Report Dagiti Manangiwaragawag iti Pagarian
Panangipangag iti Naimbag a Damag Idiay Latvia
IBATAD ti Biblia a pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) Mangmangngeganen dayta dagidiay napaidaman iti gundaway a dumngeg iti naimbag a damag iti adu a tawen! Idiay Latvia, kas iti dadduma a paset ti lubong, dagiti tattao nga addaan nadumaduma nga edad ken kasasaad ipangpangagda ti mensahe, kas ipakita dagiti sumaganad a kapadasan.
• Idiay Rēzekne, maysa nga ili iti makindaya a Latvia, maysa nga ina ken ti tin-edyer a balasangna ti nagsaludsod iti address iti maysa a babai nga adda iti lansangan. Idi naitedna kadakuada ti impormasion, ti babai a naiparna a maysa kadagiti Saksi ni Jehova, inawisna ida kadagiti gimong dagiti Saksi.
Yantangay agpada a relihiosa ti agina, inkeddengda ti makigimong. Bayat ti panagturongda, nagnumuanda a no adda masiputanda a di umiso, pumanawda a dagus. Nupay kasta, makapainteres unay ti gimong isu a dida pulos napanunot ti pumanaw. Inakseptarda ti naitukon a panagadal iti Biblia ken rinugianda ti tumabuno a regular kadagiti gimong. Iti las-ud la ti tallo a bulan, inyebkasda ti tarigagayda a makiraman iti panangasaba ken magagaranda nga agpabautisar.
• Iti maysa a siudad idiay makinlaud a Latvia, naam-ammo ti maysa a Saksi ti 85-tawenna a ni Anna a nangipakita iti pudpudno nga interes ken immannugot nga agadal iti Biblia. Nakaro ti ibubusor ti anakna a babai ken dadduma pay a miembro ti pamiliada. Ngem di impalubos ni Anna a sumardeng ti pannakiadalna iti Biblia gapu iti dayta nga ibubusor wenno iti kinabaket ken nakapuy a salun-atna.
Maysa nga aldaw, imbaga ni Anna iti anakna a babai nga isu ket agpabautisar. “No agpabautisarka, ipanka iti balay a pagtaraknan,” kinuna ti anak ni Anna. Nupay kasta, saan a nagamak ni Anna iti dayta a pamutbuteng. Gapu iti nakapuy a salun-atna, nabautisaran iti mismo a pagtaenganna.
Ania ti reaksion ti anak a babai ni Anna? Nagbalbaliw ti kababalinna, ket nangisagana iti espesial a taraon agpaay ken nanangna kalpasan ti bautismo. Sana sinaludsod ken nanangna, “Ania ti mariknam ita ta nabautisarankan?” Ti sungbat ni Anna? “Kas iti kayyanak!”
• Idi Disiembre 1998, naam-ammo ti dua a Saksi ti maysa a retirado nga opisial ti buyot ti dati nga Union Soviet. Yantangay mamati ti opisial iti Namarsua, immannugot nga agadal iti Biblia, ket nakipagadal met ni baketna idi agangay. Napartak ti panagrang-ayda ket di nagbayag nagbalinda a di bautisado nga agibumbunannag. Iti simmaganad a kalgaw, nabautisaran ti dati nga opisial. Naparegta ti amin iti kongregasion gapu iti kasta la unay a panangipateg dagitoy nga agassawa iti naespirituan a bambanag. Kanayonanna, nakiramanda a nangpabaro iti maysa a balay idiay lugarda tapno agbalin a napintas a Kingdom Hall.