Itan-okyo ti Inauna nga Anak ni Jehova!
1 Iti Domingo, Nisan 9, 33 K.P., dakkel nga umariwekwek nga adda sangsanga ti palma iti imada ti nangitan-ok iti inauna nga Anak ni Jehova, kas “ti Maysa nga umay kas Ari iti nagan ni Jehova!” (Luc. 19:39; Heb. 1:6) Iti Lunes ken Martes, Nisan 10 ken 11, napasnekan ni Jesus iti publiko a ministeriona, nga inaramidna dagiti maudi nga aldawna a kakapadesan iti naindagaan a biagna.
2 Kadagitoy nga aldaw, ad-adu nga umariwekwek nga addaan piguratibo a sangsanga ti palma ti mangiyikkis: “Ti pannakaisalakan utangtayo iti Diostayo, isu a nakatugaw ti trono, ken iti Kordero.” (Apoc. 7:9, 10) Iti Marso 26, agtataripnongtayo a mangrambak iti Memorial ti ipapatay ni Kristo. Bayat nga umasideg ti petsa, maparubroban kadi ti reggettayo iti ministerio tapno manayonan daytoy sangaglobo a pukkaw ti dayaw?
3 Paaduen ti Aktibidad iti Tay-ak: Adu nga agibumbunannag ti nagpalistan kas auxiliary payunir bayat iti Marso. Kayatyo kadi a kaduaan ida? No kasta, iyawatyon nga awan taktak iti aplikasionyo.
4 Agserbikayo man a kas auxiliary payunir wenno saan, kayatyo a maan-anay ti makiraman iti ministerio bayat ti Marso. Maiyurnos ti kongregasion iti grupo a panangasaba ti kada aldaw bayat iti bulan.
5 Masapul nga iyurnos dagiti amin a kongregasion ti espesial a taripnong sakbay iti panangasaba ti tay-ak iti Sabado, Marso 26. Nupay adu ti isagana a maipaay iti Memorial, mairekomenda a tunggal maysa ket makiraman iti tay-ak ti ministerio iti agsapa ti Sabado. Mainayon iti panagbalaybalay a trabaho, siguruenyo a dagidiay maawis ti Memorial ket adda paglugananda ken ammoda iti oras ken lugar ti taripnong.
6 Awisen ken Paregtaen Dagiti Dadduma: Imbilin ni Jesus kadagiti pasurotna: “Aramidenyo daytoy a panglaglagip kaniak.” (1 Cor. 11:24) Bayat a dagiti napulotan a pasurot iti addang ni Jesus ket tungpalenda dayta a bilin, tunggal adipen ni Jehova ti maawis a tumabuno ken mangrambak iti Memorial. Kanayonanna pay, masapul nga awisenyo dagiti estudiante ti Biblia, kabagian, di pay mamati nga assawa, ken dagiti katrabaho. Ilistayo ida tapno awan ti malipatanyo.
7 Adda pay mainayon a gundaway a mamaregta kadagiti interesado a tattao inton Memorial a mismo. Siguruenyo ti nasapa a sumangpet tapno makablaawanyo dagiti agdadamo a tumabuno iti umuna a daras. No adu dagiti estudianteyo ti Biblia a tumabuno, praktikal no adda sabali nga agibumbunannag a makikatugaw kadakuada bayat iti gimong. Awisenyo dagiti agdadamo nga agsubli iti Domingo, Marso 27, a dumngeg iti regular a Miting Publiko.
8 Inton ngudo ti rambak iti Memorial, bayat nga idanggay ti timektayo iti kanta 105, “Itan-oktay Inauna nga Anak ni Jehova!” mabalintayo a taliawen a buyogen ti pannakapnek iti naregta a bulan ti teokratiko nga aktibidad iti dayaw ni Jehova!