Kabaelanyo ti Mangasaba iti Di Pormal a Pamay-an!
1. (a) Ania ti di pormal a panangasaba? (b) Mano kadatayo nga adda ditoy ita ti damo a nakaammo iti kinapudno babaen ti di pormal a panangasaba?
1 Mano ti kakongregasionyo a nakaammo iti kinapudno babaen ti di pormal a panangasaba? Nalabit masdaawkayo a makaammo iti sungbat. Ti di pormal a panangasaba ramanenna ti panangiranud iti naimbag a damag kadagiti tattao a makapulapoltayo iti inaldaw—no agbibiahetayo, no sumarungkartayo kadagiti kabagian wenno kaarrubatayo, wenno no aggatgatangtayo, kasta met no addatayo iti eskuelaan, pagtrabahuan, ken dadduma pay. Iti maysa a grupo ti nasurok a 200 a bautisado a Saksi, 40 porsiento kadakuada ti damo a nakasabaan iti di pormal. Gapuna, epektibo unay daytoy a pamay-an ti panangasaba.
2. Iti Kasuratan, ania dagiti mabasatayo nga ehemplo iti di pormal a panangasaba?
2 Dagiti ebanghelisador idi umuna a siglo ket masansan a mangaskasaba iti di pormal. Kas pagarigan, idi limmabas ni Jesus iti Samaria, nakasabaanna ti babai nga agsaksakdo iti bubon ni Jacob. (Juan 4:6-26) Inrugi ni Felipe ti makisarita iti Etiope nga opisial ti korte a mangbasbasa iti libro nga insurat ni Isaias babaen ti panangisaludsodna: “Ammom kadi nga agpayso no ania ti basbasaem?” (Ara. 8:26-38) Idi naibalud ni apostol Pablo idiay Filipos, kinasabaanna ti parabantay iti pagbaludan. (Ara. 16:23-34) Idi agangay, bayat a nakapupok ni Pablo iti balay, ‘siaayat nga inawatna amin dagidiay umay kenkuana, nga inkaskasabana kadakuada ti pagarian ti Dios ken insursurona ti bambanag maipapan ken Apo Jesu-Kristo.’ (Ara. 28:30, 31) Kabaelanyo met ti mangasaba iti di pormal, uray no managbabainkayo. Kasano?
3. Ania ti makatulong kadatayo a mangparmek iti kinamanagbabain?
3 Panangirugi: Marigatan ti adu kadatayo a mangirugi iti saritaan kadagiti ditay am-ammo. Uray kadagiti am-ammotayo, mabalin a mabaintayo latta a mangiranud kadakuada iti kinapudno. Ngem tumuredtayo a makisarita kadakuada no utobentayo ti kinaimbag ni Jehova, dagiti naespirituan a gameng nga intedna kadagiti adipenna, ken ti nakaay-ay-ay a kasasaad dagiti tattao iti lubong. (Jon. 4:11; Sal. 40:5; Mat. 13:52) Malaksid iti dayta, mabalintayo ti agpatulong ken Jehova tapno ‘makaurnongtayo iti tured.’ (1 Tes. 2:2) Kinuna ti maysa nga estudiante iti Gilead: “Kanayon a napaneknekak a makatulong ti panagkararag no marigatanak a makisarita kadagiti tattao.” No medio bumdengkayo nga agsao, agkararagkayo iti apagbiit ken naulimek.—Neh. 2:4.
4. Ania a kalat ti mabalin nga irugitayo, ken apay?
4 Kas ipasimudaag ti termino a di pormal a panangasaba, saan a kasapulan nga irugi ti saritaan iti pormal a pannakisarita wenno panangibasa iti teksto. Mabalin a makatulong no ti kalattayo ket panangirugi laeng iti saritaan, a ditay pampanunoten a mangasabatayo a dagus. Kuna ti adu nga agibumbunannag a ti panangaramidda iti daytoy ti nangted kadakuada iti tured a kasapulanda iti panangiruangan iti naimbag a damag. No saan a kayat ti tao ti makisarita, saantayo a piliten a kasarita. Sidadayaw nga ingudotayon ti saritaan.
5. Ania ti nakatulong iti maysa a managbabain a kabsat a mangasaba iti di pormal?
5 Bayat nga aggatgatang ti maysa a managbabain a kabsat a babai, urayenna nga adda kumita kenkuana sana iseman. No umisem met ti inisemanna, kasaritana iti apagbiit. No nasayaat ti sungbat dayta a tao, tumureden ti kabsat a makisarita pay. Denggenna a naimbag ti ibagbaga ti kasarsaritana tapno maammuanna no ania nga aspeto ti naimbag a damag ti mabalin a paginteresanna. Babaen daytoy a pamay-an, adu a literatura ti naipaima ti kabsat ken nakairugi pay iti panangyadal iti Biblia.
6. Kasanotayo a mairugi ti saritaan iti di pormal a pamay-an?
6 Panangiruangan iti Saritaan: Ania ti mabalintayo nga ibaga kas panangiruangan iti saritaan? Idi nakisarita ni Jesus iti babai idiay bubon, inrugina ti saritaan babaen laeng ti panagkiddawna iti mainum. (Juan 4:7) Isu a nalabit mairugitayo ti saritaan babaen ti nainggayyeman a kablaaw wenno saludsod. Bayat nga agsarsaritakayo, mabalin a makabirokkayo iti gundaway a mangiruangan iti Nainkasuratan a kapanunotan ken nalabit makaimulakayo iti bin-i ti kinapudno. (Ecl. 11:6) Adda dagidiay nagballigi iti daytoy babaen ti panangibagada kadagiti makapainteres a sasao a manggutugot kadagiti tattao nga agsaludsod. Kas pagarigan, bayat nga addakayo iti siled a pagurayan iti doktor, mabalinyo nga irugi ti saritaan babaen ti panangikunayo, “Nagragsak ket ngatan inton dumteng ti tiempo a saanakton nga agsakit.”
7. Kasano a ti panagbalin a managpaliiw ket makatulong iti panangasaba iti di pormal?
7 Makatulong met iti panangirugi iti saritaan no managpaliiwtayo. No adda makitatayo a nagannak a nasisingpet ti annakna, mabalin a komendarantayo ti nagannak sa isaludsodtayo, “Kasano ti panangisuroyo kadakuada?” Inimdengan ti maysa a kabsat a babai ti topiko a pagsasaritaan dagiti katrabahuanna sa nangiranud kadagiti espesipiko nga impormasion maibatay iti paginteresanda. Idi naammuanna nga agpalplano a makiasawa ti maysa a katrabahuanna, inikkanna iti Agriingkayo! a nakailawlawagan iti no kasano ti mangiplano iti kasar. Daytoy ti nangilukat iti gundaway para iti kanayonan a panagsarita mainaig iti Biblia.
8. Kasanotayo a mausar dagiti literaturatayo a mangirugi iti saritaan?
8 Ti sabali pay a pamay-an a panangirugi iti saritaan ket babaen ti panagbasa kadagiti literaturatayo iti lugar a makitadatayo dagiti sabsabali. Ti maysa a kabsat a lalaki ukradenna Ti Pagwanawanan wenno Agriingkayo! iti artikulo a makapainteres ti paulona sa siuulimek a basaenna dayta. No adda mapaliiwna a mangtaltaldiap iti magasin, agsaludsod wenno mangipaay iti ababa a komento maipapan iti artikulo. Masansan a makairugi iti saritaan ken makakasaba babaen ti kastoy a pamay-an. Uray ti panangikabil laeng iti maysa kadagiti publikasiontayo iti lugar a nalaka a makita ket mabalin a mangawis met iti interes dagiti katrabahuan wenno kaeskuelaanyo ken matignayda nga agsaludsod maipapan iti dayta.
9, 10. (a) Kasanotayo a makabirok kadagiti gundaway a mangasaba iti di pormal? (b) Kasanoyo a maaramid dayta?
9 Mangbirok iti Gundaway: Gapu iti kinaganat ti trabaho a panangasaba, rumbeng a ditay panunoten a ti di pormal a panangasaba ket mairana laeng. Imbes ketdi, mangbiroktayo iti gundaway a mangipaay iti panangsaksi bayat nga aramidentayo dagiti inaldaw nga aktibidadtayo. Panunotenyo a nasaksakbay dagiti tattao a mabalin a makapulapolyo, ken no kasanokayo a makairugi iti nainggayyeman a saritaan. Mangitugotkayo iti bassit a Biblia kasta met iti literatura a mabalinyo nga ited kadagidiay mangipakita iti interes.—1 Ped. 3:15.
10 Babaen ti panagbalin a manangipamuspusan, adu nga agibumbunannag ti nakabirok kadagiti gundaway a mangasaba iti di pormal. Ti maysa a kabsat a babai nga agnanaed iti apartment a nainget ti pannakabantayna ket mapan agur-urnos kadagiti jigsaw puzzle iti lugar a paglinglingayan iti pasilidad. Napipintas a buya ti nakaparsuaan ti mabukel kadagita. No adda dagiti mangapresiar iti kinapintas ti buya dayta, gundawayanna ti mangirugi iti saritaan sa ibagana kadakuada ti kari ti Biblia maipapan iti “maysa a baro a langit ken maysa a baro a daga.” (Apoc. 21:1-4) Adda kadi mapanunotyo a sabali pay a pamay-an a makabiroktayo kadagiti gundaway a mangasaba iti di pormal?
11. Kasanotayo a masurnadan ti interes dagiti nakasabaantayo iti di pormal?
11 Panangsurnad iti Interes: No adda dumngeg kadakayo, ikagumaanyo a surnadan ti interesna. No maitutop, mabalinyo nga ibaga kenkuana: “Maragsakanak a nakisarita kenka. Mabalin kadi a maammuan ti adres ken numero ti teleponom tapno makapagsaritatanto manen?” Ti dadduma nga agibumbunannag itedda laeng ti adres ken numero ti teleponoda kadagiti makasaritada sa kunada: “Makaparagsak ti panagsaritata. No kayatmo a maammuan ti ad-adu pay maipapan iti napagsaritaanta, mabalinnak a kontaken.” No saanyo a masarungkaran dagiti interesado, suratanyo ti porma a Please Follow Up (S-43) sa itedyo a dagus dayta iti sekretario ti kongregasionyo tapno ti kongregasion a makinteritoria iti pagnanaedanda ti mapan mangsarungkar kadakuada.
12. (a) Apay nga isurattayo ti oras a mabusbostayo iti panangasaba iti di pormal? (b) Ania dagiti resulta ti panangasaba iti di pormal? (Kitaen ti kahon a “Nasayaat ti Resulta ti Di Pormal a Panangasaba!”)
12 Masapul nga ireporttayo ti oras a nabusbostayo a nangasaba iti di pormal. Gapuna, diyo liplipatan nga isurat dayta uray no sumagmamano a minuto laeng ti nabusbosyo iti tunggal aldaw. Panunotenyo daytoy: No ti tunggal agibumbunannag ket makakasaba iti di pormal iti lima a minuto iti inaldaw, agdagup iti nasurok a 17 milion ti mapagtitipon nga orasda iti binulan!
13. Ania ti rumbeng a mangtignay kadatayo a mangasaba iti di pormal?
13 Awanen ti nasaysayaat pay a panggapuantayo a mangasaba iti di pormal no di ti ayattayo iti Dios ken kadagiti padatayo a tattao. (Mat. 22:37-39) Ti puso a napnuan iti apresasion kadagiti kualidad ken panggep ni Jehova ti mangtignay kadatayo a mangisarsarita iti “dayag ti kinangayed ti kinaarina.” (Sal. 145:7, 10-12) Ti napasnek a pannakaseknan kadagiti padatayo a tao ti manggutugot kadatayo a mangaprobetsar iti tunggal maitutop a gundaway a mangiranud iti naimbag a damag bayat nga adda pay tiempo. (Roma 10:13, 14) No agsagana ken agpanunottayo a nasaksakbay, kabaelantayo amin ti mangasaba iti di pormal ken nalabit mapasarantayo ti rag-o nga itden ti panangiruangan iti kinapudno iti maysa a tao a napudno ti panagpuspusona.
[Blurb iti panid 4]
Mabalin a makatulong ti panangaramid iti kalat a makiam-ammo ken mangirugi laeng iti saritaan kadagiti tattao
[Blurb iti panid 5]
Babaen ti panagbalin a manangipamuspusan, adu nga agibumbunannag ti nakabirok kadagiti gundaway a mangasaba iti di pormal
[Kahon iti panid 5]
Dagiti Singasing iti Panangirugi iti Saritaan
◼ Agkararagka tapno dumawat iti tulong
◼ Piliem a kasarita dagiti madlawmo a mannakigayyem ken saan nga agap-apura
◼ Kumitaka iti mata, agisemka, ken mangdakamatka iti banag a paginteresanyo a dua
◼ Dumngegka a naimbag
[Kahon iti panid 6]
Nasayaat ti Resulta ti Di Pormal a Panangasaba!
• Bayat nga agpatpatarimaan iti luganna iti talyer, kinasabaan ti kabsat a lalaki dagiti adda sadiay. Inikkanna ida iti handbill sa inawisna ida a tumabuno iti palawag publiko. Iti maysa a kombension kalpasan ti makatawen, adda dina mairupaan a kabsat a lalaki a sibabara a nangkablaaw kenkuana. Isu ket maysa kadagiti lallaki idiay talyer nga inikkanna iti handbill makatawenen ti napalabas! Tinabunuanna ti palawag publiko ket nagkiddaw a mayadalan iti Biblia. Agpadada ken baketna a bautisado itan.
• Ti maysa a kabsat a babai a nakaammo iti kinapudno babaen ti di pormal a panangasaba imbilangna kas espesial a teritoriana dagiti tattao a maam-ammona gapu kadagiti tallo nga annakna. Karaman iti teritoriana dagiti kaarruba ken dagiti nagannak a naam-ammona idiay eskuelaan ken kadagiti miting dagiti nagannak. Tunggal iyam-ammona ti bagina, mangdakamat iti simple ngem naimpusuan a sasao a ti Biblia ket dakkel ti maitultulongna kenkuana a mangpadakkel kadagiti annakna sa sabaliannan ti topiko. Gapu ta nairuginan ti saritaan, nalaklakanan nga iserrek ti Biblia iti saritaan. Babaen iti daytoy a pamay-an, 12 a tattao ti natulongannan nga agpabautisar.
• Ti maysa a kabsat a babai ginundawayanna a kasabaan ti ahente ti insurance a nangsarungkar kenkuana. Insaludsodna iti ahente no kayatna ti garantisado a nasayaat a salun-at, kinaragsak, ken agnanayon a biag. “Wen,” ti sungbat ti ahente ken sinaludsodna no ania nga insurance dayta. Impakita ti kabsat dagiti kari ti Biblia ken intukonna ti maysa kadagiti publikasiontayo ket agpatnag a binasa dayta ti ahente. Isu ket nayadalan iti Biblia, timmabuno kadagiti gimong sa nabautisaran idi agangay.
• Kinasarita ti kabsat a babai ti kaabayna iti eroplano ket ginundawayanna a kinasabaan. Idi dandanin aglanding ti eroplano, inted ti kabsat ti adres ken numero ti teleponona ken imparegtana iti babai nga agpayadal iti Biblia inton adda sumarungkar kenkuana a Saksi ni Jehova. Iti met laeng simmaganad nga aldaw, adda dua a Saksi a simmarungkar iti babai. Isu ket nayadalan iti Biblia, napartak ti panagrang-ayna iti naespirituan, nabautisaran, ket di nagbayag, adda met tallo nga iyad-adalannan.
• Ti maysa a bulsek a kabsat a lalaki nga agtawen iti 100 ket agnanaed iti nursing home. Masansan nga ibagbagana, “Kasapulantayo ti Pagarian.” Gapu iti daytoy, nagsaludsod dagiti nars ken pasiente ket inlawlawagna no ania ti Pagarian. Sinaludsod ti maysa kadagiti babbai nga agtartrabaho sadiay no anianto ti aramiden ti kabsat idiay Paraiso. Kinuna ti lakay, “Makakita ken makapagnaakto manen ket puorakto daytoy wheelchair-ko.” Gapu ta saan a makakita, kiniddawna iti babai nga ibasaanna kadagiti magasin. Idi simmarungkar ti anak ti kabsat, impakada ti babai no mabalinna nga iyawid dagiti magasin. Kinuna ti maysa a nars iti anak ti kabsat, “Ti baro a temami itan ditoy nursing home ket: ‘Kasapulantayo ti Pagarian.’”
• Ti kabsat a babai a nakalinia iti restawran nangngegna ti maysa a grupo dagiti lallakay a nakatugaw iti asideg a pagsasaritaanda ti maipapan iti politika. Kinuna ti maysa kadagiti lallakay a saan a kabaelan ti gobierno a risuten dagiti parikuttayo. Kinuna ti kabsat iti un-unegna, ‘Gundawayko daytoyen.’ Nagkararag iti apagbiit sa inasitganna ida. Idi nayam-ammona ti bagina, imbagana kadakuada ti maipapan iti Gobierno ti Dios, ti gobierno a mangrisut kadagiti problema ti sangatauan sa inikkanna ida iti broshur nga intugotna. Pagammuan ta immasideg ti manedyer. Impagarup ti kabsat no isu ket papanawen ti manedyer. Ngem kinuna ti manedyer a dengdenggenna ti saritaanda ket kayatna met ti mangala iti broshur. Ti maysa nga empleado a dumdumngeg met ket aglulua nga immasideg. Mayad-adalan gayam idi iti Biblia ket kayatna nga ituloy ti panagadalna.