Dagiti Reperensia iti Workbook iti Gimong a Panagbiag ken Ministerio
NOBIEMBRE 4-10
GAMENG MANIPUD ITI SAO TI DIOS | 1 JUAN 1-5
“Diyo Ayaten ti Lubong Wenno Uray Dagiti Bambanag iti Lubong”
(1 Juan 2:15, 16) Diyo ayaten ti lubong wenno uray dagiti bambanag iti lubong. No adda asinoman nga agayat iti lubong, awan kenkuana ti ayat ti Ama. 16 Ta amin a banag iti lubong—ti tarigagay ti lasag ken ti tarigagay dagiti mata ken ti panangiparammag iti sanikua a pagbiag ti maysa—ket saan nga agtaud iti Ama, no di ket iti lubong.
Surotem ti Pagtuladan nga Impasdek ni Jesus
13 Mabalin nga ibaga ti dadduma a saan nga amin iti lubong ket dakes. Kaskasdi, ti lubong ken dagiti pangawisna nalakada la a singaen ti panagserbitayo ken ni Jehova. Ken awan ti aniaman kadagiti ituktukon ti lubong ti mangyadani kadatayo iti Dios. Gapuna, agpegpeggadtayo no masursurotayo nga ayaten dagiti bambanag iti lubong, uray ti bambanagna a mabalin a saan met a dakes. (1 Timoteo 6:9, 10) Talaga nga adu ti kinadakes iti lubong a mabalin a mangtulaw kadatayo. No agbuybuyatayo kadagiti pelikula wenno programa iti telebision a mangitampok iti kinaranggas, materialismo, wenno seksual nga imoralidad, mabalin a maay-ayotayto kadagita—sa kalpasanna agbalindanto a makagargari. No makitimpuyogtayo kadagiti tattao a ti kangrunaan a kalatda ket pasayaaten ti estilo ti panagbiagda wenno negosio la ti ammoda, mabalin a dagita a banag ti agbalinto met a kapatgan kadatayo.—Mateo 6:24; 1 Corinto 15:33.
(1 Juan 2:17) Kanayonanna, ti lubong ket aglabas agraman ti tarigagayna. Ngem daydiay agaramid iti pagayatan ti Dios ket agtalinaed iti agnanayon.
Usigem no Ania a Kita ti Tao ti Rebbeng a Pagbalinam
18 Ti sabali pay a makatulong tapno maidiantayo ti “bambanag nga adda iti lubong” ket ti pananglaglagip iti naipaltiing a sasao ni Juan: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.” (1 Juan 2:17) Nupay agparang a kasla permanente ken natalged ti sistema ni Satanas, dumtengto ti aldaw nga agpatingga. Awan ti aniaman a permanente a maipaay ti lubong ni Satanas. No laglagipentayo dayta, saantayto a maallukoy kadagiti pangallilaw ti Diablo.
Panagkali iti Naespirituan a Gameng
(1 Juan 2:7, 8) Patpatgek a kakabsat, saan a baro a bilin ti isursuratko kadakayo no di ket ti daan a bilin nga addan kadakayo manipud idi damo. Daytoy daan a bilin ket ti sao a nangngegyo. 8 Ngem baro a bilin ti isursuratko kadakayo, ti bilin a sinurotna ken sinurotyo, ta lumablabasen ti kinasipnget ken agsilsilnagen ti pudno a lawag.
Dagiti Pammalagip ni Jehova ket Mapagpiaran
14 Naglaon ti Kristiano a Griego a Kasuratan iti nakaad-adu a pammalagip maipapan iti panangipakita iti ayat iti maysa ken maysa. Kinuna ni Jesus a ti maikadua a kadakkelan a bilin ket, “Ayatem ti padam a tao a kas iti bagim.” (Mat. 22:39) Ti kabsat ni Jesus iti ina a ni Santiago inawaganna met ti ayat kas ti “naarian a linteg.” (Sant. 2:8) Insurat ni apostol Juan: “Dungdungnguen, isursuratko kadakayo, saan a ti maysa a baro a bilin, no di ket ti maysa a daan a bilin nga adda kadakayon nanipud idi damo.” (1 Juan 2:7, 8) Ania ti tuktukoyen ni Juan a “daan a bilin”? Tuktukoyenna ti bilin a mainaig iti ayat. Makuna a “daan” ta inted dayta ni Jesus “idi damo,” sumagmamano a dekada idin ti napalabas. Ngem “baro” met dayta ta naawagan iti managsakripisio nga ayat, ti kita ti ayat a kasapulan dagiti adalan bayat a sanguenda dagiti baro a kasasaad. Kas ad-adalan ni Kristo, ditay kadi pagyamanan dagiti pakdaar a mangsaluad kadatayo tapno saantay nga agbalin a managimbubukodan a kas ti kaaduan iti daytoy a lubong, iti kasta saan a lumamiis ti ayattayo iti padatayo a tao?
(1 Juan 5:16, 17) No makita ti asinoman a ti kabsatna ket agar-aramid iti basol a saan nga agturong ken patay, ikararaganna tapno ikkan ti Dios iti biag, wen, kadagidiay agar-aramid iti basol a saan nga agturong ken patay. Adda basol a talaga nga agturong ken patay. Maipapan iti dayta a basol ti ibagbagak a dina ikararagan. 17 Amin a kinakillo ket basol, ngem adda basol a saan nga agturong ken patay.
Pammakawan
Umiso nga ikararag ti pammakawan ti Dios maipagapu iti sabsabali, uray pay maipaay iti intero a kongregasion. Kasta ti inaramid ni Moises mainaig iti nasion ti Israel, nga impudnona ti basol ti nasion ken dimmawat iti pannakapakawan, ket isu dinengngeg ni Jehova buyogen ti pananganamong. (Nu 14:19, 20) Kasta met, iti pannakaidedikar ti templo, ni Solomon inkararagna ken Jehova a pakawanenna koma ti ilina no agbasolda ket kalpasanna tallikudanda ti dakes a danada. (1Ar 8:30, 33-40, 46-52) Nagtignay ni Esdras kas pannakabagi iti sipapanayag a panangipudno iti basbasol dagiti napagsubli a Judio. Kas imbunga ti naimpusuan a kararag ken pammagbagana, nagtignay dagiti umili tapno awatenda ti pammakawan ni Jehova. (Esd 9:13–10:4, 10-19, 44) Pinaregta ni Santiago daydiay masaksakit iti naespirituan nga ayabanna dagiti lallakay iti kongregasion tapno isu ikararaganda, ket “no nakaaramid kadagiti basol, mapakawanto dayta kenkuana.” (San 5:14-16) Nupay kasta, adda “basol nga agbanag iti ipapatay,” ti basol maibusor iti nasantuan nga espiritu, maysa nga inggagara a panangyugali iti basol, a gapu iti dayta awanen ti pannakapakawan. Ti maysa a Kristiano rumbeng a saanna nga ikararagan dagidiay agbasbasol iti kastoy a pamay-an.—1Jn 5:16; Mt 12:31; Heb 10:26, 27; kitaenyo ti BASOL; ESPIRITU.
Panagbasa iti Biblia
(1 Juan 1:1–2:6) Agsursuratkami kadakayo maipapan iti daydiay addan sipud idi un-unana, a nangipakaammo iti sao a mangted iti biag, a nangngeg, nakita, naimatanganmi, ken nasagid dagiti imami. 2 (Wen, naiparangarang ti biag, ket nakita ken saksaksian ken ipakpakaammomi kadakayo ti biag nga agnanayon nga adda idi iti Ama ken naiparangarang kadakami). 3 Ipakpakaammomi kadakayo daydiay nakita ken nangngegmi, tapno agkakaduatayo a kas iti pannakaikaykaysatayo iti Ama ken iti Anakna a ni Jesu-Kristo. 4 Isursuratmi dagitoy tapno makompleto ti rag-otayo. 5 Daytoy ti mensahe a nangngegmi kenkuana ken ipadpadamagmi kadakayo: Ti Dios ket lawag ken awan a pulos ti sipnget kenkuana. 6 No ibagatayo: “Kaduatayo isuna,” ngem magmagnatayo met iti kinasipnget, agul-ulbodtayo ken saantayo a sursuroten ti kinapudno. 7 Ngem no magmagnatayo iti lawag gapu ta isu ti pagtataudan ti lawag, agkakaduatayo, ket ti dara ni Jesus nga Anakna ti mangdalus kadatayo iti amin a basol. 8 No ibagbagatayo, “Awan ti basoltayo,” loklokuentayo ti bagitayo ket awan kadatayo ti kinapudno. 9 No ipudnotayo dagiti basoltayo, isu ket matalek ken nalinteg tapno pakawanennatayo kadagiti basoltayo ken dalusannatayo iti amin a kinakillo. 10 No ibagbagatayo, “Saantayo a nagbasol,” pagbalbalinentayo isuna a naulbod, ket awan kadatayo ti saona.
2 Ay-ayatek nga annak, isursuratko kadakayo dagitoy tapno dikay agbasol. Ngem no adda asinoman nga agbasol, addaantayo iti katulongan a kadua ti Ama, ni Jesu-Kristo, daydiay nalinteg. 2 Isu ti pakikappia a daton para kadagiti basoltayo, ngem saan laeng a kadagiti basoltayo no di ket kadagiti basol ti tattao iti intero a lubong. 3 Ket no itultuloytayo a tungpalen dagiti bilinna, nalawag a naam-ammotayon isuna. 4 Daydiay mangibagbaga: “Naam-ammokon isuna,” ngem dina tungtungpalen dagiti bilinna, isu ket ulbod, ket awan ti kinapudno iti dayta a tao. 5 Ngem asinoman a mangtungpal iti saona, nalawag a talaga nga ay-ayatenna ti Dios. Babaen iti dayta, ammotayo a naikaykaysatayo kenkuana. 6 Daydiay mangibaga nga isu ket agtalinaed a naikaykaysa kenkuana ket obligado nga agtultuloy a magna a kas iti pannagna idi ni Jesus.
NOBIEMBRE 11-17
GAMENG MANIPUD ITI SAO TI DIOS | 2 JUAN 1–JUDAS
“Masapul nga Ikagumaantayo ti Agtalinaed iti Kinapudno”
(Judas 3) Patpatgek a kakabsat, nupay inaramidko ti amin a kabaelak nga agsurat kadakayo maipapan iti pannakaisalakantayo amin, nakitak a masapul a suratankayo tapno paregtaenkayo nga ikagumaanyo nga idepensa ti pammatiyo a namimpinsan a naited kadagiti nasantuan.
“Itultuloyyo a Gun-oden ti Pannakabalin iti Apo”
8 Saantayo nga ignorante kadagiti gakat ni Satanas gapu ta ipalgak ti Kasuratan dagiti kangrunaan a taktikana. (2 Corinto 2:11) No maipapan iti nalinteg a tao a ni Job, inusar ti Diablo ti nakaro a rigat ti panagbiag, ipapatay dagiti ing-ingungoten, panangbusor dagiti kapamilia, sakit, ken awan pakaibatayanna a pammabasol dagiti ulbod a gagayyem. Naldaangan ni Job ken impapanna nga isu ket binaybay-an ti Dios. (Job 10:1, 2) Nupay nalabit a saan a ni Satanas ti direkta a makinggapuanan kadagiti parikuttayo ita, adu a Kristiano ti apektado kadagiti kasta a pakarigatan, ket mabalin a gundawayan dagita ti Diablo.
9 Agraira ti naespirituan a peggad iti daytoy tiempo ti panungpalan. Agbibiagtayo iti lubong nga ad-adda a maipatpateg dagiti material a kalat ngem kadagiti naespirituan a kalat. Masansan nga iladawan ti media a mangyeg iti ragsak ti seksual nga imoralidad imbes a mangyeg iti saem. Ken kaaduan a tattao ti nagbalin a “managayat iti ragragsak imbes a managayat iti Dios.” (2 Timoteo 3:1-5) Ti kasta a kababalin pagpeggadenna ti kinatimbengtayo iti naespirituan malaksid no ‘makidangadangtayo a sipipinget maipaay iti pammati.’—Judas 3.
Panagkali iti Naespirituan a Gameng
(Judas 4) Adda ngamin nakastrek a tattao iti tengngayo a nabayagen a naikeddeng iti Kasuratan a maukom; dakesda a tattao a pagpambarda ti nagpaiduma a kinaimbag ti Dios para iti nakaal-alas a kababalinda ken saanda a matalek iti kakaisuna a makinkukua kadatayo ken Apotayo, ni Jesu-Kristo.
(Judas 12) Dagitoy dagiti bato a nailemmeng iti uneg ti danum kadagiti panagsasangoyo iti panganan bayat a makipangpanganda kadakayo, papastor nga awanan buteng a mangpakpakan iti bagida; kas iti ulep nga itayab ti angin ngem saan nga agtudo; kas kadagiti kayo nga awanan bunga iti nasapa a tudo, a namindua a natay ken naparut;
it-2 598
Pagdadayaan iti Ayat
Saan nga ilawlawag ti Biblia no ania dagitoy a pagdadayaan iti ayat wenno no kasano kasansan a naangay dagita. (Jud 12) Saan nga imbilin dagita ni Apo Jesu-Kristo wenno dagiti apostolna, ken nalawag a saan a matmatan nga inkapilitan wenno manayon. Kuna ti sumagmamano a dagita ket bangkete nga inyurnos dagiti Kristiano a nabaknang iti material, nga iti dayta inawisda dagiti napapanglaw a kapammatianda. Dagiti awanan ama nga ubbing, dagiti balo, dagiti nabaknang, ken dagiti nakurapay sangsangkamaysada a nagsasango iti nalabon a lamisaan buyogen ti espiritu ti panagkakabsat.
it-1 405
Bato
Ti sabali pay a Griego a sao, spi·lasʹ, nabatad a tumukoy iti maysa a bato wenno baknad a nakalemmeng iti uneg ti danum. Inusar dayta ni Judas a mangiladawan iti sumagmamano a lallaki a di nadnadlaw a nakastrek iti kongregasion Kristiano nga addaanda kadagiti dakes a motibo. No kasano a dagiti nakalemmeng a bato ket mamagpeggad kadagiti barko, kasta met a dagitoy a lallaki naibilangda a pudpudno a peggad iti sabsabali iti kongregasion. Kunaenna maipapan iti kasta a lallaki: “Dagitoy dagiti bato a nailemmeng iti uneg ti danum kadagiti pagdadayaanyo iti ayat bayat a makidaydayada kadakayo.”—Jud 12.
(Judas 14, 15) Wen, daydiay maikapito a tao manipud ken Adan, ni Enoc, impadtona met maipapan kadakuada: “Immay ni Jehova a kaduana ti pinullo a ribu a nasantuan nga anghelna 15 tapno ukomenna ti amin a tattao, ken tapno sentensiaanna ti amin a dakes a tao gapu iti amin a dakes nga aramidda ken iti amin a makapakigtot a banag nga imbaga dagiti managbasol maibusor kenkuana.”
“Naay-ayona a Naan-anay ti Dios”
Ania ti impadto ni Enoc? Isu daytoy: “Adtoy! Immay ni Jehova a kaduana ti nasantuan a linaklaksana, tapno mangipakat iti panangukom maibusor iti isuamin, ken tapno ipaneknekna a nakabasol dagiti amin a di nadiosan maipapan iti amin a di nadiosan nga ar-aramidda nga inaramidda iti di nadiosan a pamay-an, ken maipapan iti amin a makapakigtot a bambanag a sinao dagiti di nadiosan a managbasol maibusor kenkuana.” (Judas 14, 15) Mabalin a ti umuna a mapaliiwmo ket nagsao ni Enoc a kasla napasamaken dayta, a kas man la inaramiden ti Dios ti naibaga iti padto. Kasta ti estilo ti adu a padto kalpasan dayta. Apay? Ibagbaga ti propeta ti banag a sigurado a mapasamak isu a mabalin a mailadawan dayta iti pamay-an a kasla napasamaken!—Isaias 46:10.
“Naay-ayona a Naan-anay ti Dios”
Gapu iti pammati ni Enoc, matignaytayo a mangisaludsod iti bagitayo no kitkitaentayo met la ti lubong ita a kas iti panangkita ti Dios. Agaplikar pay laeng iti lubong ita ti panangukom a situtured nga impakaammo ni Enoc iti lubong a nagbiaganna. Kas kaitungpalan ti pakdaar ni Enoc, inyeg ni Jehova ti dakkel a Layus a namagpatingga iti di nadiosan a lubong idi tiempo ni Noe. Ngem addanto pay mapasamak a pannakadadael a dakdakkel ngem iti dayta. (Mateo 24:38, 39; 2 Pedro 2:4-6) Kas idi, nakasagana itan ti Dios ken ti nasantuan a linaklaksana a mangipakat iti nalinteg a panangukom iti di nadiosan a lubong. Masapul nga ipapuso ti tunggal maysa kadatayo ti pakdaar ni Enoc ken ipakaammotayo dayta. Mabalin a didatay suportaran dagiti kapamilia ken gagayyemtayo. Baka mariknatayo no dadduma nga agmaymaysatayo. Ngem saan a pulos binaybay-an ni Jehova ni Enoc. Dina met baybay-an dagiti matalek nga adipenna ita!
Panagbasa iti Biblia
(2 Juan 1-13) Siak ti lakay nga agsursurat iti ina a pinili ti Dios, ken kadagiti annakna. Talaga nga ay-ayatenkayo. Saan la a siak no di ket ti amin a makaammo iti kinapudno, 2 gapu iti kinapudno nga agtalinaed kadatayo, ken adda kadatayo iti agnanayon. 3 Ti Dios nga Ama ken ni Jesu-Kristo nga Anakna ti mangtedto kadatayo iti kinapudno ken ayat. Ipaayandatayto iti nagpaiduma a kinaimbag, asi, ken talna. 4 Naragsakanak unay ta nasarakak ti dadduma kadagiti annakmo a magmagna iti kinapudno, a kas iti bilin nga inawattayo iti Ama. 5 Isu a kiddawek ita kenka, ina, nga agiinnayattayo. (Saan a baro a bilin ti isursuratko kenka, no di ket daydiay addan kadatayo sipud pay idi damo.) 6 Ket daytoy ti kaipapanan ti ayat, nga agtultuloytayo a magna maitunos kadagiti bilinna. Isu daytoy ti bilin, kas iti nangngegyo manipud idi damo, a rumbeng nga agtultuloykayo a magna iti dayta. 7 Ta adu a manangallilaw ti nakastrek ditoy lubong, dagidiay saan a mangbigbig ken Jesu-Kristo nga immay kas tao. Isu daytoy ti manangallilaw ken ti antikristo. 8 Agannadkayo, tapno diyo mapukaw ti bambanag a nagbannoganmi, no di ket magun-odanyo koma ti naan-anay a gunggona. 9 Tunggal maysa a lumbes ken saan nga agtalinaed iti sursuro ti Kristo awan kenkuana ti Dios. Ti agtalinaed iti daytoy a sursuro isu daydiay adda kenkuana agpadpada ti Ama ken ti Anak. 10 No adda asinoman nga umay kadakayo ket dina iyeg daytoy a sursuro, diyo pulos awaten kadagiti pagtaenganyo wenno kablaawan. 11 Ta ti mangkablaaw kenkuana ket makiramraman kadagiti dakes nga aramidna. 12 Uray adu koma ti isuratko kadakayo, diak kayat nga aramiden dayta iti papel ken tinta, ngem namnamaek ti umay kadakayo ken personal a makasaritakayo tapno nakaragragsakkayonto. 13 Pakpakomustaannakayo dagiti annak ti kabsatmo a babai, daydiay pinili ti Dios.
NOBIEMBRE 18-24
GAMENG MANIPUD ITI SAO TI DIOS | APOCALIPSIS 1-3
“Ammok Dagiti Aramidmo”
(Apocalipsis 1:20) Ti pito a bituen a nakitam iti kannawan nga imak ken ti pito a balitok a kandelero ket sagrado a palimed, ken daytoy ti kaipapananda: Ti pito a bituen irepresentarda dagiti anghel iti pito a kongregasion, ken ti pito a kandelero irepresentarda ti pito a kongregasion.
Ania a Kita ti Espiritu ti Ipakpakitayo?
8 Tapno maliklikan ti kasta a kababalin, laglagipentayo a nailadawan ni Jesus iti Biblia nga addaan ‘pito a bituen iti makannawan nga imana.’ Dagita a “bituen” irepresentarda dagiti napulotan a manangaywan kasta met dagiti amin a manangaywan iti kongregasion. Mabalin nga aramiden ni Jesus ti aniaman a kayatna kadagitoy a “bituen.” (Apoc. 1:16, 20) Yantangay ni Jesus ti Ulo ti kongregasion Kristiano, naan-anay ngarud nga ammona ti mapaspasamak iti nagbabaetan dagiti panglakayen. Addaan isuna iti ‘matmata a kasla iti gumilgil-ayab nga apuy’ ket makitkitana ti amin a banag. Isu a no adda panglakayen a masapul a mailinteg, siguraduen ni Jesus a maasikaso dayta iti umiso a tiempo ken pamay-an. (Apoc. 1:14) Kabayatanna, pagtalinaedentayo koma ti umiso a panagraemtayo kadagidiay dinutokan ti nasantuan nga espiritu, ta insurat ni Pablo: “Agtulnogkayo kadagidiay mangidadaulo kadakayo ket agpasakupkayo, ta agtultuloy a bambantayanda dagiti kararuayo a kasla isudanto dagidiay manungsungbat; tapno aramidenda daytoy a buyogen ti panagrag-o ket saan a buyogen ti panagsennaay, ta daytoy ket makadangran kadakayo.”—Heb. 13:17.
(Apocalipsis 2:1, 2) “Isuratmo iti anghel ti kongregasion idiay Efeso: Dagitoy ti imbaga daydiay mangig-iggem iti pito a bituen iti kannawan nga imana ken magmagna iti nagbabaetan ti pito a balitok a kandelero: 2 ‘Ammok dagiti aramidmo, ti panagbannog ken panagibturmo, ken saanmo nga ipalubos nga agtalinaed kenka dagiti dakes a tattao, ken subokem dagidiay mangibagbaga nga apostolda ngem saanda met a kasta, ket natakuatam nga ulbodda.
Saluadannatayo ni Jehova Agpaay iti Pannakaisalakan
11 Iti sirmata iti Apocalipsis kapitulo 2 ken 3, suksukimaten ti naipadayag a ni Jesu-Kristo ti pito a kongregasion ti Asia Menor. Ipalgak ti sirmata a saan laeng a ti ar-aramiden ti kaaduan ti makitkita ni Kristo no di pay ket dagiti espesipiko a situasion ken nangdakamat pay kadagiti indibidual. Nangted pay iti maitutop a komendasion wenno balakad a kasapulan ti tunggal kongregasion. Ania ti ipasimudaag dayta? Iti kaitungpalan ti sirmata, ti pito a kongregasion irepresentarna dagiti napulotan a Kristiano kalpasan ti 1914, ken ti balakad a naited kadakuada ket agaplikar iti amin a kongregasion ti ili ti Dios ita ditoy daga. Gapuna, maikunatayo nga us-usaren ni Jehova ti Anakna a mangiwanwan iti ilina. Kasanotayo a magunggonaan iti dayta a panangiwanwan?
Makidanggaykayo iti Organisasion ni Jehova
20 Ti pannakidanggay iti progresibo nga organisasion ni Jehova kalikagumanna ti panangbigbig iti intuding ti Dios nga akem ni Jesu-Kristo kas “ulo ti kongregasion.” (Efeso 5:22, 23) Imutektekantay met ti nailanad iti Isaias 55:4: “Adtoy, isu ti intedko a maipaay a saksi kadagiti il-ili a mangipangulo ken agturay kadagiti il-ili.” Di pagduaduaan nga ammo ni Jesus no kasano ti mangidaulo. Am-ammona met dagiti karnerona ken ammona dagiti aramidda. Kinapudnona, idi sinukimatna dagiti pito a kongregasion iti Asia Menor, naminlima a kinunana: “Ammok dagiti aramidmo.” (Apocalipsis 2:2, 19; 3:1, 8, 15) Ammo met ni Jesus dagiti kasapulantayo, kas ken Jehova nga Amana. Sakbay nga insurona ti Modelo a Kararag, kinuna ni Jesus: “Ti Dios nga Amayo ammona no ania dagiti bambanag a kasapulanyo sakbay pay a dawatenyo kenkuana.”—Mateo 6:8-13.
Panagkali iti Naespirituan a Gameng
(Apocalipsis 1:7) Kitaenyo! Isu ket um-umay a kadua dagiti ulep, ket makitanto ti tunggal mata, ken dagidiay nangduyok kenkuana; ket gapu kenkuana, amin a tribu ti daga banugbogendanto ti barukongda gapu iti ladingitda. Wen, Amen.
Ti Pagarian ti Dios Ikkatenna Dagiti Kabusor
10 Panamaglalasin kadagiti karnero ken kalding. Amin a bumusbusor iti Pagarian ti Dios ket mapilitanto a makakita iti pasamak a mangpakaro iti panagtuokda. Kinuna ni Jesus: “Makitadanto ti Anak ti tao nga um-umay kadagiti ulep nga addaan dakkel a pannakabalin ken dayag.” (Mar. 13:26) Daytoy a nabileg a pannakaiparangarang ti pannakabalin ipakitana nga umay ni Jesus tapno mangaramid iti pangngeddeng. Iti sabali a paset daytoy met laeng a padto maipapan iti maudi nga al-aldaw, nangted ni Jesus iti ad-adu a detalye maipapan iti ikeddengna a panangukom iti dayta a tiempo. Makitatayo dayta iti ilustrasion maipapan kadagiti karnero ken kalding. (Basaen ti Mateo 25:31-33, 46.) Dagiti nasungdo a mangsupsuporta iti Pagarian ti Dios ket maibilang kas “karnero” ken ‘itangaddanto dagiti uloda,’ gapu ta ammoda a ti ‘pannakaispalda umas-asidegen.’ (Luc. 21:28) Ngem dagiti bumusbusor iti Pagarian ket maibilangto kas “kalding” ken “saplitendanto ti bagbagida iti ladingit” gapu ta ammoda nga agturongda iti “agnanayon a pannakagessat.”—Mat. 24:30; Apoc. 1:7.
(Apocalipsis 2:7) Denggen koma ti asinoman nga adda lapayagna ti ibaga ti espiritu kadagiti kongregasion: Daydiay agballigi ket palubosakto a mangan iti kayo ti biag nga adda iti paraiso ti Dios.’
Dagiti Tampok iti Libro nga Apocalipsis—I
2:7—Ania ti “paraiso ti Dios”? Yantangay dagita a sasao ket naiturong kadagiti napulotan a Kristiano, ti nadakamat ditoy a paraiso tuktukoyenna la ketdi ti nailangitan a paraiso—ti mismo a presensia ti Dios. Magunggonaanto dagiti matalek a napulotan iti pannangan manipud “iti kayo ti biag.” Umawatdanto iti imortalidad.—1 Cor. 15:53.
Panagbasa iti Biblia
(Apocalipsis 1:1-11) Daytoy ket apocalipsis ni Jesu-Kristo, nga inted kenkuana ti Dios, tapno ipakitana kadagiti adipenna. Ket imbaon ni Jesu-Kristo ti anghelna iti adipenna a ni Juan tapno ipakitana kenkuana, babaen kadagiti mangirepresentar a ladawan, dagiti masapul a mapasamak iti mabiit. 2 Isu ti nangsaksi iti sao ti Dios ken iti panangsaksi ni Jesu-Kristo, wen, iti amin a banag a nakitana. 3 Naragsak daydiay mangbasa a sipipigsa ken dagidiay dumngeg iti sasao daytoy a padto ken mangtungpal kadagiti naisurat iti dayta, ta asidegen ti naikeddeng a tiempo. 4 Daytoy ti surat ni Juan iti pito a kongregasion nga adda iti probinsia ti Asia: Adda koma kadakayo ti nagpaiduma a kinaimbag ken talna nga aggapu iti “Daydiay adda ita ken adda idi ken um-umay,” ken manipud iti pito nga espiritu nga adda iti sango ti tronona,’ 5 ken manipud ken Jesu-Kristo, “ti Matalek a Saksi,” “ti inauna kadagiti natay,” ken “ti Agturay kadagiti ari iti daga.” Kenkuana a mangay-ayat kadatayo ken nangwayawaya kadatayo manipud kadagiti basoltayo babaen ti mismo a darana— 6 ket pinagbalinnatayo a pagarian, papadi iti Dios ken Amana—wen, agnanayon koma a maadda kenkuana ti dayag ken ti pannakabalin. Amen. 7 Kitaenyo! Isu ket um-umay a kadua dagiti ulep, ket makitanto ti tunggal mata, ken dagidiay nangduyok kenkuana; ket gapu kenkuana, amin a tribu ti daga banugbogendanto ti barukongda gapu iti ladingitda. Wen, Amen. 8 “Siak ti Alfa ken ti Omega,” kuna ni Jehova a Dios, “Daydiay adda ita ken adda idi ken um-umay, ti Mannakabalin-amin.” 9 Siak ti kabsatyo a ni Juan, a kaduayo iti rigat ken iti pagarian ken iti panagibtur kas pasurot ni Jesus. Addaak idi iti isla a maawagan iti Patmos gapu iti panangipakaammok maipapan iti Dios ken panangsaksik maipapan ken Jesus. 10 Impannak ti nasantuan nga espiritu iti aldaw ti Apo, ket nangngegko iti likudak ti maysa a napigsa a timek a kas iti uni ti trumpeta, 11 ket ibagbagana: “Isuratmo iti lukot dagiti makitam ken ipatulodmo dayta iti pito a kongregasion: idiay Efeso, Smirna, Pergamo, Tiatira, Sardis, Filadelfia, ken Laodicea.”
NOBIEMBRE 25–DISIEMBRE 1
GAMENG MANIPUD ITI SAO TI DIOS | APOCALIPSIS 4-6
“Ti Panagsakay ti Uppat a Kumakabalio”
(Apocalipsis 6:2) Kimmitaak ket adtoy! adda puraw a kabalio, ken nakaiggem iti pana daydiay nakasakay iti dayta; ken naikkan iti korona, ket rimmuar a mangparmek tapno makompleto ti panagballigina.
Ti Uppat a Kumakabalio—Siasinoda?
Asino ti nakasakay iti puraw a kabalio? Sungbatan dayta ti isu met laeng a libro ti Biblia nga Apocalipsis a nangtukoy idi agangay iti daytoy nailangitan a kumakabalio kas “Ti Sao ti Dios.” (Apocalipsis 19:11-13) Ti pangawag a titulo a Ti Sao ket tumukoy ken Jesu-Kristo ta isu ti pannakangiwat ti Dios. (Juan 1:1, 14) Maawagan pay isuna kas “Ari ti ar-ari ken Apo ti ap-appo” ken nailadawan kas “Matalek ken Napudno.” (Apocalipsis 19:11, 16) Nalawag nga adda autoridadna nga agtignay kas mannakigubat nga ari, ken dina abusuen ti pannakabalinna wenno usaren iti kinadakes. Ngem adda dagiti tumaud a saludsod.
wp17.3 4 ¶5
Ti Uppat a Kumakabalio—Siasinoda?
Kaano a nangrugi a nagsakay dagiti kumakabalio? Inrugi ti umuna a kumakabalio a ni Jesus ti panagpatarayna idi naawatna ti korona. (Apocalipsis 6:2) Kaano a nakoronaan ni Jesus kas Ari idiay langit? Saan nga idi nagsubli idiay langit kalpasan ti ipapatayna. Ipakita ti Biblia a kadayta a nangrugi ti panagurayna. (Hebreo 10:12, 13) Imbaga ni Jesus kadagiti adalanna ti pagilasinan no kaano nga agpatingga dayta a panagurayna. Imbagana nga iti rugi ti panagturayna, sigurado a kumaro ti kasasaad ti lubong. Addanto gubgubat, bisin, ken makapapatay a makaakar a saksakit. (Mateo 24:3, 7; Lucas 21:10, 11) Di nagbayag kalpasan a nangrugi ti Gubat Sangalubongan I idi 1914, nalawag a nangrugin dayta a panawen, maysa a nariribuk a tiempo nga aw-awagan ti Biblia kas ‘maudi nga al-aldaw.’—2 Timoteo 3:1-5.
(Apocalipsis 6:4-6) Adda sabali pay a rimmuar a kabalio a kasla apuy ti kolorna, ket naikkan iti autoridad daydiay nakasakay iti dayta a mangikkat iti talna iti daga tapno agpipinnatay dagiti tattao, ken adda dakkel nga espada a naited kenkuana. 5 Idi linuktanna ti maikatlo a selio, nangngegko nga imbaga ti maikatlo a sibibiag a parsua: “Umayka!” Kimmitaak ket adtoy! adda nangisit a kabalio, ken nakaiggem iti pagtimbangan daydiay nakasakay. 6 Nangngegko nga imbaga ti kasla timek a naggapu iti tengnga ti uppat a sibibiag a parsua: “Maysa a kilo a trigo para iti maysa a denario, ken tallo a kilo a sebada para iti maysa a denario; ken dimo ibusen ti lana ti olibo ken ti arak.”
Ti Uppat a Kumakabalio—Siasinoda?
Daytoy a kumakabalio irepresentarna ti gubat. Ikkatenna ti talna saan laeng nga iti sumagmamano a nasion no di ket iti intero a daga. Idi 1914, bimtak ti sangalubongan a gubat. Damo dayta iti pakasaritaan ti tao. Simmaruno ti maikadua a sangalubongan a gubat a nakarkaro ngem iti immuna. Sigun iti dadduma a tantia, nasurok a 100 a milion ti natay gapu kadagiti gubat ken gerra sipud idi 1914! Nagadu met ti nakaro a nasugatan.
wp17.3 5 ¶4-5
Ti Uppat a Kumakabalio—Siasinoda?
“Ket nakitak, ket, adtoy! maysa a nangisit a kabalio; ket daydiay sisasakay iti dayta addaan iti maysa a paris a timbangan iti imana. Ket nakangngegak iti timek a kasla adda iti nagtengngaan ti uppat a sibibiag a parsua a kunana: ‘Maysa a litro ti trigo maipaay iti maysa a denario, ket tallo a litro ti sebada maipaay iti maysa a denario; ken dika dangran ti lana ti olibo ken ti arak.’”—Apocalipsis 6:5, 6.
Daytoy a kumakabalio irepresentarna ti bisin. Mailadawantayo ditoy ti nakaro a kinakurang ti makan ta uray la agbalor iti maysa a denario ti maysa a litro a trigo. Sueldo dayta iti maysa nga aldaw idi umuna a siglo! (Mateo 20:2) Makagatang met dayta iti tallo a litro a sebada, a maibilang a nababbaba ti klasena ngem iti trigo. Umanay ngata dayta para iti dakkel a pamilia? Naibaga idi agangay kadagiti tattao nga agin-inutda uray kadagiti inaldaw a makan kas iti lana ti olibo ken arak a mangiladawan iti kangrunaan a pagtaraon idi a tiempo ken iti dayta a kultura.
(Apocalipsis 6:8) Kimmitaak ket adtoy! adda napusiaw a kabalio; ket Patay ti nagan ti nakasakay. Ken sumursurot ni Tanem iti asidegna. Naikkanda iti autoridad iti apagkapat ti daga, tapno mangpapatayda babaen ti atiddog nga espada, bisin, makapapatay a didigra, ken narungsot nga an-animal iti daga.
wp17.3 5 ¶8-10
Ti Uppat a Kumakabalio—Siasinoda?
Ti maikapat a kumakabalio irepresentarna ti ipapatay gapu iti makaakar a saksakit ken dadduma pay a rason. Di nagbayag kalpasan ti 1914, pinullo a milion ti natay gapu iti trangkaso Espaniol. Posible nga agarup 500 a milion ti naakaran—mapan a maysa iti kada tallo a sibibiag idi a tao!
Ngem ti trangkaso Espaniol ket pangrugian laeng. Tinantia dagiti eksperto a nasurok a 300 a milion ti natay idi 1900’s gapu iti burtong. Agingga ita, minilion ti immababa ti biagna gapu iti AIDS, TB, ken malaria uray no dakkelen ti rimmang-ayan ti medisina.
Ti gubat, bisin, wenno makaakar a sakit ket agpapada nga agresulta iti ipapatay. Saan nga agsardeng ti panangalun-on ti Tanem kadagiti biktima ken awan ti ipaayna a namnama.
Panagkali iti Naespirituan a Gameng
(Apocalipsis 4:4) Adda 24 a trono iti aglikmut ti trono ket nakitak a nakatugaw kadagitoy a trono ti 24 a panglakayen a nakabado iti puraw ken nakakorona iti balitok.
(Apocalipsis 4:6) Iti sanguanan ti trono, adda kasla sarming a baybay a kas iti kristal. Iti tengnga ti trono ken iti aglawlaw ti trono, adda uppat a sibibiag a parsua a napno iti mata ti sango ken likud ti bagida.
Ti Kinadayag ti Nailangitan a Trono ni Jehova
8 Ammo ni Juan a nadutokan dagiti papadi nga agserbi iti nagkauna a tabernakulo. Gapuna, mabalin a naklaat idi nakitana ti sumaruno nga iladawanna: “Ket iti aglikmut ti trono adda duapulo ket uppat a trono, ket kadagitoy a trono nakitak a situtugaw ti duapulo ket uppat a panglakayen a nakakawes iti puraw a makinruar a kawkawes, ket iti rabaw dagiti uloda nabalitokan a korkorona.” (Apocalipsis 4:4) Wen, imbes a papadi, adda 24 a panglakayen a situtugaw kadagiti trono ken nakoronaan a kasla ar-ari. Siasino dagitoy a panglakayen? Awan sabali no di dagiti napulotan a kameng ti kongregasion Kristiano, a napagungar ken immawat iti nailangitan a saad nga inkari ni Jehova kadakuada. Kasanotayo nga ammo a kasta?
Ti Kinadayag ti Nailangitan a Trono ni Jehova
19 Ania ti iladladawan dagitoy a parsua? Ti sirmata nga insurat ti sabali pay a mammadto a ni Ezequiel, tulongannatayo a mangbirok iti sungbat. Nakita ni Ezequiel a situtugaw ni Jehova iti tronona iti nailangitan a karuahe, a kaduana dagiti sibibiag a parsua a kas kadagidiay dineskribir ni Juan ti langada. (Ezequiel 1:5-11, 22-28) Kalpasanna, nakita manen ni Ezequiel dayta a karuahe a trono agraman dagiti sibibiag a parsua. Ngem iti daytoy a gundaway, dinakamatna a kerubin dagiti sibibiag a parsua. (Ezequiel 10:9-15) Dagiti uppat a sibibiag a parsua a nakita ni Juan mabalin nga irepresentarda dagiti adu a kerubin ti Dios—dagiti parsua a nangato ti saadda iti organisasion ti Dios a buklen dagiti espiritu a parsua. Mabalin a saan a karkarna ken Juan ti makakita kadagiti kerubin a naisaad iti asideg a mismo ni Jehova, yantangay iti urnos ti nagkauna a tabernakulo, adda dua a kerubin iti rabaw ti balitok nga akkub ti lakasa ti tulag a mangirepresentar iti trono ni Jehova. Iti nagbaetan dagitoy a kerubin, nangted ti timek ni Jehova kadagiti bilin maipaay iti nasion ti Israel.—Exodo 25:22; Salmo 80:1.
(Apocalipsis 5:5) Ngem imbaga kaniak ti maysa kadagiti panglakayen: “Isardengmon ti agsangit. Kitaem! Nagballigin ti Leon iti tribu ni Juda, ti ramut ni David, tapno ukradenna ti lukot ken ikkatenna ti pito a selio dayta.”
“Adtoy! Ti Leon a Nagtaud iti Tribu ni Juda”
5 Ti leon ket masansan a mainaig iti kinatured. Napadasam kadin ti nagtakder iti sango ti nataengan a kalakian a leon nga adda iti zoo? Nalabit natalgedka ta nakapupok dayta a leon. Ngem mabalin nga adda latta panagamakmo. No makipinnerrengka iti daytoy a dakkel ken nakapigpigsa a parsua, adayo a mapanunotmo nga adda aniaman a kabuteng wenno itarayanna. Kuna ti Biblia a ‘ti leon ti kabilgan kadagiti animal ken saan nga agbaw-ing manipud sanguanan ti asinoman.’ (Proverbio 30:30) Kasta ti kinatured ni Kristo.
6 Usigentayo no kasano nga impakita ni Jesus ti kas iti leon a kinatured iti tallo a wagas: iti panangsalimetmetna iti kinapudno, iti panangitandudona iti hustisia, ken iti panangsangona iti ibubusor. Makitatayto met a kabaelantay amin a tuladen ti kinatured ni Jesus, sigud man a naturedtayo wenno saan.
Panagbasa iti Biblia
(Apocalipsis 4:1-11) Kalpasan dagitoy, nakitak ket adtoy! adda nakalukat a ridaw idiay langit, ket kas iti uni ti trumpeta ti damo a timek a nangngegko a mangibagbaga: “Umulika ditoy, ket ipakitak kenka ti bambanag a masapul a mapasamak.” 2 Kalpasan daytoy, dagus a nagtignay kaniak ti espiritu ti Dios ket adtoy! nakitak idiay langit ti maysa a trono, ken adda nakatugaw iti dayta. 3 Daydiay nakatugaw ket kas iti itsura ti bato a jaspe ken bato a sardio, ken bullalayaw a kasla esmeralda ti nanglikmut iti trono. 4 Adda 24 a trono iti aglikmut ti trono ket nakitak a nakatugaw kadagitoy a trono ti 24 a panglakayen a nakabado iti puraw ken nakakorona iti balitok. 5 Adda dagiti kimat, timek, ken gurruod nga aggapgapu iti trono; ken adda pito a pagsilawan a sumsumged iti sanguanan ti trono, ken ti kaipapanan dagitoy ket ti pito nga espiritu ti Dios. 6 Iti sanguanan ti trono, adda kasla sarming a baybay a kas iti kristal. Iti tengnga ti trono ken iti aglawlaw ti trono, adda uppat a sibibiag a parsua a napno iti mata ti sango ken likud ti bagida. 7 Kasla leon ti umuna a sibibiag a parsua, kasla urbon a kalakian a baka ti maikadua a sibibiag a parsua, kasla rupa ti tao ti rupa ti maikatlo a sibibiag a parsua, ken kasla agtaytayab nga agila ti maikapat a sibibiag a parsua. 8 Innem ti payak ti tunggal maysa kadagiti uppat a sibibiag a parsua; napno iti mata ti intero a payakda. Inaldaw ken rinabii nga itultuloyda nga ibagbaga: “Nasantuan, nasantuan, nasantuan ni Jehova a Dios, ti Mannakabalin-amin, nga adda idi ken adda ita ken um-umay.” 9 Kada ipadayag, idaydayaw, ken pagyamanan dagiti sibibiag a parsua Daydiay situtugaw iti trono, a sibibiag iti agnanayon nga awan inggana, 10 ti 24 a panglakayen ket agruknoy iti sanguanan Daydiay situtugaw iti trono ken agdaydayawda iti Daydiay sibibiag iti agnanayon nga awan inggana, ken ipuruakda dagiti koronada iti sanguanan ti trono, nga ibagbagada: 11 “Maikarika, Jehova a Diosmi, nga umawat iti dayag ken dayaw ken pannakabalin, gapu ta pinarsuam ti amin a banag, ken gapu iti pagayatam, napaadda ken naparsuada.”