Saludsod
◼ No awisen ti ispiker dagiti agdengdengngeg a mangkita kadagiti teksto kabayatan ti palawagna, apay a makagunggona no aramidenda dayta?
Ti kaadu dagiti teksto a mabalin nga iyawis a kitaen dagiti agdengdengngeg ket depende iti tema a mailawlawag ken no kasapulan iti dayta a palawag ti bersikulo por bersikulo a panangusig iti paset ti Sao ti Dios.
Napateg a laglagipen a ti maysa a panggep ti panangkita kadagiti teksto ket tapno mapasingkedan a naggapu iti Biblia ti maipalpalawag. (Ara. 17:11) Ti maysa pay a panggep ket tapno masukimat ti Nainkasuratan nga ebidensia a pangsuporta iti maipalpalawag tapno mapabileg ti pammati ti amin. Ad-adda a maimula dayta iti panunot dagiti agdengdengngeg no makitada ti aktual a kunaen ti Biblia bayat a maibasa ti napateg a teksto. Malaksid pay iti panangkita kadagiti teksto, makagunggona ti panaginotar ken panangsurot iti pannakailawlawag dagiti ideya.
Nupay mabalin nga adu a teksto iti Kasuratan ti nadakamat iti balabala nga impaay ti Sosiedad a mausar iti panangbukel iti maysa a tema, dagitoy ket para iti agpalawag, a tumulong kenkuana a mangisagana. Mabalin a mangipaay dagita iti kanayonan nga impormasion ken tumulong kenkuana a mangtarus a naan-anay kadagiti napateg a Nainkasuratan a prinsipio ken iti pakabuklan ti tema. Ammuen ti agpalawag no ania dagiti teksto a nasken iti pannakasangal ti palawag sa awisenna dagiti agdengdengngeg a mangsurot kenkuana bayat a maibasa ken mailawlawag dagita. Mabalin a dakamaten ti ispiker ken ibagana ti anag dagiti dadduma a teksto a pangsuporta iti material, ngem kadagita a gundaway, saan a maikalikagum a kitaen dagiti agdengdengngeg dagita a teksto.
No ibasa ti agpalawag dagiti napili a teksto, basaenna dagita a direkta iti Biblia, saan ket nga iti papel a naikompiuter. No awisen ti ispiker dagiti agdengdengngeg a makipagbasa, dakamatenna a silalawag ti libro ti Biblia, kapitulo, ken bersikulo. Maaddaan dagiti agdengdengngeg iti tiempo a mangbirok iti teksto no sumardeng biit sa mangpataud iti saludsod wenno komentuanna iti ababa no apay a maibasa dayta a teksto. Ti panangulit iti teksto tulonganna met dagiti agdengdengngeg a manglagip iti dayta. Nupay kasta, saan a maikalikagum a dakamaten ti panid, tangay saan nga agpapada dagitoy, depende iti edision ti Biblia nga us-usaren ti dadduma kadagiti agdengdengngeg. No kitaen dagiti agdengdengngeg dagiti teksto nga iyawis ti ispiker a basaenda, magunggonaanda iti bileg ti Sao ti Dios bayat a mailawlawag dayta iti diskurso.—Heb. 4:12.