Maysa a Libro a Tumulong Kadagiti Agtutubo a Manglaglagip iti Namarsua

“LAGLAGIPEM ti Namarsua kenka ita ta agtutuboka pay,” insurat ti masirib a ni Solomon agarup 3,000 a tawen ti napalabasen. (Ecl. 12:1, Ti Baro a Naimbag a Damag Biblia) Adda sabali pay nga alikamen a tumulong kadagiti Kristiano nga agtutubo a mangaramid iti dayta a balakad. Ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo, Tomo 2, ket nairuar iti “Agpaidalankayo iti Espiritu ti Dios” a Kombension Distrito dagiti Saksi ni Jehova a naangay iti intero a lubong manipud idi Mayo 2008 agingga iti Enero 2009.

Iti likud ti makinsango nga akkub, adda surat ti Bagi a Manarawidwid kadagiti agtutubo. Kuna ti dadduma a pasetna: “Sipapasnek nga ikarkararagmi a ti impormasion iti daytoy a publikasion tulongannaka a mangdaer kadagiti karit ken sulisog a pakaipaspasanguan dagiti agtutubo ita ken ipakitana kenka no kasano ti mangaramid kadagiti desision a maitunos iti pagayatan ti Dios.”

Sigurado a kayat dagiti nagannak a padakkelenda dagiti annakda “iti disiplina ken panangiturong-panunot ni Jehova.” (Efe. 6:4) Ngem bayat ti panagbaro wenno panagbalasangda, adu nga agtutubo ti awanan iti kompiansa iti bagida ken agkasapulanda iti panangiwanwan. No adda anakyo nga agtutubo, kasano a matulonganyo tapno magunggonaan a naan-anay iti daytoy a publikasion? Dagitoy ti sumagmamano a singasing.

▪ Adda koma bukodyo a kopia daytoy a libro ken adalenyo a naimbag. Saan laeng nga agkalikagum dayta iti panangbasa. Paliiwenyo no kasano a nayebkas dagiti ideya. Imbes nga ibagana laeng kadagiti agtutubo no ania ti umiso ken di umiso, ikagumaan ti libro a sanayen ti “pannakabalin ti pannakaawatda.” (Heb. 5:14) Mangted met kadagiti praktikal a singasing no kasano a masalimetmetanda ti umiso. Kas pagarigan, ti Kapitulo 15 (“Kasanok a Masaranget ti Panangpilit Dagiti Kapatadak?”) saanna laeng nga ibaga kadagiti agtutubo nga agkedkedda. Dakamatenna dagiti naibatay iti Biblia a pamuspusan ken realistiko a sungbat a tumulong kadakuada no kasano ti “isusungbat iti tunggal maysa.”​—Col. 4:6.

▪ Usarenyo dagiti benneg ti libro nga agkalikagum iti personal a sungbat. Nupay nairanta dagitoy a benneg para kadagiti agtutubo, apay a diyo sungbatan iti bukodyo a kopia no maitutop?a No usigenyo ti panid 16 ti dua a saludsod nga agkalikagum iti sungbat mainaig iti pannakideyt, kas pagarigan, padasenyo a lagipen no ania ti riknayo idi dakayo ti agtutubo pay ket dayta ti isuratyo iti espasio. Kalpasanna, mabalin nga isaludsodyo: ‘Kasano a nagbalbaliw ti panangmatmatko iti daytoy a banag bayat ti panaglabas ti panawen? Ania dagiti nasursurok iti biag sipud iti kinaagtutubok, ken kasano a maisurok dagita iti anakko?’

▪ Raemenyo dagiti pribado a banag mainaig iti anakyo. Ti benneg ti libro nga agkalikagum iti personal a sungbat ket nadisenio a mangaon iti rikna ti anakyo tapno isurat wenno usigenna dayta. Ti kalatyo ket tapno makitayo ti linaon ti pusona, saan ket a ti librona. Iti panid 3 ti benneg a napauluan iti “Para Kadagiti Nagannak,” isingasing ti libro: “Saanyo a bibiangan ti libro dagiti agtutubo nga annakyo tapno saanda nga agbain a mangisurat iti pudpudno a karirikna ken kapanunotanda. Inton agangay, mabalin nga ibagadanto met laeng kadakayo ti maipapan kadagiti insuratda.”

Katulongan iti Panagadal ti Pamilia iti Biblia

Ti Iyimtuod ti Agtutubo, Tomo 2, ket nagsayaat a katulongan nga usaren iti Panagdaydayaw ti Pamilia. Yantangay saan a naglaon ti libro iti parapo-por-parapo a salsaludsod, kasanoyo nga usaren dayta? Apay a diyo ibagay ti panagadalyo iti pamay-an a makagunggona unay kadagiti annakyo?

Kas pagarigan, mabalin a makaay-ayo iti dadduma a pamilia ti panagensayo no usigenda ti “Dagiti Aramidek no Pilitendak Dagiti Kapatadak” iti panid 132 ken 133. Ti umuna a saludsod ket mabalin a makatulong iti anakyo a mangbigbig iti karit a karigatan para kenkuana. Ti maikadua a saludsod ket tumulong a mangipakita kadagiti situasion a mabalin a pagtaudan ti karit. Kalpasan a mausigyo dagiti resulta ti itutulok wenno panagkedked iti panangpilit dagiti kapatadanda, isaludsodyo iti anakyo no ania ti ibagana a mangayon, mangibaw-ing, wenno mangibalandra iti panangpilit. Tulonganyo ti anakyo a mangpanunot ken mangisagana kadagiti nataktika a sungbat a kabaelanna nga ibaga buyogen ti kompiansa ken determinasion.​—Sal. 119:46.

Katulongan iti Komunikasion

Ti Iyimtuod ti Agtutubo, Tomo 2, paregtaenna dagiti agtutubo a makisarita kadagiti nagannakda. Kas pagarigan, dagiti kahon a “Kasanoak a Makisarita Kada Tatang ken Nanang Maipapan iti Sekso?” (panid 63-64) ken “Makisaritaka Kadagiti Dadakkelmo!” (panid 189) ket mangipaay kadagiti praktikal a singasing no kasano nga isarita dagiti sensitibo a topiko. Insurat ti maysa a balasitang nga agtawen iti 13, “Daytoy a libro ti nangted kaniak iti tured a mangisarita kadagiti nagannakko kadagiti bambanag a pampanunotek​—uray kadagiti bambanag nga inaramidko.”

Iparegta met daytoy a libro ti pannakikomunikar iti sabali pay a wagas. Iti ngudo ti tunggal kapitulo, adda kahon a napauluan iti “Ania ti Makunam?” Saan laeng a pangrepaso dayta. Mabalin met nga usaren dayta ti pamilia kas pagibatayan iti panagsasaritada. Sakbay ti ngudo ti tunggal kapitulo, adda met ti kahon a napauluan iti “Dagiti Aramidek!” Daytoy a kahon ti mangted kadagiti agtutubo iti gundaway a mangisurat kadagiti espesipiko a pamay-an a mayaplikarda ti nasursuroda iti dayta a kapitulo. Ti maudi a paset ti tunggal kahon a “Dagiti Aramidek!” kunana: “Ti kayatko a saludsoden kadagiti dadakkelko maipapan iti daytoy a banag ket . . . ” Makatulong dayta kadagiti agtutubo tapno agpabalakadda kadagiti dadakkelda.

Danonenyo ti Pusoda!

Kas maysa a nagannak, kayatyo a danonen ti puso ti anakyo. Mainaig iti dayta, matulongannakayo ti Iyimtuod ti Agtutubo, Tomo 2. Usigenyo no kasano a ti maysa nga ama ket natulongan daytoy a libro a maaddaan iti naimpusuan a pannakisarita iti balasangna.

“Adda lugar a kaykayatmi a pagpasiaran ken Rebekah. Ti kastoy a panagpasiar ket mangted iti nasayaat a gundaway tapno iyebkasna ti riknana.

“Ti umuna a paset ti libro nga inusigmi ket ti surat ti Bagi a Manarawidwid ken ti ‘Para Kadagiti Nagannak.’ Kayatko a maammuan ti balasangko, a kas nadakamat iti panid 3, mabalinna nga isurat iti librona ti aniaman a kayatna nga iyebkas. Imbagak kenkuana a saanko a kitaen ti aniaman nga isuratna iti dayta.

“Bay-ak a ni Rebekah ti agpili kadagiti kapitulo a kayatna a pagsaritaanmi ken ti kayatna a panagsasaganadda. Ti maysa kadagiti umuna a kapitulo a pinilina ket ti ‘Pagsayaatak Kadi Dagiti Elektroniko nga Ay-ayam?’ Diak impagarup a dayta ti pilienna! Ngem adda rason no apay a dayta ti pinilina. Magusgustuan ti adu a gagayyemna ti agay-ayam iti nakaal-alas a video game. Diak ninamnama ti nakaro a kinaranggas ken dakes a sasao a linaon dayta! Ngem naammuak amin dagitoy bayat a pagsarsaritaanmi ti “Dagiti Aramidek!” iti panid 251. Nakatulong met dayta a kahon tapno maisagana ni Rebekah ti sungbatna no adda asinoman a mangpilit kenkuana nga agay-ayam iti kasta a video game.

“Maibaga kaniak itan ni Rebekah dagiti insuratna iti librona. Narayray ti saritaanmi bayat ti panagadalmi. Agsinnublatkami nga agbasa, ken kayatna a pagsaritaanmi ti aniaman, agraman dagiti ladawan ken kahon. Dayta ti nangted kaniak iti gundaway a mangestoria kenkuana no kasano ti kasasaadko idi addaak iti edadna. Kalpasanna, ibagana met no kasano dagiti kasasaad ita. Saan nga agpangadua a mangestoria iti aniaman!”

No maysakayo a nagannak, sigurado a naragsakankayo idi nairuar daytoy a libro. Adda gundawayyo ita a sieepektibo a mangusar iti dayta. Kayat ti Bagi a Manarawidwid nga agbalin a makagunggona iti pamiliayo daytoy a libro. Sapay koma ta makatulong daytoy iti isuamin​—nangruna kadagiti dungdungnguentayo nga agtutubo​—nga ‘agtultuloy a magna babaen ti espiritu.’​—Gal. 5:16.

[Footnote]

[Kahon iti panid 30]

Ti Kuna ti Dadduma nga Agtutubo

“Daytoy ti kita ti libro a masapul a basaem buyogen ti panangutob ken suratam dagiti espasio nga agkalikagum iti sungbat. Gapu ta nadisenio a kasla diary, mabalin nga usaren daytoy para iti personal a panagmennamenna tapno maannurotmo ti kasayaatan a wagas ti panagbiag.”​—Nicola.

“Adu ti mangpilit kaniak a makideyt, ket nasayaat met ti intension ti dadduma. Ngem ti umuna a seksion ti libro impabigbigna kaniak nga uray ania ti ibaga ti dadduma, saanak pay a nakasagana a makideyt.”​—Katrina.

“Ti kahon a ‘Pampanunotem Kadin ti Agpabautisar?’ tinulongannak nga ad-adda a mangibilang a serioso ti panagpabautisarko. Tinignaynak a mangusig manen iti wagas ti panagadal ken panagkararagko.”​—Ashley.

“Nupay sinursuruandak dagiti Kristiano a nagannakko sipud kinaubingko, tinulongannak daytoy a libro nga agpanunot no ania dagiti addang a masapul nga aramidek iti biagko. Tinulongannak met tapno nalaklakak nga iyebkas kadagiti nagannakko ti riknak.”​—Zamira.

[Ladawan iti panid 31]

Nagannak, adalenyo a naimbag daytoy a libro

[Ladawan iti panid 32]

Ikagumaanyo a danonen ti puso ti anakyo