Saludsod

◼ Nakasaganakay kadi iti emerhensia?

Kadagitoy a tiempo, ti “panawen ken di mapakpakadaan a pasamak” masansan a mangpataud iti medikal nga emerhensia. (Ecl. 9:11, NW) Tapno sigurado a nakasaganatayo iti kasta a posible a mapasamak, mangipapaay ni Jehova iti tulong babaen ti organisasionna, ngem namnamaenna nga aramidentay ti pasettayo. Adda ditoy baba ti listaan a tumulong kadakayo.

• Itugotyo a kanayon ti agdama nga Advance Medical Directive/Release card.

• Siguraduenyo nga itugtugot dagiti annakyo ti agdama nga Identity Card-da.

• Repasuenyo ti suplemento ti Enero 1993 a Ministeriotayo iti Pagarian, nga ensaywenyo no kasano ti makirinnason kadagiti doktor maipapan iti pannakaagas ti anakyo.

• Repasuenyo dagiti artikulo maipapan kadagiti sangkap ken pangsandi iti dara. (Maisingasing: Ti Pagwanawanan, Oktubre 1, 1994, panid 31; Hunio 1, 1990, panid 30-1; Marso 1, 1989, panid 30-1; Agriingkayo!, Disiembre 8, 1994, panid 23-7; Agosto 8, 1993, panid 22-5; Nobiembre 22, 1991, panid 10; ken dagiti suplemento Ti Ministeriotayo iti Pagarian, Enero 1993 ken Pebrero 1991. Idulinyo dagita iti folder a masindadaan nga alaen.)

• Ikeddengyo a naimbag no ipalubosyo ti pannakausar dagiti makina a mamagrikus iti dara iti ruar ti bagi wenno no mabalinyo nga awaten dagiti produkto a naglaon kadagiti sangkap ti dara.

• Sakbay a mapankayo iti ospital, no mabalin, maammuan koma dagiti panglakayen tapno matulongandakayo ken makapagpatulongda iti Hospital Liaison Committee (HLC) no kasapulan.

Ibatadyo a Pagkedkedanyo ti Dara: Ipakita dagiti report nga adda sumagmamano a kakabsat a dida ibaga a dagus kadagiti doktor a dida kayat ti dara. Saan a nasayaat daytoy kadagiti mangngagas ket mabalin a dayta ti mangisagmak kadakayo a mayalisonan. No ammo dagiti doktor ti kombiksionyo ken masuportaran dagiti tarigagayyo babaen kadagiti napirmaan a dokumento a mangdakamat kadagiti espesipiko a pammilinyo, tulonganna ida nga agtignay a dagus ken masansan a mangted kadakuada kadagiti kanayonan a pagpilian iti panangagas a di agusar iti dara.

Yantangay mabalin a mapasamak ti medikal nga emerhensia iti aniaman a kanito, ken masansan nga iti tiempo a diyo ninamnama, agtignaykayo itan a mangsaluad iti bagiyo ken kadagiti annakyo manipud iti pannakayalison iti dara.​—Prov. 16:20; 22:3.