Dagiti Nabagas a Taripnong Sakbay ti Panangasaba
1 Iti Lucas 10:1-11, adda rekord iti taripnong ni Jesus kadagiti 70 a disipulo tapno isaganana ida iti tay-ak ti serbisio. Nangted ti instruksion a nangorganisar kadakuada, nga agsagana no ania ti sawenda, ken makilangen kadagiti narikut a kasasaad. Makaadaltayo babaen ti panangusig iti salaysay.
2 Nabatad nga amin dagiti 70 a disipulo ket presenteda a nakitaripnong ken Jesus. Nawadwad nga oras ti masayang kadagiti taripnong no dagiti dadduma ket nairuamda a maudi. Ti naladaw a sangpetda ti masansan a mangbaliw manen iti urnos ti grupo ken dagiti naituding a teritoria. Daytoy ti mangtaktak iti intero a grupo.
3 Nangted ni Jesus iti masinunuo a topiko a mausar, awan sabali, “ti pagarian ti Dios.” (Luc. 10:9) Natudingantayo a mangikasaba iti isu met laeng a mensahe, ket masansan a patgentayo dagiti singasing no ania ti sawen. Mabalin nga usaren ti konduktor iti Panakirinnason a libro, nga addaan ti nasurok a 40 nga introduksion a mabalin nga usaren. Ti maysa a repaso iti maysa wenno dua kadagitoy ti makatulong kadatayo nga agsao a sitatalek kadagiti ruangan.
4 Saan laeng nga imbaga ni Jesus kadagiti disipulona no ania ti sawenda ngem imbagana pay no kasano iti panagsaoda. (Luc. 10:5, 6) Maiparang kadatayo dagiti demostrasion iti Gimong ti Serbisio iti kada lawas no kasano a maiyebkas ti bagbagitayo a sieepektibo. Mabalin nga irepaso ti konduktor no ania ti naiparang iti kallabes a gimong. Ti maysa nga ababa a demostrasion iti nalaka a parang ti tumulong kadatayo a manggupgop iti panunot tapno maisawangtayo dagita a sasao.
5 Inwardas met ni Jesus dagiti disipulona maipapan ti personal a kondukta. (Luc. 10:7, 8) Mabalin met ti konduktor nga ited dagiti natadem a direksion a tumulong kadatayo a mangliklik iti aniaman a makasinga iti trabahotayo. Mabalin a pakdaarannatayo a maikontra iti panagu-urnong iti suli ti maysa a kalsada wenno panagperdi ti oras a makisuppiat iti maysa a bumusbusor. Palagipannatayo a mangidulin iti umiso nga house-to-house record. Nalabit a mapalagipan dagiti nagannak iti naannad a panangaywan kadagiti annakda.
6 Dagiti 70 a disipulo ket nakitunosda iti instruksion ni Jesus ket kalpasanna “nagsublida nga addaan rag-o.” (Luc. 10:17) No ipangag iti panangiturong a maawat kadagiti taripnong sakbay ti panangasaba, namnamaentayo met ti mapaadu a rag-o iti panangikasaba ti damag iti Pagarian.—Ara. 13:48, 49, 52.