Penkenyo ti Naespirituan a Kasapulanyo
1 Ti umad-adani a “Dagiti Naregta a Manangiwaragawag iti Pagarian” a Kombension Distrito ipaayannatayo iti nasayaat a gundaway a mangpennek iti naespirituan a kasapulantayo. Kas iti nasustansia a material a taraon, sigurado a makapasalun-at iti espiritualidadtayo ti programa babaen ti “sasao ti pammati.” (1 Tim. 4:6) Ad-adda nga iyadaninatayo ken ni Jehova. Ken manamnamatayo a makaawattayo iti balakad ken pammaregta a tumulong kadatayo a mangdaer kadagiti pakasuotan iti biag. Impasigurado kadatayo ni Jehova: “Pagbalinenkanto nga addaan iti pannakatarus ket isuroka iti dalan a rebbeng a papanam. Mangipaayakto iti balakad a ti matak situturong kenka.” (Sal. 32:8) Anian a naparaburantayo gapu ta siaayat nga iwanwanwanna ti biagtayo! Usigentayo ti sumagmamano a praktikal a banag a mabalintayo nga aramiden tapno ad-adda a magunggonaantayo iti programa ti kombension.
2 Masapul nga Isaganatayo ti Pusotayo: Responsabilidad ti tunggal maysa kadatayo a saluadan ti piguratibo a pusona. (Prov. 4:23) Kalikaguman daytoy ti panangdisiplina ken panagbalin a napudno iti bagitayo. Ti kombension ket tiempo ti panangutob iti relasiontayo ken ni Jehova, tiempo ti ‘panangsukimat iti perpekto a linteg a kukua ti wayawaya.’ Tapno maisaganatayo ti pusotayo nga ‘umawat iti pannakaimula ti sao,’ nasken a kiddawentayo a sukimatennatayo ni Jehova, a kitaenna ti aniaman a “nasaem a dana” a masapul nga ilinteg, ken iturongnatayo “iti dalan ti tiempo a di nakedngan.”—Sant. 1:21, 25; Sal. 139:23, 24.
3 Agimdeng ken Agmennamenna: Kinomendaran ni Jesus ni Maria gapu iti panagimdengna a naimbag iti sasaona, a kunkunana: “Pinili ni Maria ti naimbag a bingay, ket saanto a maikkat kenkuana dayta.” (Luc. 10:39, 42) No kasta ti kababalintayo, ditay ipalubos dagiti babassit a banag a mangsinga kadatayo. Siguraduentayo a nakatugaw ken atentibotayo iti intero a programa. Liklikantayo dagiti saan a nesesita a panagsasarita wenno panagpagnapagna ken kitaentayo a ditay masinga ti dadduma babaen dagiti cellular phone, pager, camera, ken camcorder.
4 No agimdengtayo kadagiti palawag, nasayaat no aginotartayo iti ababa tapno masurotantayo ti pannakailawlawag ti suheto. Masapul nga inaigtayo ti nangngegtayo iti datin nga ammotayo. Daytoy ti tumulong kadatayo a mangtarus ken manglagip iti material. No repasuentayo dagiti nainotartayo, aramidentayo koma dayta gapu ta kayattayo nga iyaplikar ti material. Nasayaat no iyimtuod ti tunggal maysa kadatayo: ‘Ania ti epekto daytoy iti relasionko ken ni Jehova? Aniada a panagbalbaliw ti masapul nga aramidek iti biagko? Kasano a mayaplikarko daytoy nga impormasion iti pannakilangenko kadagiti dadduma? Kasano a mausarko iti ministeriok?’ Isarita kadagiti dadduma dagiti punto a nangnangruna a magustuantayo. No aramidentayo dagita, matulongandatayo a mangtaginayon kadagiti sasao ni Jehova ‘iti tengnga ti pusotayo.’—Prov. 4:20, 21.
5 Iyaplikartayo Dagiti Naadaltayo: Kalpasan a timmabuno iti kombension distrito, kinuna ti maysa a delegado: “Makatukay iti puso ti programa. Tignayenna ti maysa a mangsukimat iti kasasaad ti pusona ken dagiti kameng ti pamiliana, ken mangipaay iti kasapulan a naayat a Nainkasuratan a tulong. Tinulongannak nga agbalin nga ad-adda a silalagip iti obligasionko a mangipaay iti dakdakkel a suporta iti kongregasion.” Mabalin a kasta ti narikna ti adu kadatayo. Ngem saan nga umdas nga agawidtayo manipud kombension a naparegta ken nagin-awaan. Kinuna ni Jesus: “No ammoyo dagitoy a banag, naragsakkayo no aramidenyo ida.” (Juan 13:17) Masapul nga ikagumaantayo nga iyaplikar dagiti punto a maiparbeng kadatayo a personal. (Fil. 4:9) Daytoy ti tulbek tapno naan-anay a mapennektayo ti naespirituan a kasapulantayo.
[Kahon iti panid 5]
Utobenyo ti Nangngegyo:
■ Ania ti epektona iti relasionko ken ni Jehova?
■ Kasano nga impluensiaanna ti pannakilangenko kadagiti dadduma?
■ Kasano a mayaplikarko iti biagko ken iti ministeriok?