Pakasaritaan ti Biag
Sibabaknang a Binendisionan ni Jehova ti Tarigagayko nga Agbalin a Misionera
Kas insalaysay ni Sheila Winfield da Conceição
Naminsan, imbaga kadakami ti maysa a misionera a nagbakasion manipud Africa nga iti nakaidestinuanna a pagilian, agpastrek ti amin a bumalay ken sipapasnek nga agimdengda iti naimbag a damag ti Pagarian ti Dios. ‘Nagsayaaten no makapagserbiak met iti kasta a teritoria!’ nakunak iti panunotko. Gapu iti dayta a saritaan idi agtawenak iti 13, nangrugin a rimmusing ti tarigagayko nga agbalin a misionera.
SAKBAY dayta, nupay kasta, medio nabayag metten a naammuan ti pamiliami ti maipapan ken Jehova. Maysa nga agsapa idi 1939, dua nga agtutubo a lallaki a natakneng ti panagkawkawesda ti nagtuktok iti ridawmi idiay Hemel Hempstead, nga asideg laeng iti Greater London, England. Isuda dagiti Saksi ni Jehova. Agtawenak pay la idi iti maysa isu nga awan ti malagipko maipapan iti daydi nga isasarungkarda. Tapno laeng pumanawdan, imbaga kano kadakuada ni Nanang a nalabit interesado ni Tatang ngem alas nuebe ti rabiin inton makaawid. Anian a siddaaw ni Nanang idi nagsublida karabiyanna! Kalpasan a nasiguradona ti takderda iti politika ken kadagiti isyu a nainaig iti nasionalismo, ni tatangko a Henry Winfield, pinastrekna ida ken immannugot a mayadalan iti Biblia. Nagbiit a rimmang-ay agingga a nabautisaran. Sumagmamano a tawen kalpasanna, nagpayadal metten ni nanangko a Kathleen. Nabautisaran idi 1946.
Idi 1948, rinugiak ti regular a pannakipasetko iti panangikasaba iti naimbag a damag ti Pagarian ti Dios. Napanunotko a masapul nga adda relok tapno siuumiso a maireportko dagiti oras a mabusbosko iti panangasaba. No agsingsingpetkami idi ubbingkami, kanayon a makaawatkami iti sixpence (sensilio nga aggatad iti agarup ₱6.00) kas balonmi kada Sabado. Dandani dua a tawen nga inurnongko dagiti naited kaniak a sixpence tapno makagatangak iti kalakaan a relo idi a tiempo. Nupay kasta, ni Ray, ti buridek kadagiti dua nga adingko a lallaki, kanayon nga agdawat ken ni Tatang iti dua a threepence (sensilio nga aggatad iti agarup ₱3.00), imbes a maysa a sensilio a sixpence. Maysa nga aldaw, impapilitna a dua a sensilio ti maited kenkuana isu a nakaunget ni Tatang. Nagsangit ni Ray ket imbagana a kasapulanna ti dua a threepence gapu iti nalimed a karina ken Jehova. Kamaudiananna, kastoy ti inlawlawag ni Ray: “Ti maysa ngamin a threepence ket itinnagko iti kahon ti donasion, ken para kaniak ti maysa pay a threepence.” Nakasangit ni Nanang gapu iti rag-o. Dagus nga inyurnos ni Tatang a dua a sensilio ti maited ken ni Ray. Nasursurok ti kinapateg ti pinansial a panangsuportar iti trabaho a nainaig iti Pagarian.
Agarup iti daytoy a tiempo, inyurnos ni Tatang nga umakarkami iti lugar nga ad-adda nga agkasapulan kadagiti manangiwaragawag iti Pagarian. Idi 1949, inlakona ti talonna ken ti negosiona a panaglako iti darat ken graba sa nangrugi nga agserbi kas payunir, wenno amin-tiempo a ministro dagiti Saksi ni Jehova. Nabautisaranak idi Setiembre 24, 1950, kas simbolo ti dedikasionko ken Jehova. Sipud idin, no bakasion iti eskuelaan, agpalistaak kas vacation pioneer (auxiliary pioneer itan) a pangbusbosak iti 100 nga oras ti panangasaba iti kada bulan. Ngem pangrugian laeng dayta. Di nagbayag, rimmusing iti pusok ti nasged a tarigagay a mangaramid iti ad-adu pay agpaay iti pannakaitandudo ti pudno a panagdayaw.
Ti Tarigagayko nga Agbalin a Misionera
Idi 1951, naidestino ni Tatang idiay Bideford, North Devon. Di nagbayag kalpasan ti isasangpetmi sadiay, simmarungkar iti kongregasionmi ti misionera a nagserbi idiay Africa kas iti nadakamatko itay. Kalpasanna, ti tarigagayko nga agbalin a misionera ti nangimpluensian iti amin a desisionko. Dagiti mannursuro iti eskuelaan ammoda ti kalatko isu nga inaramidda ti amin tapno upayendak bareng no baliwak ti arapaapko. Ngem iti maudi nga aldaw ti panageskuelak, idi napanak iti opisina dagiti mannursuro tapno agyaman ken agpakada, kastoy ti imbaga ti maysa kadakuada: “Kablaawanka! Sika laeng ti estudiante a talaga nga ammona ti kayatna iti biag. Namnamaenmi a maragpatmo ti kalatmo.”
Di nagbayag, nakasarakak iti trabaho a sumagmamano la nga oras ti busbosek iti dayta, isu nga idi Disiembre 1, 1955, nagbalinak a regular pioneer. Kalpasanna, nagpayunir metten ni Nanang ken dagiti adiek a lallaki. Isu nga iti sumagmamano la a tawen, agserserbikami aminen a sangapamiliaan kas amin-tiempo a ministro.
Panagturong Idiay Ireland
Makatawen kalpasanna, naawisak nga agserbi idiay Ireland. Addang daydin tapno maragpatko ti kalatko nga agbalin a misionera. Idi Pebrero 1957, simmangpetak idiay Cork, makin-abagatan nga Ireland, a kaduak ti dua pay nga agkabannuag a payunir a da June Napier ken Beryl Barker.
Makakarit ti panangasaba idiay Ireland. Napalalo ti ibubusor ti Iglesia Katolika Romana. Sinursuromi no kasano ti aglibas manipud iti pasdek a pagdagdagusanmi, no bilang kellaat a nasken nga aglibaskami. Ilemmengmi idi dagiti bisikletami iti medio pangadaywen, ngem masansan nga adda makasarak kadagitoy sana ukritan dagiti pilid wenno paeppesen dagitoy.
Naminsan, bayat a sarsarungkaranmi ken ni Beryl dagiti residente iti nalawa a kabalbalayan, pinagsasawan ken inubordakami ti maysa a grupo dagiti ubbing. Gapu iti dayta, simrekkami iti maysa a tiendaan ti gatas, a kaariping ti maysa a balay. Adda grupo dagiti managderraaw a nagaaripuno iti ruar. Gapu ta kaay-ayo ni Beryl ti uminum iti gatas, in-inut nga ininumna ti dua wenno tallo a baso a gatas, bayat nga inuraymi ti ipapanaw dagiti managderraaw. Ngem saanda a pimmanaw. Pagammuan ta adda agkabannuag a padi a simrek iti tiendaan. Yantangay impagarupna a turistakami, imbagana a kayatnakami nga ipasiar. Ngem sakbay dayta, inkuyognakami pay laeng iti maysa pay a siled ti balay. Bayat a nagtugawkami a siuulimek sadiay, inlualuanna ti maysa a matmatayen a lakay. Kalpasanna, rimmuarkamin a kadua ti padi. Pimmanaw dagiti managderraaw idi nakitadakami a makiin-innestoria iti padi.
Panageskuela Idiay Gilead
Naikeddeng a maangay iti 1958 ti Divine Will International Assembly idiay New York. Tumabuno ni Tatang, ket kayatko met ngem awan kuartak. Pagammuan ta natay ni lolak ket adda impatawidna kaniak a 100 a pound (wenno agarup ₱10,000). Ti plete nga agpapan agawid iti dayta nga asamblea ket 96 a pound, isu a dagus a gimmatangak iti tiketko iti eroplano.
Di nagbayag kalpasanna, adda pannakabagi ti sanga nga opisina dagiti Saksi ni Jehova idiay Britania a simmarungkar kadakami. Amin nga special pioneer a mapan makiasamblea ket inawisna nga agaplay tapno agsanay kas misionero idiay Watchtower Bible School of Gilead. Kasla imposible! Malaksid kaniak, inikkanna amin ida kadagiti pormas a suratan ken pirmaanda. Ubingak pay unay kano. Kiniddawko nga ikkannak koma sa inlawlawagko a pimmanawakon iti nakayanakak a pagilian ken kinapudnona, kasla misionera ti kasasaadko agsipud ta agserserbiak iti sabali a pagilian. Idi nakitana a porsigidoak, inikkannak iti pormas. Inkararagko a mapatgan koma ti aplikasionko! Nagbiit a dimteng ti subalit, isu a naawisak nga ageskuela iti Gilead.
Napalalo ti ragsakko ta nairamanak iti maika-33 a klase ti Gilead, agraman ti 81 pay a payunir manipud iti 14 a pagilian. Nagbiit a limmabas ti lima a bulan a kurso. Idi agturposkami, impaayannakami ni Kabsat Nathan H. Knorr iti uppat nga oras a makagutugot a palawag. Pinaregtana dagidiay makabael a didan agasawa wenno makiasawa. (1 Corinto 7:37, 38) Ngem kadagidiay kas kadakami a kayatda ti mangasawa wenno makiasawa, insingasingna a mangaramidkami iti listaan dagiti personal a kualipikasion ti maitutop a pakiasawaan. Ngamin, inton adda magustuanmi, masukimatmi ti kinataona babaen ti tulong dayta a listaan.
Adtoy ti karaman iti inaramidko a listaan dagiti kualipikasion ti kayatko a pakiasawaan: Masapul a padak a misionero ken ay-ayatenna ni Jehova, masapul nga ad-adu ti ammona ngem siak no iti kinapudno nga adda iti Biblia, masapul nga agpadakami iti kalat nga agtultuloy iti amin-tiempo a serbisio nga awanan iti annak sakbay ti Armagedon, nalaing nga agsao iti Ingles, ken in-inauna ngem siak. Para kaniak nga agtawen iti 20 ken asideg idin a maidestino iti adayo a pagilian, dakkel ti naitulong kaniak dayta a listaan.
Isasangpet Ditoy Brazil
Nagturposkami idi Domingo, Agosto 2, 1959, ken naipakaammo ti pakaidestinuanmi. Dakami kada Vehanouch Yazedjian, Sarah Greco, Ray ken Inger Hatfield, Sonia Springate, Doreen Hines, ket naidestino ditoy Brazil. Naragsakankami. Pinampanunotko dagiti kabakiran, uleg, kaykayo a maawagan iti rubber tree, ken dagiti katutubo nga Indian. Ngem idi simmangpetak, anian a siddaawko! Imbes nga iti napuskol a kabakiran ti Amazon, maidestinoak gayam idiay Rio de Janeiro, ti napudot ken moderno a siudad a kabesera idi dayta a pagilian.
Ti panagsursuromi nga agsao iti Portugues ti karit nga insigida a nakaipasanguanmi. Iti umuna a bulan, 11 nga oras iti kada aldaw nga inadalmi dayta. Kalpasan ti panangasabami idiay Rio ken temporario a panagnaedmi iti sanga nga opisina dagiti Saksi ni Jehova ditoy, naibaonak iti pagtaengan dagiti misionero idiay Piracicaba, iti Estado ti São Paulo, ken idi agangay iti pagtaengan dagiti misionero idiay Porto Alegre, iti Estado ti Rio Grande do Sul.
Kalpasanna, idi rugrugi ti 1963, naawisak nga agtrabaho iti Departamento ti Panagipatarus iti sanga nga opisina. Ni Floriano Ignez da Conceição, a nangisuro kadakami iti Portugues idi kasangsangpetmi, ti manangaywan iti dayta a departamento. Naammuanna ti kinapudno idi 1944, idi agarup 300 pay laeng dagiti Saksi ditoy Brazil, ket idi agangay, nageskuela iti maika-22 a klase ti Gilead. Maysa nga aldaw, sumagmamano a bulan kalpasanna, kiniddaw ni Kabsat Conceição a saanak pay laeng a pumanaw kalpasan nga aguni ti batingting para iti pangngaldaw ta kayatnak kano a kasarita. Idi damo, madanaganak. Adda kadi basolko? Idi nagunin ti batingting para iti pangngaldaw, dinamagko no ania ti kayatna nga ibaga kaniak. Kas sungbat, sinaludsodna no kayatko ti makikallaysa kenkuana. Diak nakauni. Kiniddawko nga ikkannak iti panawen tapno makapanunotak a naimbag sa nagdardarasak a napan nangaldaw.
Saan a ni Floriano ti kaunaan a kapammatiak a nagarem kaniak. Ngem agingga iti daydi a kanito, awan pay ti nakapasa kadagiti kualipikasion a nailanad iti listaak agpaay iti maitutop a pakiasawaak. Patiek ngamin a ti naisurat iti listaak ti makatulong kaniak tapno saanak nga agkamali iti aramidek a pangngeddeng. Ngem naiduma itan daytoy a kasasaad. Nakapasa ni Floriano iti amin a nailanad iti listaak! Isu a nagkasarkami idi Mayo 15, 1965.
Panangdaer iti Rigat ti Panagsakit
Naragsak ti relasionmi ken ni Floriano kas agassawa, iti laksid dagiti parikut a sinarangetmi. Maysa kadagitoy isu ti parikut ni Floriano iti salun-at, a nangrugi di nagbayag sakbay ti panagkasarmi. Adun a tawen nga adda depekto ti kannigid a barana, ket mariknana itan dagiti epekto dayta isu a nakaro ti panagsagabana. Nagbanaganna, rimmuarkami idiay Bethel ket natudingankami kas special pioneer iti siudad ti Teresópolis, iti kabambantayan ti Estado ti Rio de Janeiro. Ninamnamami a ti klima sadiay ti makatulong kenkuana nga umimbag.
Kalpasan dayta idi Disiembre 1965, naammuak a nakaron ti kanser ni nanangko. Kanayon nga agsinsinnuratkami ngem pito a tawenen a diak nakita ni Nanang. Gapu iti dayta, binayadan ni Nanang ti pletemi a mapan idiay England tapno agkikitakami. Naopera ni Nanang, ngem ti kanser ket saan a naikkat dagiti doktor. Nupay naidalit ken nakaron ti sakitna, kayatna latta ti makipaset iti trabaho a panangasaba. Adda makinilia iti siledna tapno maidiktarna dagiti surat a kayatna nga ipamakinilia. No adda met dagiti sumarungkar kenkuana, kasabaanna biit ida. Natay ni Nanang idi Nobiembre 27, 1966. Iti daydi met la a bulan, sangapulo nga oras ti inreportna a nabusbosna iti trabaho a panangasaba! Intultuloy ni Tatang ti matalek a kinapayunirna agingga iti ipapatayna idi 1979.
Kalpasan ti ipapatay ni Nanang, nagsublikami ken Floriano ditoy Brazil, a nagserbianmi sipud idi naidestinokami iti Estado ti Rio de Janeiro. Idi damo, natudingankami iti trabaho a panagdaliasat iti sirkito iti kabesera ti pagilian, ngem apagbiit laeng dayta a rag-o agsipud ta nagsakit manen iti grabe ni Floriano. Kalpasanna, nagsublikami idiay Teresópolis kas special pioneer.
Idi 1974, kalpasan ti adu a tawen a panagpasarna iti naut-ot a panangagas, inikkat met laengen dagiti doktor ti makinkannigid a bara ni Floriano. Iti dayta a tiempo, saanen a makapagserbi kas mamangulo a manangaywan wenno kas maysa nga special pioneer, ngem kabaelanna ti mangyadal iti Biblia kabayatan dagiti oras nga ipalubos ti ospital a masarungkaran dagiti pasiente. Ti maysa kadagiti inyadalanna iti Biblia iti Ingles ket ni Bob, maysa a retirado nga Americano. Inawat ni Bob ti kinapudno ken nabautisaran idi agangay. In-inut a nakaungar ni Floriano ket sipud idi, agserserbin kas regular pioneer.
Binendisionan ni Jehova ti Ministeriok
Iti panaglabas dagiti tawen, nagtultuloyak nga agserbi kas special pioneer, ket binendisionan ni Jehova ti ministeriok. Idiay Teresópolis, naaddaanak iti naisangsangayan a pribilehio a makatulong iti nasurok nga 60 a tattao a mangidedikar iti biagda ken Jehova. Karaman kadakuada ti maysa a babai nga agnagan iti Jupira, a sinursuruak met nga agbasa. Idi agangay, inyadalak ti walo kadagiti agkabannuag nga annakna. Nagbanaganna, aktibo ita ni Jupira agraman ti nasurok a 20 a miembro ti pamiliana nga agserserbi ken Jehova. Panglakayen ti maysa kadakuada, tallo ti ministerial nga adipen, ken dua ti payunir.
Nasursurok ti agtalinaed a positibo maipapan iti posibilidad nga awaten dagiti tattao ti kinapudno. Naminsan, bayat nga iyad-adalak iti Biblia ti maysa nga agkabannuag a babai nga agnagan iti Alzemira, ni lakayna nga agnagan Antônio ket namutbuteng nga ibulosna ti dua a dadakkel nga asoda no saanak a pumanaw a dagus iti balayda. Kalpasan dayta, manmanon a makasaritak ni Alzemira. Ngem agarup pito a tawen kalpasanna, nakombinsirko met laeng ni Antônio tapno ipalubosna nga iyadalak manen ni baketna. Ngem saanna a kayat a makisaritaak kenkuana maipapan iti Biblia. Nupay kasta, maysa nga aldaw a matutudo, inawisko ni Antônio a makikadua iti panagadalmi. Naduktalak a dina gayam ammo ti agbasa. Sipud idin, ni Floriano ken ti dadduma pay ti nangyadal kenkuana ken sinuruanda nga agbasa. Ita, agpadan a bautisado da Alzemira ken Antônio. Dakkel ti maitultulong ni Antônio iti kongregasion ta adu nga agtutubo ti kuykuyogenna a mangasaba.
Sumagmamano laeng dagitoy kadagiti kapadasanmi kabayatan ti nasurok a 20 a tawen a panagserbimi idiay Teresópolis. Idi rugrugi ti 1988, adda baro a nakaidestinuanmi nga isu ti siudad ti Niterói. Nagserbikami sadiay iti simmaganad a lima a tawen sakbay a nayakarkami idiay Santo Aleixo. Kalpasanna, nayakarkami iti Kongregasion ti Japuíba iti sentro ti kabesera ti pagilian ket naaddaankami iti pribilehio a nangbuangay iti Kongregasion ti Ribeira.
Simple Ngem Makapnek a Biag
Iti panaglabas dagiti tawen, naaddaankami ken Floriano iti pribilehio a timmulong iti nasurok a 300 a tattao a mangidedikar iti biagda ken Jehova. Iti agdama, dadduma kadakuada ti agserserbi iti sanga nga opisina, bayat a payunir, panglakayen, ken ministerial nga adipen ti sabsabali. Anian a yamanko ta us-usarennakami ti Dios, babaen ti nasantuan nga espirituna, a tumulong iti nagadu a tattao!—Marcos 10:29, 30.
Talaga a nakaro ti sakit ni Floriano a nasken a daeranna. Ngem iti laksid ti kasasaadna, kanayon a natibker, naragsak, ken agtalek ken Jehova. Masansan a kunana: “Ti kinaragsak ita ket saan nga agpannuray iti biag nga awanan iti parikut. Agpannuray dayta iti tulong nga ipaay ni Jehova tapno madaerantayo dagiti parikuttayo.”—Salmo 34:19.
Idi 2003, natakuatan nga adda kanser ti makinkannigid a matak. Naopera dayta ket nasukatan iti artipisial a mata a nasken a mamin-adu a madalusan iti kada aldaw. Nupay kasta, pinaraburannak ni Jehova iti kired tapno maitultuloyko ti agserbi kenkuana kas special pioneer.
No maipapan kadagiti material a banag, simple laeng ti panagbiagmi. Nupay kasta, binendisionannak ni Jehova iti nakaidestinuak ken pinabaknangna ti espiritualidadko. Daydi nasao ti maysa a misionera maipapan iti trabaho a panangasaba idiay Africa ket maitutop unay a mangiladawan iti nakaitudinganmi ditoy Brazil. Talaga a sibabaknang a binendisionan ni Jehova ti tarigagayko nga agbalin a misionera!
[Ladawan iti panid 9]
Siak ken ti pamiliak, 1953
[Ladawan iti panid 9]
Panangasaba idiay Ireland, 1957
[Ladawan iti panid 10]
Brazil, 1959, dakami kadagiti padak a misionera. Manipud kannigid: Siak, da Inger Hatfield, Doreen Hines, ken Sonia Springate
[Ladawan iti panid 10]
Dakami ken lakayko