Panangparang-ay iti Abilidadtayo iti Ministerio—Panangaramid iti Rekord

“Itultuloymo nga asikasuen ti bagim ken ti isursurom.” (1 Tim. 4:16) Daytoy a naipaltiing a balakad ni Pablo ken ni Timoteo ipasimudaagna a rumbeng nga ikagumaantayo ti rumang-ay kas ebanghelisador, agdadamotayo man wenno aduan kapadasan. Tapno maaramidtayo dayta, adda baro a serye Ti Ministeriotayo iti Pagarian a napauluan iti “Panangparang-ay iti Abilidadtayo iti Ministerio.” Ilawlawag ti tunggal artikulo ti gagangay, ngem napateg, nga abilidad ken mangipaay iti sumagmamano a singasing. Kabayatan ti bulan, maiparegta iti amin nga ipakatda dayta nga abilidad. Inton agngudo ti bulan, adda paset iti Gimong ti Serbisio a mangted kadatayo iti gundaway nga agkomento no kasanotayo a nagunggonaan ken mangisalaysay kadagiti kapadasan. Iti daytoy a bulan, parang-ayentayo ti abilidadtayo iti panangaramid iti rekord.

No Apay a Napateg: Tapno maitungpaltayo ti annongentayo, saantay laeng a basta mangasaba. Masapul a subliantayo dagiti interesado ken suruantayo ida, a sibugantayo ti bin-i ti kinapudno nga immulatayo. (Mat. 28:19, 20; 1 Cor. 3:6-9) Kayatna a sawen a sarungkarantayo dayta a tao, kasaritatayo maipapan kadagiti pakaseknanna, ken ituloytayo ti napagsaritaantayo idi damo. Gapuna, no adda masarakantayo nga interesado, napateg nga irekordtayo dayta.