Iwaragawagyo a Sireregta ti Kinapudno Maipapan ken Jesus

Rumayray ti regtatayo no ammotayo no kasano nga iranud ti kinapudno maipapan ken Jesus. Ni Jesus ti pamuon a bato a pasuli a nakaibangonan ti pudno a pammati. (Efe. 2:20) No awan ni Jesus, awan ti namnamatayo a maaddaan iti biag nga agnanayon. (Ara. 4:12) Gapuna, napateg a bigbigentayo ti akem ni Jesus iti panggep ti Dios. Adu ti naallilaw kadagiti di nainkasuratan a doktrina. Nakalkaldaang ta mabalin a maikapisda kadagiti bendision nga inkari ti Sao ti Dios kadagidiay mangipakita iti pammati ken Jesus. Ti kinaregtatayo iti kinapudno tignayennatay a tumulong kadagiti napudno ti panagpuspusona a tattao a maaddaan iti umiso a pannakaawat maipapan ken Jesus, ti relasionna iti Dios, ken ti akemna iti panggep ti Dios. Iti daytoy a panawen ti Memorial, sireregta kadi nga iwaragawagmo ti kinapudno maipapan ken Jesus?