Ti Panangbirok Kadagiti Umiso a Sungbat
Kasano a masaluadak ti salun-atko?
Ania ti aramidek tapno naragragsak ti biag ti pamiliak?
Kasano a masalimetmetak ti trabahok?
NAISALUDSODMO kadin ti aniaman kadagitoy? Adda kadi nakitam nga epektibo a sungbat? Kada tawen, adda maipabpablaak nga agarup 2,000 a libro a mangted iti balakad maipapan kadagiti nagduduma a napateg a topiko. Idiay laeng Britania, tinawen nga umabut iti US$150 milion ti busbusbosen dagiti managbasa a paggatang kadagiti libro a pakasarakan kadagiti balakad no kasano a daeran dagiti parikut iti biag. Idiay Estados Unidos, tinawen nga agarup 600 milion a doliar ti paglakuan kadagiti libro a mangipaay kadagiti balakad. No kasta, saan laeng a sika ti agbirbirok iti nasayaat a balakad maipapan iti inaldaw a panagbiag.
Kastoy ti kinuna ti maysa nga autor maipapan iti balakad a linaon dagitoy a nagadu a publikasion: “Ul-uliten laeng ti adu a baro a libro no ania ti naisuraten.” Kinapudnona, adu kadagiti balakad a masarakan kadagitoy a libro ti basta mangul-ulit iti sirib a nailanad iti maysa kadagiti kadaanan a libro ditoy lubong. Awan duadua a daytoy a libro ti kasaknapan pay laeng ti pannakaiwarasna a publikasion ditoy lubong. Naipatarusen daytoy nga interamente wenno ti dadduma a pasetna iti agarup 2,400 a lenguahe. Agdagup iti nasurok nga 4.6 bilion a kopia ti nayimprentan iti intero a lubong. Daytoy a libro ket awan sabali no di ti Biblia.
Nalawag a kuna ti Biblia: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg.” (2 Timoteo 3:16) Agpayso a saan a naisurat ti Biblia tapno laeng mangbalakad kadatayo. Ti kangrunaan a panggepna ket ti panangipalgak iti pagayatan ti Dios iti sangatauan. Nupay kasta, naglaon ti Biblia iti adu nga impormasion maipapan iti panangrisut kadagiti parikut a kadawyan a mapaspasarantayo amin, ken ikarkarina a dagidiay mangsurot iti panangiwanwanna maammuanda no kasano a magunggonaanda. (Isaias 48:17, 18) Aniaman ti puli, kultura, wenno adal ti maysa a tao, kanayon nga epektibo dagiti praktikal a balakadna no mayaplikar dagitoy. Usigem ti sumaganad nga artikulo tapno maammuam no talaga a praktikal ti balakad ti Biblia maipapan kadagiti topiko a kas iti salun-at, pamilia, ken pagtrabahuan.