Ti Panangbirok ti Tao iti Biag nga Agnanayon
SIPUD pay idi un-unana, inar-arapaapen ti tao ti agbiag nga agnanayon. Ngem, saan pay a natungpal dayta nga arapaap. Awan pay ti nakaammo no kasano a maparmek ti ipapatay. Ngem iti nabiit pay, dagiti agsuksukisok iti medisina naaddaanda iti namnama a posible nga agpaut ti biag ti tao. Panunotem ti maar-aramid iti nadumaduma a tay-ak ti panagadal ti siensia.
Agek-eksperimento dagiti biologo iti enzyme wenno kemikal a substansia a maawagan iti telomerase gapu iti panangikagumaanda a mangparmek iti panagsardeng dagiti selula a mangpataud kadagiti baro a selula. Ammo dagiti sientista a maikkat ken masukatan dagiti daan ken madaddadaelen a selula. Kinapudnona, mamin-adu nga agsukat dagiti selula iti kaaduan a paset ti bagi bayat ti panagbiag ti maysa a tao. No napapaut koma ti proseso ti panangpabaro, kuna dagiti managsukisok, “mabalin nga agtultuloy wenno agnanayon pay ketdi a mapabaro ti tao ti bagina.”
Ti therapeutic cloning, maysa a kontrobersial a tay-ak ti panagsirarak, ket maipagarup a makaipaay kadagiti pasiente iti baro ken maitutop unay nga organo a saan a laksiden ti bagi a pangsukat kadagiti dalem, bato, wenno puso. Mabalin a makopia dagita nga organo babaen ti panangusar kadagiti stem cell ti pasiente.
Dagiti managsukisok iti nanotechnology makitada nga addanto tiempo nga agusar dagiti doktor kadagiti robot a kasla selula ti kadakkelda tapno agbirok ken agdadael kadagiti selula ti kanser ken kadagiti makadangran a bakteria nga adda iti dara. Patien ti dadduma nga inton agangay, kabaelanton ti tao a taginayonen ti biagna babaen daytoy a tay-ak ti siensia, agraman dagiti gene therapy (panangagas babaen iti panangisingit iti gene iti selula ti pasiente).
Dagiti mangitantandudo iti cryonics idulinda dagiti nayelado a bangkay. Panggepda nga italimeng dagita a bangkay agingga a dumteng ti panawen a kabaelanen dagiti doktor nga agasan dagiti sakit, ikkaten dagiti epekto ti panaglakay, ken isubli ti biag ken salun-at dagiti natay babaen kadagiti takuat ti siensia medikal. Daytoy a kapanunotan ti awagan ti American Journal of Geriatric Psychiatry nga “agdama-aldaw a katupag ti panagembalsamar dagiti nagkauna nga Egipcio.”
Ti awan sarday a panangbirbirok ti tao iti imortalidad ipakitana no apay a ti ipapatay ket nagrigat nga akseptaren ti tao. Talaga kadi a mabalin a magun-odan ti tao ti biag nga agnanayon? Ania ti kuna ti Biblia maipapan iti daytoy? Masungbatan dayta iti sumaganad nga artikulo.