Magunggonaan iti Panangiwanwan ni Jehova iti Kaaldawantayo

NAINSIRIBAN A PILI IDIAY POLAND

“AGTAWENAK iti 15 idi nabautisaranak, ket innem a bulan kalpasanna, nagserbiak nga auxiliary pioneer. Kalpasan ti makatawen, nagaplayak a regular pioneer. Idi nagraduarak iti hayskul, kiniddawko nga agserbiak iti lugar nga addaan iti dakdakkel a panagkasapulan iti agibumbunannag ti Pagarian. Kayatko ti umadayo iti ilimi ken iti lolak a pakipagnanaedak a saan a Saksi ni Jehova. Maladingitanak idi imbaga ti manangaywan iti sirkito a ti teritoriak ket ti ili a nakayanakak! Saanko nga impadlaw ti riknak. Pimmanawak a nakadumog a pampanunotek ti imbagana. Imbagak iti kaduak a nangasaba: ‘Kaslaak sa metten ken Jonas. Ngem idi agangay, napan met laeng ni Jonas idiay Nineve. Agserbiak met ngarud iti nakaibaonak.’

“Uppat a tawenen a payunirak iti ilimi, ket makitak a nagsayaat ti agtulnog iti naipaay a panangiwanwan. Ti negatibo a kababalinko ti problema idi. Ngem ita, maragragsakanakon. Naminsan, naaddaanak iti 24 nga iyad-adalan iti Biblia iti makabulan. Agyamanak ken Jehova ta narugiak pay nga iyadalan iti Biblia ti bumusbusor idi a lolak.”

NARAGSAK A RESULTA IDIAY FIJI

Masapul nga agpili ti maysa nga agad-adal iti Biblia idiay Fiji no agatender iti kombension wenno kuyogenna ni lakayna a mapan iti kasangay ti kabagianna. Immanamong ni lakayna a mabalinna ti agatender iti kombension. Imbagana ken lakayna a sumarunonto kalpasan ti kombension. Ngem idi nagawid kalpasan ti kombension, napanunotna a nasaysayaat no saanna nga ikabil ti bagina iti kasasaad a maikompromiso ti pammatina, isu a saanen a napan.

Idi imbaga ni lakayna kadagiti kabagianna a kiniddaw ni baketna a sumarunonto kalpasan nga immatender iti “gimong dagiti Saksi,” kinuna dagiti kabagianna, “Saan nga umay; saan nga agselselebrar dagiti Saksi ni Jehova iti kasangay!”a

Kas resultana, impannakkel ni lakayna ta intakderanna ti pammatina ken ti konsiensiana. Ti kinamatalekna ket nangted iti gundawayna a mangasaba ken lakayna ken iti dadduma. Nagbanaganna, nakipagadal iti Biblia ni lakayna ket nangrugin a nakigimong a kadua ni baketna.