion dagiti droga ken dagiti ad-adda a nakasang a kita ti heavy-metal rock music.”
Saan a Basta Aglabas nga Uso
Ti uso nga agsaksaknap itatta idiay Estados Unidos isut’ maaw-awagan channelling. Masansan agbaybayad dagiti tattao ti sumagmamano gasut a doliar tapno makipaset kadagiti sesion a sadiay ti maysa a “channel,” kayatna a sawen maysa a medium, kunana nga isut’ mangikabkabil ti bagina (dagiti channels masansan babbaida) a makikomunikar iti espiritu ti tao a nabayagen a natay. Iti maysa a kaso ti maysa a channel, kuna ti prensa, dagiti sesion “ti sagpaminsan maipatpatulod babaen iti sangal ti telebision satelait iti rinibribo a tattao a dagdagus iti kagudua dosena a siudad.” Daytoy a pagannayasan ket nabatad a panangsukir ti balakad ti Biblia a liklikan dagiti espiritu a medium ken dagiti mammuyon. Gapuna, daytat’ kita ti panagdayaw a mailasin kas panagdayaw ti demonio. Ket kas amin nga espiritismo, daytat’ naibatay iti sataniko a kinaulbod a ti kararua ti tao ti di matay.—Eclesiastes 9:5; Ezequiel 18:4, 20.
Ti Impluensia ti Diablo iti Lubong a Napnuan Gura
Ti nakabutbuteng a kasasaad ti sangatauan iti daytoy maika-20 a siglo ti mamagpanunot kadatayo no ti impluensia ni Satanas ket ad-adayo pay ti nadanonna. Sinagid ni Propesor Russell daytoy idi a kinunana: “Iti agdama, a napattapatta dagiti arsenal ti nuklear nga ig-igam a pitopulo a daras ti kantidad a kasapulan a mangpapatay ti tunggal sibibiag a nagdori iti rabaw ti daga, sitatangken lengngesna nga agsagsaganatayo ti gubat a di makagunggona ti uray asinoman nga indibidual, nasion, wenno ideolohia no di ket iturongna ti rinibo a milion iti nakabutbuteng nga ipapatay. Ania a puersa ti mangitugtuggod kadatayo iti dalan nga iti inaldaw agbalbalin a nakapegpeggad? Agpaay a pagimbagan ti siasino ti nuklear a pannakadadael ti planeta?
Dayta laeng puersa a nanipud idi punganay ti addaanen ti awan inggana a kinadawel ken dakes a panggep ti nangpanggep ti pannakadadael ti lubong.”
Asino wenno ania dayta a puersa? Ited ti propesor ti mismo a sungbatna kadagitoy a sasao: “Ti Diablo ti nadepinar kas ti espiritu a mangsapsapul ti panangilibakna ken panangdadaelna ti lubong ti Dios iti ingganat’ kabaelanna. Saan aya a ti puersa a mangpilpilit kadatayo nga agipaturong kadagiti nuklear nga igam ti isu met laeng a puersa a kanayon a pagregreggetanna nga ilibak ti bagina? Iti daytoy aglaplapusanan a krisis ti planetatayo, ditay mabalin nga ikkaten dayta a posibilidad.” Pudno unay a dagiti Kristiano saanda nga ik-ikkaten dayta a posibilidad! Ni Jesus mismo impakitana ti dakkel nga impluensia ni Satanas iti daytoy a lubong idi Isu ti nangawag kenkuana nga “ti agturay daytoy a lubong.” (Juan 12:31) Iti panangiladawan ti kababalin ti panunot ni Satanas itatta, kuna ti libro nga Apocalipsis nga isu ti “addaan dakkel a pungtot, nga ammona a bassiten ti tiempona.” (Apocalipsis 12:12) Iti panangtukoyna ti padpadasen nga aramiden ni Satanas iti tiempotayo, dayta met laeng a libro ti nagkuna nga isut’ agus-usar kadagiti dinedemonio a propaganda kontra kadagiti agtuturay daytoy a lubong tapno urnongenna “ida a maisagana iti gubat ti dakkel nga aldaw ti Dios a Mannakabalin amin.” (Apocalipsis 16:14) Saan, ditay mabalin nga ikkaten ti impluensia ni Satanas a Diablo no padpadasentay a tarusan ti rason ti agmauyong a kurso ti sangatauan a mangdadael ti bagina.
Ni apostol Pablo inawaganna ni Satanas “ti panguloen ti pannakabalin ti angin, ti espiritu nga ita agaramid kadagiti annak ti kinasukir,” ken “ti dios daytoy a sistema dagiti bambanag.” (Efeso 2:2; 2 Corinto 4:4) Bassit ngarud ti pagsiddaawanen no apay adut’ agsaludsod no amin dagiti kinadangkes daytoy “nalawlawaganen” a sientipiko nga edad—dagiti dua a sangalubongan a gubgubat, ti panangtalipupos kadagiti tattao idiay Europa ken Kampuchea, ti tigtignayen ti politika a panagbisin idiay Africa, dagiti nakaro a sangalubongan a narelihiusuan a panagsisina ken panagsisina ti rasa, gura, panagpipinnatay, ti sistematiko a panangparigat, ti kriminal a panangdadael ti sangatauan babaen kadagiti droga, tapno inaganan ti sumagmamano laeng—ket panangsursurot laeng iti plano ti maysa a napigsa, nadangkes a puersa a desidido a mangiduron ti sangatauan nga umadayo iti Dios ken nalabit uray pay iti sangalubongan a panagsusaid.
Ngarud, asino, ni Satanas? Ania a talaga ti panggepna? Aniat’ maaramidantayo kas indibidual maipapan iti dayta? Awisendakayo a mangusig iti pannakaisalaysay dagitoy a saludsod iti sumaganad a dua nga artikulo.
[Ladawan iti panid 7]
Iti pananglisi ti sataniko a toktokar, sapsapulen ti ili ti Dios dagiti makaay-ayo a paglinglingayan