Agtalekkayo Kadi iti Sibibiag a Dios?

Madama idi ti maysa nga ekspedision nga impaannong ti American Museum of Natural History tapno pagadalan ti maysa a disso idiay Arctic nga impadamag ni eksplorador Robert E. Peary a nakitana agarup pito a tawen a nasaksakbay, idi 1906.

MANIPUD Cape Colgate iti ungto ti makin-amianan a laud ti Amianan nga America, nakita ni Peary ti puraw a pantok ti adayo a daga. Inawaganna dayta iti Crocker Land a naipanagan iti maysa kadagiti nanggastos iti panagsukisokna. Anian ti gagar dagiti nangituloy iti ekspedision idi masaripatpatanda ti maysa a disso nga addaan kadagiti turod, tanap, ken alimpatok a naabungotan iti niebe! Ngem di nagbayag, nabigbigda a maysa laeng a sirmata ti Arctic ti makitkitada. Daytoy makita nga epekto ti atmospera ti nangallilaw ken Peary, ket sada la nabigbig dayta idi nabusbosdan ti adu a tiempo, pigsa, ken kuarta iti panagsukisok iti banag a saan a pudno.

Ita, adu a tao ti mangipapaay iti debosion ken panawenda kadagiti didios a patienda a sibibiag. Idi kaaldawan dagiti apostol ni Jesus, madaydayaw dagiti didios a kas kada Hermes ken Zeus. (Aramid 14:11, 12) Minilion ita dagiti didios a daydayawen dagiti kameng ti Shinto, Hindu, ken dadduma pay a relihion iti lubong. Kinapudnona, kas kunaen ti Biblia, “adda adu a ‘didios’ ken adu nga ‘appo.’” (1 Corinto 8:5, 6) Mabalin aya a sibibiag amin dagitoy a didios?

Dagiti Didios a “Saan a Makaisalakan”

Kas pagarigan, utobenyo ti pannakausar dagiti imahen wenno simbolo iti panagdayaw. Para kadagiti agtaltalek wenno agkarkararag kadakuada, dagiti idolo ket kasla manangisalakan nga agik-ikut iti karkarna a pannakabalin a makabael a manggunggona kadagiti tattao wenno mangispal kadakuada iti peggad. Ngem pudno kadi a makaisalakan dagitoy? Mainaig kadagita a banag, inkanta ti salmista: “Dagiti idolo ti nasnasion ket pirak ken balitok, ti aramid dagiti ima ti naindagaan a tao. Addaanda iti ngiwat, ngem saanda a makapagsao iti aniaman; addaanda iti matmata, ngem saanda a makakita iti aniaman; addaanda iti laplapayag, ngem saanda a makangngeg iti aniaman. Kasta met nga awan espiritu iti ngiwatda.” Wen, didios dagitoy a “saan a makaisalakan.”​—Salmo 135:15-17; Isaias 45:20.

Pudno, mabalin nga ibaga dagiti agar-aramid kadagiti idolo a ti gapuananda ket gapu iti biag ken pannakabalin, ket agtalek kadakuada dagiti agdaydayaw iti idolo. ‘Ibaklayda [ti idolo] iti abaga,’ kuna ni propeta Isaias, “awitenda ket ikabilda iti lugarna tapno makapagtakder a siiintek.” Innayonna: “Manipud iti disso a nakaisaadanna saan a pumanaw. Ti maysa umkis pay iti dayta, ngem saan a sumungbat; saanna a maisalakan ti asinoman manipud rigatna.” (Isaias 46:7) Iti kinapudnona, agtalinaed nga awan biagna ti idolo uray kasano kapasnek ti panamati dagidiay agtaltalek iti dayta. “Awanan pateg a didios” dagita a kinitikitan nga imahen ken sinukog nga estatua.​—Habakuk 2:18.

Iti sadinoman, gagangay ita ti panangidolo, panagdayaw, wenno panagrukbab kadagiti artista, nalatak nga atleta, napolitikaan a sistema, ken narelihiosuan a papangulo. Kanayonanna, ti kuarta ket dios kadagiti adu. Iti tunggal kaso, matmatanda dagitoy nga idolo kas napateg ken natan-ok idinto a saan. Dida ipaay ken maipaay ti amin a namnamaen dagidiay mamati kadakuada. Kas pagarigan, agparang a ti kinabaknang ti solusion ti adu a parikut, ngem makaallilaw ti pannakabalin ti kinabaknang. (Marcos 4:19) Insaludsod ti maysa a managsirarak: “Apay nga adda ti tarigagayan unay ti nakaad-adu a tao, ken patienda a solusion ti amin a parikut, ngem no magun-odanen mangibunga iti pannakapaay wenno pannakariribuk?” Wen, no agpabaknang ti maysa a tao mabalin nga isakripisiona ti pudno a napateg, kas ti nasayaat a salun-at, makapnek a biag ti pamilia, nasinged a panaggagayyem, wenno ti nasayaat a relasion iti Namarsua. Ti diosna nagbalin a maysa laeng nga ‘idolo a saan a pudno’!​—Jonas 2:8.

“Awan Asinoman a Sumungsungbat”

Minamaag a patien a pudno ti saan a pudno. Dayta ti nasaem a kapadasan a nasursuro dagiti agdaydayaw iti dios a Baal idi kaaldawan ni propeta Elias. Mamatida unay nga adda pannakabalin ni Baal a mangpataud iti apuy manipud langit a manguram iti daton nga animal. Kinapudnona, “immaw-awagda iti nagan ni Baal manipud bigat agingga iti agmatuon, a kunkunada: ‘O Baal, sungbatannakami!’” Addaan kadi ni Baal iti lapayag a makangngeg ken ngiwat a makasao? Intuloy ti salaysay: “Awan ti timek, ket awan asinoman a sumungsungbat.” Wen, “awan ti panangipangag.” (1 Ar-ari 18:26, 29) Ni Baal ket saan a sibibiag wenno aktibo.

Anian a nagpateg a maammuan ken dayawentayo ti Dios a sibibiag! Ngem siasino dayta a Dios? Ken kasano a makagunggona kadatayo ti panagtalek kenkuana?

[Dagiti Ladawan iti panid 3]

Sinukimat ti kadua ni Peary a ni Egingwah ti aglikmut tapno kumita iti disso

Ni Robert E. Peary

[Credit Lines]

Egingwah: Manipud iti libro a The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Dagiti Ladawan iti panid 4]

Adu dagiti naallilaw kadagiti mapagrukrukbaban iti daytoy a lubong