Sirarag-o a Naikaykaysa ken ni Jehova ken iti Anakna
Marambakan Inton Marso 28 ti Kapatgan nga Okasion iti Tawen
1 Babaen ti panangrambak iti Pangrabii ti Apo kalpasan ti ilelennek ti init inton Marso 28, 2002, maipakitatayo a sirarag-o a naikaykaysatayo ken ni Jehova a Dios ken ni Jesu-Kristo. Iti dayta naisangsangayan unay nga okasion, tagiragsaken ti natda kadagiti napulotan a Kristiano ti naisangsangayan a “pannakiraman” kadagiti padada a makipagtawid iti Pagarian, iti Ama, ken iti Anakna. (1 Juan 1:3; Efe. 1:11, 12) Minilion iti “sabsabali a karnero” ti mangmennamenna iti naisangsangayan a pribilehioda a maikaykaysa ken ni Jehova ken iti Anakna, a nangikaykaysaanda iti puso ken panunotda iti panangitungpal iti trabaho ti Dios!—Juan 10:16.
2 Sisisinged nga Agtrabaho a Sangsangkamaysa: Kanayon a sirarag-o nga agkaykaysa da Jehova ken Jesus. Nasinged nga agkaduadan iti di mabilang a panawen sakbay ti pannakaparsua ti tao. (Mik. 5:2) Nadungngoda iti maysa ken maysa. Kas personipikasion ti sirib, maibaga daytoy inauna nga Anak sakbay a nagbalin a tao: ‘Siak daydiay pakaay-ayatan unay [ni Jehova] iti inaldaw, yantangay maragragsakanak iti sanguananna iti isuamin a tiempo.’ (Prov. 8:30) Dakkel ti epektona iti Anak ti Dios ti di mabilang a panawen a nasinged a pannakitimpuyogna iti Gubuayan ti ayat!—1 Juan 4:8.
3 Yantangay sipapanunot a kasapulan ti tao ti pannakasubbot, pinili ni Jehova ti bugbugtong nga Anakna, a kasta unay ti ayatna kadagiti tattao, kas pangsubbot a daton, a nanglukat iti kakaisuna a namnamatayo. (Prov. 8:31) No kasano nga agkaykaysa ni Jehova ken ti Anakna iti panangitungpal iti maymaysa a panggep, agtalinaedtayo met a naikaykaysa kadakuada ken iti maysa ken maysa buyogen ti singgalut ti nasged nga ayat, a sirarag-o nga aramidentayo ti pagayatan ti Dios.
4 Panangipakita iti Naayat nga Apresasiontayo: Babaen ti itatabuno iti Memorial ken siraraem a panagimdeng a naimbag, maipakitatayo ti napasnek nga apresasiontayo agpadpada iti panagayat ni Jehova ken panagsakripisio ti Anakna para kadatayo. Maitampok ti naayat nga ulidan ni Jesus, ti panagmatalekna agingga ken patay tapno maipaayna ti subbot, ken ti panagturayna kas Ari iti naipasdeken a Pagarian ti Dios, agraman dagiti bendision nga iyeg ti Pagarian iti sangatauan. Mapalagipantayo met a masapul nga ipakitatayo ti agtultuloy a pammati, a sireregta nga agtrabaho maitunos iti pagayatan ni Jehova kas “katrabahuan iti kinapudno.”—3 Juan 8; Sant. 2:17.
5 Tulongan ti Sabsabali a Makiraman Kadatayo: Nangnangruna koma a pagreggetan dagiti panglakayen a paregtaen dagiti amin a di aktibo a Saksi iti teritoria tapno tumabunoda iti Panglaglagip ti ipapatay ni Kristo. (Mat. 18:12, 13) Ilistayo dagiti masapul a masarungkaran tapno awan ti maliwayan ken personal a maawisda amin.
6 Adda kadi dagiti am-ammoyo a mabalin a tumabuno iti Memorial? Pagreggetanyo a patanoren ti apresasionda iti daytoy nga okasion. Sibabara nga awisenyo ida, ken ipariknayo a napategda. Aramidentayo koma ti amin a kabaelantayo nga iyawis daytoy kapatgan nga okasion ti tawen kadagiti amin nga iyad-adalantayo iti Biblia ken dadduma nga interesado a tattao, agraman dagiti miembro ti pamilia ken am-ammotayo. Dagiti gunggona ti subbot ket mabalin pay a tagiragsaken ti amin a mangadal iti “pateg ti pannakaammo ken Kristo Jesus.” (Fil. 3:8) Dagiti mangalagad iti pammati iti daton ni Kristo magun-odda ti nabileg a namnama a biag nga agnanayon.—Juan 3:16.
7 Diyo pulos tagilag-anen ti maaramidan ti Memorial kadagiti napasnek a tattao. Dua a tawen ti napalabas iti isla a pagilian ti Papua New Guinea, 11 nga interesado a tattao ti 17 nga oras a naglayag babaen ti bassit a barangay iti nadawel a baybay tapno makatabunoda. Apay? Kinunada: “Kayatmi a rambakan ti Memorial ni Kristo a kadua dagiti pada nga agdaydayaw ken Jehova; isu nga inkagumaanmi ti nagdaliasat.” Panunotenyo ti regta nga impakita dagidiay nga interesado ken ti apresasionda iti naragsak a pannakaikaykaysada ken Jehova, iti Anakna, ken iti Nakristianuan a panagkakabsat!
8 Itukonyo ti panagadal iti Biblia iti amin nga interesado. Paregtaenyo ida a tumabuno a regular kadagiti gimong ti kongregasion ken iranudda iti sabsabali dagiti kinapudno a maad-adalda. Tulonganyo ida a ‘magna iti lawag’ ken ‘mangannurot iti kinapudno’ babaen ti panangyaplikar kadagiti prinsipio ti Biblia iti biagda. (1 Juan 1:6, 7) Tulonganyo ida a mangpatanor iti nasinged a relasion ken ni Jehova ken agtultuloy a rumang-ay iti panangipateg iti pribilehio a sangsangkamaysa a mangaramid iti pagayatanna.
9 Anian a naisangsangayan a pribilehio ti sirarag-o a maikaykaysa “iti maymaysa nga espiritu, agraman iti maymaysa a kararua nga umag-agawa nga agdadanggay a maipaay iti pammati iti naimbag a damag”! (Fil. 1:27, 28) Padaanantayo ti nakaay-ayat a timpuyogtayo iti Memorial inton Marso 28, a kanayon nga agyamyaman ken ni Jehova ken iti Anakna!—Luc. 22:19.