Saludsod

◼ Ania a panagannad ti kasapulan no trabahuentayo dagiti napeggad a teritoria?

¹ Kumarkaro, makangngegtayo kadagiti damag ti riribuk, panagsaed, ken kinagulo ti kagimongan, nangruna kadagiti siudad. Nupay maseknantayo, ammotayo nga uray kadagiti lugar ti riribuk, adda dagiti napudno a tattao a mangipangag iti mensahe ti Pagarian. Gapuna a kasapulantay ti agtured, nga agtalektayo iti pannarabay ni Jehova.​—Prov. 29:25; 1 Tes. 2:2.

² No mapantayo kadagiti lugar a napeggad, namnamaen ni Jehova nga agannadtayo ken usaren ti nasayaat a pangngeddeng. Agalertotayo. “Manakem a tao ti makakita iti peggad ket aglemmeng, ngem ti nanengneng aglayon latta ket agsagaba iti dusa.” (Prov. 22:3) Patgen dagiti adda padasnan nga agibumbunannag a nainsiriban ti panagkuyog nga agtrabaho dagiti dua wenno uray grupo dagiti sumagmamano nga agibumbunannag, no kasapulan. (Ecl. 4:9, 12) Masansan a biroken dagiti kriminal dagidiay agmaymaysa ta nalakada a mabiktima.

³ Naannadkayo koma a mangawat iti awis a sumrek iti balay wenno apartment. Dikay makisubang kadagidiay agminar a manangkelga wenno nakarit. Ipabigbigyo koma a dagus ti bagiyo kas maysa kadagiti Saksi ni Jehova. Dadduma nga agibumbunannag ti kanayon a nakaiggem iti Biblia wenno Pagwanawanan wenno Agriingkayo! kas pakabigbigan.

⁴ Siputanyo dagidiay agpalpallailang iti lugar. Dikay agaruat kadagiti nangina nga alahas. No masapul a rummuarkayo iti rabii, liklikanyo ti magna kadagiti nasipnget a kalsada a bassit ti matagtagitao. No ma-hold up kayo, dikay lumablaban no kuarta wenno sanikuayo laeng ti kayatda; ti biagyo ket napatpateg nga adayo ngem ti material a sanikuayo.​—Mar. 8:36.

⁵ Masapul nga agalerto dagiti kakabsat a lallaki a mangidadaulo, a wanawananda dagiti agibumbunannag iti teritoria. Kasayaatan no masangsangkamaysa ti grupo iti maysa a disso tapno kanayonda nga agaassideg. No adda gulo a tumaud iti sangakaarrubaan, masapul a madagdagus a pumanaw ti grupo iti teritoria.

⁶ No naalibtak ken naannadtayo, maitultuloytay a madanon uray dagidiay “agsaibbek ken agsangit gapu kadagiti amin a makarimon a bambanag a maar-aramid” nga adda iti napeggad a lugar.​—Ezeq. 9:4.