Espesial a Kampania iti Oktubre 16–Nobiembre 12!
1 “Asidegen nga Agpatingga ti Palso a Relihion!” Dayta ti paulo ti Kingdom News No. 37, a maiwarasto iti intero a lubong a mangrugi inton sumaruno a bulan. Iti umuna a dua a lawas ti Oktubre, itukontayo dagiti magasin a Pagwanawanan ken Agriingkayo! Mangrugi iti Lunes, Oktubre 16, agingga iti Domingo, Nobiembre 12, makiramantayo iti nasaknap a panagiwaras iti Kingdom News No. 37. Kadagiti ngudo ti lawas bayat ti kampania, itukontayo ti polieto agraman dagiti kabaruan a magasin.
2 No Siasino Dagiti Mabalin a Makiraman: Mabalin a makiraman a naan-anay dagiti amin nga aktibo a mangibumbunannag iti naimbag a damag. Adda met dagidiay makapag-auxiliary pioneer. Adda kadi annak wenno iyad-adalanyo iti Biblia a rumangrang-ay iti naespirituan? Kaduaenyo ida a makiuman kadagiti panglakayen tapno maammuan no kualipikadodan nga agbalin kas di-bautisado nga agibumbunannag. Dagiti panglakayen kasaritada koma dagiti di aktibo nga agibumbunannag tapno paregtaen ida a makiraman, a nalabit ipakuyogda ida kadagiti aduan kapadasan nga agibumbunannag.
3 Ti suplay ti Kingdom News No. 37 ket maipatulod kadagiti amin a kongregasion tapno makaala dagiti agibumbunannag ken payunir iti 50 a kopia. No dagiti dadduma nga agibumbunannag saanda a kabaelan nga iwaras ti 50 a kopia, mabalin nga alaen dagiti regular pioneer ti aniaman a sobra. Dagiti interesado ngem saan pay nga agibumbunannag mabalinda ti mangala iti lima a kopia nga iwarasda kadagiti kameng ti pamilia ken gagayyemda. Iti likud ti pagreportan (report slip), masapul nga isurat dagiti amin nga agibumbunannag ken payunir no mano ti naipaimada a polieto iti ngudo ti Oktubre ken Nobiembre. Bilangen ti sekretario no mano ti dagup a naipaima ti kongregasion sa ipatulodna dayta iti sanga nga opisina iti ngudo ti tunggal bulan. No adda mabati a Kingdom News kalpasan ti kampania, mabalin nga usaren dayta iti aniaman a benneg ti ministerio.
4 No Ania ti Ibaga: Ababa koma ti presentasionyo tapno ad-adu ti mawarasanyo. Mabalinyo nga ibaga: “Kas panagserbi iti publiko, makiramramanak iti sangalubongan a panangiwaras iti daytoy napateg a mensahe. Daytoy ti libre a kopiayo. Pangngaasiyo ta basaenyo.” Mabalin a nasayaat no saankayo a mangitugot iti bag iti panagbalaybalayyo. Diyo koma liplipatan nga isurat dagiti amin a masarakanyo nga interesado.
5 No Kasanoyo a Wanasen ti Teritoriayo: Imbes nga iti lansangan ti pagiwarasanyo iti Kingdom News, ipamaysayo ti mangasaba iti binalaybalay ken iti lugar ti negosio aginggat’ mabalin. Isuratyo dagiti pagtaengan nga awan dagiti bumalayna, ken ikagumaanyo ti agsubli iti sabali a tiempo wenno aldaw ti lawas. Mangrugi iti Lunes, Nobiembre 6, mabalinen nga ibati dagiti kopia kadagiti pagtaengan nga awan dagiti bumalayna. Nupay kasta, no saan a kabaelan ti kongregasion a wanasen ti amin a teritoriana kabayatan ti naituding a panawen ti kampania, mabalin nga ikeddeng dagiti panglakayen nga ibati ti Kingdom News kadagiti pagtaengan nga awan dagiti bumalayna bayat ti intero a kampania.
6 Umas-asidegen ti pannakadadael ti “Babilonia a Dakkel.” Dagiti tattao masapul a rummuarda iti dayta sakbay a naan-anay a madadael. (Apoc. 14:8; 18:8) Iplanoyo itan ti makiraman a naan-anay iti daytoy sangalubongan a kampania tapno maipakaammoyo kadagiti amin nga asidegen nga agpatingga ti palso a relihion!