Panangbirok iti Paraiso

KAS INSALAYSAY NI PASCAL STISI

Sa Rabii unay idin, ket awanen tattao kadagiti kalsada ti ili ti Béziers, iti makin-abagatan a Francia. Idi nakitami ti kapinpinta a diding ti paglakuan kadagiti libro ti relihion, insuratmi ken ti gayyemko iti dadakkel a nangisit a letra ti sasao ni Nietzsche nga Aleman a pilosopo: ‘Natayen dagiti didiosen. Agbiag ti Superman!’ Ngem ania ti nangituggod kaniak iti daytoy?

NAYANAKAK ditoy Francia idi 1951 iti Katoliko a pamilia nga addaan Italiano a kapuonan. Idi ubingak pay laeng, mapankami agbakasion idiay abagatan nga Italia. Addaan ti tunggal purok sadiay iti imahen ni Birhen Maria. Sinursurotmi ken ni lolok dagitoy dadakkel a sikakawes a rebulto kadagiti di maung-ungpot a prosesion idiay bambantay​—ngem awan a pulos panamatpatik. Nagraduarak iti high school iti narelihiosuan nga eskuelaan dagiti Jesuita. Nupay kasta, awan malagipko a nangngegko a talaga a nangpabileg ti pammatik iti Dios.

Inrugik nga inutob ti panggep ti biag idi nagadalak iti medisina iti unibersidad ti Montpellier. Nasugatan ni tatangko idi gubat ket kankanayon nga adda doktor iti sibayna. Saan kadi a nasaysayaat nga isardeng ti gubat imbes a busbosen ti adu a tiempo ken bannog a mangagas iti tattao kadagiti panangdidigrana? Kaskasdi, kabarbaraan idi ti Gubat idiay Vietnam. Para kaniak, ti kakaisuna, kas pagarigan, a nainkalintegan a wagas a pangagas iti kanser iti bara isu ti panangikkat iti kangrunaan a makagapu​—ti tabako. Ket dagidiay ngay sakit a patauden ti malnutrision kadagiti napanglaw a pagilian ken dagidiay sakit a gapuanan ti sobra a pannangan kadagiti nabaknang a daga? Saan kadi a nasaysayaat nga ikkaten dagiti makagapu imbes a remediaran dagiti nakalkaldaang a resultada? Apay a nagadu a panagsagaba ditoy daga? Namatiak nga adda nakaro a banag iti daytoy makadadael a kagimongan, ket pinabasolko dagiti gobierno.

Ti paboritok a libro ket insurat ti maysa nga anarkista, ket isuratko kadagiti pader dagiti sasaona. Nagin-inut a nagbalinak metten nga anarkista, nga awanan pammati wenno linlinteg iti moral, nga awan kayatko a Dios wenno apo. Para kaniak, ti Dios ken relihion ket inimbento dagiti babaknang ken natuturay tapno madominaran ken magundawayandakami. ‘Agbannogkayo ditoy daga a para kadakami, ket dakkelto ti gunggonayo idiay paraiso sadi langit,’ kasla kasta ti ibagbagada. Ngem nagngudon ti tiempo dagiti didiosen. Masapul a mapakaammuan dagiti tattao. Ti panagsurat kadagiti diding ket maysa a wagas a mangipakaammo kadakuada.

Kas resultana, saankon a naipangpangruna ti panageskuelak. Kabayatanna nageskuelaak tapno agadalak iti geograpia ken ekolohia iti sabali nga unibersidad ti Montpellier a sadiay nagraira ti kinaranggas. Bayat nga ad-adu ti naadalko iti ekolohia, nakarkaro met ti pannakadismayak iti pannakaammok a marugrugitan ti napintas a planetatayo.

Tinawen kada bakasion iti kalgaw, ti la nakilugluganak a nagbayanggudaw, a nadanonko ti rinibribu a kilometro iti intero nga Europa. Bayat a nagbiaheak ken nakisarsaritaak kadagiti ginasut nga agmammaneho, nasaksiak ti kinadakes ken panagrakaya ti natauan a kagimongan. Naminsan, bayat a birbirokek ti paraiso, nakadanonak kadagiti nakaim-imnas nga igid ti baybay idiay napintas nga isla ti Creta ket nasarakak a natapawanda iti krudo. Nagleddaangak. Adda pay la ngata sangapingir a paraiso a nabati ditoy daga?

Isusubli Idiay Away

Indagadag dagiti ekologo ti Francia ti isusubli iti away kas solusion dagiti parikut ti kagimongan. Kayatko idi ti agtrabaho babaen kadagiti imak. Isu a gimmatangak iti daan a balay a kinabite iti bassit a purok idiay arsadanan ti Bambantay ti Cévennes iti makin-abagatan a Francia. “Paraiso Itan” ti insuratko idiay ridaw, nga isu ti replan dagiti Americano a hippy. Adda agdaldaliasat idi a balasang nga Aleman, ket nagbalin a kabbalayko. Diak pulos kayat ti agpakasar iti mayor, ta pannakabagi ti gobierno. Ket iti simbaan? Bay-amon!

Kaaduanna, sakasakakami, ket atiddog ti buokko ken ti barbasko. Naay-ayoak nga agmula kadagiti kayo nga agbunga ken natnateng. Nakaas-asul ti tangatang no iti kalgaw, ken agkakanta dagiti andidit. Sumayamusom dagiti sabsabong iti away, ken nakatubtubbog dagiti prutas ti Mediteraneo​—dagiti ubas ken higos iti muyongmi! Kasla nabirokanmin ti lugarmi iti paraiso.

Natukay ti Panamati iti Dios

Nagadalak iti cellular biology, embryology, ken anatomy idiay unibersidad, ket nagsiddaawak unay iti kinakomplikado ken kinatunos amin dagitoy a proseso. Ita ta inaldaw a mautob ken maamisigkon a mismo ti sangaparsuaan, nagamangaak iti imnas ken potensialna. Inaldaw-aldaw a naukrad kaniak ti libro ti sangaparsuaan. Iti maysa nga aldaw, bayat ti nawatiwat a pannagnak iti katurturodan ken kalpasan nga inut-utobko a sipapasnek ti kaipapanan ti biag, naamirisko a talaga nga adda Namarsua. Inkeddengko iti pusok a mamati iti Dios. Iti naglabas, simnek ti kinakawaw iti pusok, makapadukot a kinaliday. Kinunak iti bagik iti daydi aldaw a nangrugiak a namati iti Dios: ‘Pascal, saankanto a pulos nga agmaymaysan.’ Naisalsalumina a rikna daydi.

Di nagbayag, dakami ken ti kabbalayko naaddaankami iti anak a babai​—ni Amandine. Napalalo ti dungngok kenkuana. Ita ta mamatiakon iti Dios, rinaemkon ti sumagmamano kadagiti ammok a moral a pagalagadan. Saanakon a nagtakaw ken nagulbod, ket di nagbayag naamirisko a timmulong kaniak daytoy tapno maliklikak dagiti adu a problema kadagidiay kataktakunaynayko. Wen, adda dagiti problemami, ket ti paraisok saan a kas iti ninamnamak. Nagusar dagiti lokal nga agay-aywan kadagiti kaubasan kadagiti insektisidio ken herbisidio a nangapektar met kadagiti apitko. Kaskasdi a di pay la nasungbatan ti saludsodko maipapan iti puon ti kinadakes. Maysa pay, nupay nagadun ti nabasak maipapan iti biag ti pamilia, saan a nalapdan ti panagririmi iti kabbalayko. Manmano ti gagayyemmi, sa dida pay mapagtalkan; kayatda pay a lukuennak ti kabbalayko. Masapul nga adda nasaysayaat a paraiso.

Sungbat ti Karkararagko

Masansan a nagkarkararagak iti Dios, iti bukodko a wagas, tapno iwanwanna ti biagko. Maysa a bigat ti Domingo nagtuktok iti ridawko ti maysa a mannakigayyem a babai nga agnagan Irène Lopez ken ti baritona. Maysa a Saksi ni Jehova. Dinengngegko ti impadamagna ket inakseptarko ti intulagna a panagsubli. Dua a lallaki ti immay. Dua a banag ti malagipko a nagsasaritaanmi​—Paraiso ken Pagarian ti Dios. Impapusok a naimbag dagita a kapanunotan, ket iti panaglabas ti bulbulan, natarusak nga addanto aldaw a masapul nga itunosko ti biagko kadagiti pagalagadan ti Dios no kayatko ti maaddaan iti nadalus a konsiensia ken agsagrap iti pudpudno a kinaragsak.

Tapno maitunosmi ti biagmi iti Sao ti Dios, kayat ti kabbalayko nga agkasarkami idi damo. Idi kuan naibarkada kadagiti tattao a nangrabrabak iti Dios ken kadagiti lintegna. Napalalo ti pannakaklaatko idi simmangpetak iti maysa a rabii ti primavera. Awanen ti tao idiay balaymi. Pimmanaw ti kabbalayko, ket intugotna ti tallo-ti-tawenna nga anakmi a babai. Nagur-urayak iti adu nga aldaw iti isusublida​—ngem awan naurayko. Imbes a pinabasolko ti Dios, nagkararagak kenkuana a tulongannak.

Di nagbayag kalpasanna, innalak ti Biblia, sa nagtugawak iti sirok ti higosko, ket nagbasaak. Kinapudnona, inanagko ti sasaona. Nupay nabasakon amin a kita ti liblibro dagiti sikoanalista ken sikologo, diak pay pulos nakabasa ti kasta a sirib. Sigurado a nadiosan ti pannakaipaltiingna daytoy a libro. Pinagsiddaawnak dagiti pannursuro ni Jesus ken ti pannakatarusna iti kasasaad ti tao. Naliwliwaak kadagiti Salmo ken nasdaawak kadagiti praktikal a sirib iti Proverbio. Nabigbigko a dagus a nupay ti panangadal iti sangaparsuaan ket nagsayaat a mangyadani iti maysa iti Dios, ipalgakna laeng ‘dagiti paspaset a naruar kadagiti daldalanna.’​—Job 26:14.

Inikkandak pay dagiti Saksi kadagiti libro a Ti Kinapudno a Mangiturong iti Biag nga Awan Inggana ken Panangparagsak ti Biag ti Pamiliayo.a Naluktan dagiti matak idi nabasak dagita. Tinulongannak ti libro a Kinapudno a mangtarus no apay sarsarangten ti tao ti nasaknap a polusion, gubgubat, kumarkaro a kinaranggas, ken ti pangta ti nuklear a pannakaikisap. Ket no kasano nga impasimudaag ti nalabaga a tangatang a nakitak iti hardinko ti nasayaat a paniempo iti sumaganad nga aldaw, pinaneknekan dagitoy a pasamak nga asidegen ti Pagarian ti Dios. No maipapan iti libro a Biag ti Pamilia, kayatko koma nga ipakita dayta iti daydi kabbalayko ket ibagak kenkuana a naragsakkami koma no ipakatmi dagiti patigmaan ti Biblia. Ngem saanen a mabalin.

Panagprogreso iti Naespirituan

Ad-adu pay ti kayatko a maammuan, isu a dinawatko ken Robert, maysa a Saksi, a sarungkarannak. Napalalo ti siddaawna idi ibagak a kayatko ti mabautisaran, isu a nairugi ti panagadal iti Biblia. Dagdagusko nga impadamag kadagiti sabsabali ti maad-adalko, ken inrugik ti nagiwaras kadagiti publikasion nga innalak idiay Kingdom Hall.

Tapno adda panggedak, nagadalak iti kinamason. Gapu ta ammok ti pagimbagan a maaramidan ti Sao ti Dios iti maysa a tao, innalak amin a gundaway a kasabaan iti impormal dagiti kaeskuelaak ken dagiti mannursuro. Maysa a sardam, nasabatko ni Serge idiay pasilio. Adda sumagmamano a magasin nga ig-iggamanna. “Magusgustuam sa ti agbasa,” kinunak kenkuana. “Wen, ngem naumaakon kadagitoy.” “Kayatmo kadi ti makabasa iti talaga a nagsayaat a basaen?” dinamagko kenkuana. Nagsayaat ti panagsarsaritami maipapan iti Pagarian ti Dios, ket kalpasanna innalana dagiti literatura ti Biblia. Nakikuyog kaniak idiay Kingdom Hall iti simmaganad a lawas, ket nairugi ti panagadal iti Biblia.

Maysa nga aldaw dinamagko ken Robert no mabalinko ti mangasaba iti binalaybalay. Napan iti aparadorna ken inyalaannak iti amerikana. Iti simmaruno a Domingo, damok unay ti nakiruar iti ministerio a kaduana. Kamaudiananna, idi Marso 7, 1981, insimbolok ti dedikasionko ken Jehova a Dios iti publiko babaen iti bautismo.

Tulong No Adda Rigat

Kabayatanna natakuatak nga agnanaed ni Amandine ken ni nanangna iti sabali a daga. Anian, ta ni nanangna​—sigun iti linteg ti daga a pagnanaedanna​—pinawilannak a mangsarungkar iti anakko. Naldaanganak unay. Nakiasawa ti nanang ni Amandine, ket kimmaro ti pannakadismayak idi naawatko ti opisial a pakaammo nga inampon ni lakayna ti balasitangko​—nupay awan pulos pammalubosko. Awanen ti uray ania a kalintegak iti anakko. Nupay nagdarumak, awan naalak a pammalubos a mangbisita kenkuana. Kasla nakabaklayak idi iti 50 kilo, kasta ti pannakadismayak.

Ngem tinulongannak ti Sao ni Jehova iti nadumaduma a wagas. Maysa nga aldaw idi a nakaro ti tuokko, inulit-ulitko ti sasao ti Proverbio 24:10: “No kumapsutka iti aldaw ti pagpaglan, ti pigsam bassit.” Tinulongannak daytoy a bersikulo tapno diak agkapuy. Iti sabali pay nga okasion, idi dida latta ipalubos a makitak ti anakko, napanak nangasaba ket pinetpetak a siiirut ti pagiggaman ti bagko. Kadagiti kakasta a narikut a kanito, napasarak ti kinapudno ti Salmo 126:6, a kunana: “Ti mapan ket agsangsangit, nga agawit iti bin-i nga imulana, awan duadua nga agawidto a siraragsak, nga ikuyogna dagiti binettekna.” Naadalko ti napateg a leksion a no addaanka kadagiti serioso a pakasuotan, apaman nga inaramidmo aminen a kabaelam a mangrisut kadagita, masapul a baybay-amon ket agtultuloyka a determinado nga agserbi ken Jehova. Daytoy laeng ti pamuspusan tapno mataginayonmo ti rag-om.

Panangragpat iti Banag a Nasaysayaat

Idi nadlaw dagiti ay-ayatek a nagannak kaniak dagiti nagbalbaliwak, intukonda a tulongandak a mangituloy iti panageskuelak idiay unibersidad. Nagyamanak kadakuada, ngem itan sabalin ti kalatko. Linuk-atannakon ti kinapudno manipud kadagiti natauan a pilosopia, mistisismo, ken astrolohia. Addaanakon kadagiti pudno a gagayyem a di pulos agpipinnatay iti gubat. Ket nasungbatan met laengen dagiti saludsodko no apay nagadu a panagsagaba ditoy daga. Kas panagyamanko kayatkon ti agserbi iti Dios iti amin a pigsak. Impamaysa ni Jesus nga interamente ti bagina iti ministeriona, ket kayatko a suroten ti ulidanna.

Idi 1983, inlusuloskon ti negosiok a kinamason tapno agbalinak a ministro iti amin a tiempo. Kas sungbat ti karkararagko, nakabirokak iti paset-tiempo a trabaho iti maysa a parke a pangsuportak iti bagik. Anian a rag-ok a timmabuno iti eskuelaan dagiti payunir a kaduak ni Serge, daydi baro a kinaskasabaak idiay eskuelaan ti panagmason! Kalpasan ti tallo a tawen kas regular pioneer, tinarigagayak a palawaen ti serbisiok ken Jehova. Iti kasta, idi 1986, nadutokanak kas special pioneer idiay nakapimpintas nga ili ti Provins, saan unay nga adayo idiay Paris. Masansan, no makaawidakon iti rabii, agparintumengak nga agyaman ken Jehova iti nagsayaat nga aldaw a binusbosko a nangipakpakaammo maipapan kenkuana kadagiti sabsabali. Kinapudnona, ti pannakisarita iti Dios ken panangipakaammo Kenkuana isuda ti dua a kadaklan a ragsakko iti biag.

Sabali pay a dakkel a rag-ok isu ti panagbautisar ni 68-anyos a nanangko nga agtataeng idiay Cébazan, bassit a purok iti abagatan a Francia. Idi inrugi ni nanangko a binasa ti Biblia, pinatulodak iti suskripsion iti Pagwanawanan ken Agriingkayo! Gapu ta managpanunot a tao, di nagbayag nabigbigna a kinapudno dagiti nabasana.

Ti Bethel​—Nagpaiduma a Naespirituan a Paraiso

Idi kinissayan ti Watch Tower Society ti bilang dagiti special pioneer, nagaplikarak iti Ministerial Training School ken iti Bethel, ti sanga nga opisina dagiti Saksi ni Jehova iti Francia. Impabiangko ken Jehova ti pangngeddeng no kasano ti kasayaatan a panagserbik kenkuana. Sumagmamano a bulan kalpasanna, idi Disiembre 1989, naawisak idiay Bethel sadi Louviers, amianan a laud ti Francia. Nagsayaat ti resultana, tangay nabaelak a tinulongan, gapu iti kaasidegko, ti kabsatko ken ti ipagko a mangasikaso kadagiti nagannak kaniak idi nakaron ti sakitda. Diak koma nabalinan nga inaramid daytoy no nagserbiak kas misionero a rinibribu a kilometro ti kaadayok.

Namin-adu a binisitanak ni nanang idiay Bethel. Nupay sakripisio a dakkel kenkuana ti panagnaedna nga adayo kaniak, masansan a kinunana: “Agtalinaedka ditoy Bethel, Anakko. Maragsakanak ta agserserbika ken Jehova iti kastoy a wagas.” Makapaladingit ta pimmusayen nga agpada dagiti nagannak kaniak. Anian a panangseggak iti pannakakitakto kadakuada iti daga a nagbalinen a literal a paraiso!

Talaga a mamatiak a no adda man balay a maikari a maawagan “Paraiso Itan,” isu dayta ti Bethel​—ti “Balay ti Dios”​—ta kangrunaan iti amin, naespirituan ti pudno a paraiso, ket agraraira ti espiritualidad iti Bethel. Addaankami iti gundaway a mangpatanor iti bunga ti espiritu. (Galacia 5:22, 23) Ti nabaknang a naespirituan a taraon a maalami iti inaldaw a pannakasalaysay ti teksto ti Biblia ken ti panagadal ti pamilia iti Pagwanawanan tumulong a mangpakired kaniak iti serbisio ti Bethel. Kanayonanna pay, ti pannakilangen kadagiti naespirituan ti panagpampanunotna a kakabsat a matalek a nagserserbi ken Jehova iti adun a dekada ket pagbalinenna ti Bethel a naisalsalumina a pagyanan tapno rumang-ay iti naespirituan. Nupay 17 a tawenen a nagsinakami iti balasangko, nakabirokak iti nagadu a nareregta nga agtutubo ditoy Bethel, nga imbilangko nga annakko, ket maragsakanak iti naespirituan a panagprogresoda. Iti kallabes a walo a tawen, pito a nagduduma a trabaho ti naglasatakon. Nupay saan a kanayon a nalaka dagitoy a panagbalbaliw, makagunggona ti kakasta a pannakasanay idi agangay.

Adda klase ti utong nga immulak nga agbunga iti ginasut. Umarngi iti dayta, napadasak a no dakes ti imulam, maminggasut a nakarkaro pay ti maapitmo​—ket saan laeng a mammaminsan ti panagapit. Ti kapadasan ket kasla eskuelaan a nangina ti leksion a bayadam. Kaykayatko a diak koma pulos nages-eskuelan iti dayta, imbes ketdi dimmakkelak koma a mayalubog iti daldalan ni Jehova. Anian a pribilehio dagidiay agtutubo a pinatanor dagiti Kristiano a nagannak! Di pagduaduaan, nasaysayaat ti agmula iti naimbag iti serbisio ni Jehova ken agapit iti maminggasut nga ad-adu a talna ken pannakapnek.​—Galacia 6:7, 8.

Idi payunirak pay laeng, pasaray labasak ti paglakuan kadagiti libro ti relihion nga iti didingna ti nangisuratak iti replan ti anarkista. Simrekak pay ditan ket nakasaritak ti makinkukua maipapan iti sibibiag a Dios ken ti panggepna. Wen, sibibiag ti Dios! Ad-adda pay, ni Jehova, ti kakaisuna a pudno a Dios, ket matalek nga Ama a dina pulos baybay-an dagiti annakna. (Apocalipsis 15:4) Sapay koma ta adu pay nga umariwekwek kadagiti amin a nasion ti makabirok iti naespirituan a paraiso itan​—ken ti um-umay a naisubli a Paraiso​—babaen ti panagserbi ken panangidaydayawda iti sibibiag a Dios a ni Jehova!

[Footnote]

[Dagiti Ladawan iti panid 26]

Gapu ta ginutugotnak dagiti pagsidsiddaawan ti sangaparsuaan, inkeddengko iti pusok a mamati iti Dios. (Kannawan) Panagserbi iti Bethel itatta