Surat Manipud Papua New Guinea

Baknad ti Korales iti Kaulepan

ALAS singko idi iti nasalimuot nga agsapa ti Martes idiay Lae, Papua New Guinea (PNG). Agsagsaganakami ken baketko a sumang-at idiay Lengbati, iti Bantay Rawlinson idiay Probinsia ti Morobe tapno bisitaenmi ti maysa a grupo dagiti Saksi ni Jehova.

Nagpaut iti 30 laeng a minuto ti panagbiahemi iti uppat pasaherona nga eroplano a maymaysa ti makinana. Kas gagangay, nagtugawak iti abay ti piloto ket nupay naungor ti makina, nagtungtongkami babaen ti headset intercom. Bayat ti panangitudona kadagiti metro ken instrumento iti sanguananmi, inlawlawagna ti usar dagita sa nagangaw a no adda aniaman a mapasamak kenkuana, siak ti mangpatayab iti eroplano. Dagus a nalagipko ti estoria ti maysa pay nga agdaldaliasat a ministro dagiti Saksi ni Jehova ditoy PNG. Idi naawan ti puot ti piloto iti tangatang, nagrikusrikusda iti tangatang babaen ti autopilot agingga a nagsubli ti puot ti piloto ket nabaelanna a pinagdisso ti eroplano. Naimbag laengen ta naannayas ti biahemi.

Agtaytayabkamin a kapatas dagiti bantay idi kellaat a nagrikuskami a limmasat iti ulep ket linabsanmi ti tuktok ti maysa a bantay, nga agarup 100 a metro laeng ti kangatomi iti bantay. Masungadanmi ti purok ti Lengbati, nga ayan ti kabalbalayan a naaramid kadagiti materiales a naggapu iti bakir ken naatepan iti napuskol a pan-aw. Timman-aw ti piloto iti paglandingan ti eroplano tapno makitana ti kasasaad ti paglandingan ken siguraduenna nga awan dagiti ubbing nga agay-ay-ayam iti soccer. Siniguradona met nga awan dagiti abut a gapuanan dagiti baboy sipud idi naudi nga iyaayna. Idi agsublin, kinunana, “Kasla awan met ti parikut; padasentayo ti aglanding.” Nagrikuskami sakam nagdisso iti ababa a paglandingan nga inaramid dagiti pumurok iti sikigan ti bantay. Nabiit pay a pinarabawan dayta dagiti pumurok kadagiti narumek nga apug a bato a korales a tinebbagda manipud iti asideg a bantay.

Kadagiti napalabas a panagbiahemi ditoy, nakitak dagiti narumek nga apug a bato a korales ket pinampanunotko no kasano kabayagen daytoy a kabambantayan. Panunotem laengen ti kabileg ti puersa a nangiduron iti daytoy a dati a baknad dagiti korales a ginasgasut a kilometro ti kaatiddogna ket ngimmato iti uppat a kilometro manipud iti tukok ti baybay! Idi dimsaagkami iti eroplano, addakamin iti inawagak a baknad dagiti korales iti kaulepan.

Kas gagangay, agtataray dagiti taga bario manipud iti amin a direksion no mangngegda ti aglanding nga eroplano. Idi pinasardeng ti piloto ti makina, maysa a lalaki manipud iti nagaaripuno a tattao ti immasideg iti eroplano. Isu dayta ni Zung, maysa kadagiti lallaki a natudingan a mangaywan iti linawas a programa a panangisuro a maang-angay met iti sangalubongan babaen kadagiti Saksi ni Jehova. Ni Zung ket nalatak iti purokna kas umili nga awan ti bisiona, napudno, ken mapagtalkan. Sigun kenkuana, ti wagas ti panagbiagna ket resulta ti panangyaplikarna kadagiti prinsipio ti Biblia. Kalpasan ti panagkikinnablaaw ken alamano, nagnakami biit a simmalog iti bantay a kaduami ni Zung ken ti dadduma pay a Saksi. Simmurot dagiti ubbing, a sigagagar a nagririkiaranda no siasino ti mangawit kadagiti bagahemi.

Simmangpetkami iti bassit a balay a naaramid iti kayo nga imbangon dagiti lumugar a Saksi para iti agdaldaliasat a ministro nga umay sumarungkar iti kada agarup innem a bulan. Nupay napudot ti klima iti PNG, nakalamlamiis iti ayanmi gapu iti kangatona. In-inut a tumayok dagiti ulep iti kabambantayan manipud iti tanap iti baba bayat ti malem. Isu nga iti rabii, no gangtanmi ti gasera bayat ti kaaddami iti uneg ti balay, masansan a makitak dagiti ulep a sumsumrek kadagiti nagbabaetan dagiti datar a tabla. Makaikawa ti agisuot iti ski jacket ken maong a pagpaimeng idinto ta sumagmamano laeng nga oras sakbayna, kasta unay ti nariknami a kinadagaang bayat ti kaaddami iti kosta.

Idi ngalay ti 1980, maysa a lalaki a pumurok ti nakipagadal iti Biblia kadagiti Saksi ni Jehova idiay Lae. Idi nagsubli iti purokna, maysa a bassit a paggigimongan ti imbangonna ken ti sumagmamano a kakaduana ket naragsakanda unay iti dayta. Kalpasanna, immay ti pastor ti maysa a simbaan dagiti Luterano a kadua dagiti pasurotna ket pinuoranda dayta. Impannakkel dagiti nangpuor a daytoy a lugar ket lugar laeng dagiti Luterano. Sipud idi, iti laksid ti agtultuloy nga ibubusor, nangibangon manen dagiti Saksi iti sabali a paggigimonganda, ket nagtultuloy ti iyaaduda agingga a nagbalin a 50 ti bilang dagiti aktibo a mangikaskasaba iti naimbag a damag. Dadduma kadagiti bumusbusor iti trabaho dagiti Saksi ti sireregta itan a makiramraman a mismo iti dayta a trabaho.

Iti agdama, dagiti pumurok masansan nga abrasaenda dagiti sumarsarungkar a Saksi ni Jehova, a mangisursuro kadakuada iti Biblia. Nupay manmano kadagiti pumurok ti makabasa, kaaduan kadagiti lumugar a Saksi ti nagsursuro nga agbasa tapno mairanudda ti mensahe ti Biblia. Agarup 200 ti tumabtabuno kadagiti gimongda a linawas a maang-angay iti Kingdom Hall.

Awan ti koriente. Iti rabii, agtitiponkami iti aglikmut ti apuy iti paglutuan iti ruar. Agkakaduakami a mangan, agsasarita, ken agkakatawa. Nakadidillaw ti rag-o dagiti agserserbi ken Jehova kas ipakita dagiti naraniag a rupa dagiti gagayyemmi, a masilawan iti lawag ti apuy. Kalpasanna, no medio umadalemen ti rabii, adda mangala iti bombom wenno sumsumged a bulong ti palma, a namnamaenda nga umdas a silawda bayat a tumarayda nga agawid a dumalan kadagiti desdes.

Bayat ti pannagnami nga agsubli iti balay, mariknami a kasta unay ti ulimek ti aglawlaw. Agarin ti uni ti nakaparsuaan. Sakbay ti pannaturogmi, timmangadkami pay naminsan iti naariwanas a langit ket nagsidsiddaawanmi ti kaadu dagiti bituen a nakitami manipud iti nangato a lugar nga ayanmi.

Nagbiit a limmabas ti makalawas, ngem ammomi nga agsublin ti eroplano iti kabigatanna. Maysa laengen a nalamiis a rabii ti panagyanmi iti kaulepan ti Lengbati, ket agsublikaminton iti napudot ken nasalimuot a kosta.