Mapangnamnamaantayo ti Ibagbaga ti Biblia

KASAPULANTAYO TI MAPANGNAMNAMAAN A TULONG TI DIOS

Iti Biblia, imbaga ni Jehovaa a Dios a kasapulan dagiti tattao ti tulongna. Saanna ida a pinarsua nga isuda ti mangiturong iti bagbagida wenno aramidenda ti kaykayatda. (Jeremias 10:23) Isu nga impaisuratna iti Biblia no ania ti umiso ken di umiso. Ay-ayatennatayo ken saanna a kayat a makaaramidtayo kadagiti di umiso a desision a pagdaksantayo ken pagbabawyantayto. (Deuteronomio 5:29; 1 Juan 4:8) Ngem kapatgan iti amin, isu ti Namarsua kadatayo ken isu ti kasisiriban. Ammona ngarud no ania ti kasapulantayo a kasayaatan a balakad wenno pammagbaga. (Salmo 100:3; 104:24) Ngem di pulos pilpiliten ti Dios dagiti tattao a mangsurot kadagita.

Da Adan ken Eva ti immuna a tattao ditoy daga. Inted ni Jehova kadakuada ti amin a kasapulanda tapno agbalinda a pudpudno a naragsak. (Genesis 1:​28, 29; 2:​8, 15) Inikkanna met ida kadagiti simple a bilin. Ninamnamana a surotenda dagita. Ngem pinalubosanna ida nga agpili no surotenda dagita wenno saan. (Genesis 2:​9, 16, 17) Imbes a suroten da Adan ken Eva dagiti bilin ti Dios, makapaladingit ta pinilida nga aramiden no ania ti panagriknada nga umiso. (Genesis 3:6) Ania ti resultana? Naragragsak kadi dagiti tattao no isuda ti agdesision no ania ti umiso ken di umiso? Saan. Ipakita ti pakasaritaan ti tao a saan nga agtultuloy a naragsak ken natalna ti biagtayo no sukirentayo dagiti bilin ti Dios.—Eclesiastes 8:9.

Ibaga ti Biblia dagiti mapangnamnamaan a tulong a kasapulantayo tapno makaaramidtayo kadagiti nasayaat a desision, aniaman a lugar wenno pamilia ti dimmakkelantayo. (2 Timoteo 3:​16, 17; kitaem ti kahon a “Maysa a Libro Para iti Amin a Tattao.”) Kitaem no kasano.

Ammuem ti ad-adu pay no apay a husto laeng a maawagan ti Biblia a “sao ti Dios.”—1 Tesalonica 2:13. Buyaem ti video a Siasino ti Autor ti Biblia? iti jw.org/ilo.

IBAGA TI BIBLIA DAGITI MAPANGNAMNAMAAN A TULONG TI DIOS

Maammuantayo iti Biblia no kasano a nakilangen ni Jehova kadagiti tattao idi un-unana. Makatulong dagita tapno maawatantayo dagiti ibilang ti Dios nga umiso ken di umiso ken no ania dagiti pagsayaatan ken pagdaksantayo. (Salmo 19:​7, 11) Dagiti prinsipio a masursurotayo ket kanayon a husto ken makatulong tapno inaldaw a makaaramidtayo kadagiti umiso a desision.

Kas pagarigan, kitaem ti ibagbaga ti Proverbio 13:20: “Ti makikadkadua iti masirib agbalinto a masirib, ngem ti makilanglangen iti maag, dakesto ti pagtungpalanna.” Makatulong dayta a prinsipio saan laeng nga idi no di ket uray pay ita. Adu ti kasta a makatulong ken napateg a prinsipio a mabasatayo iti Biblia.—Kitaem ti kahon a “Makatulong Agingga Ita Dagiti Prinsipio ti Biblia.”

Ngem mabalin a maisaludsodmo, ‘Kasanok a masigurado a makatulong agingga ita ti ibagbaga ti Biblia nga umiso ken di umiso?’ Makitam iti sumaruno nga artikulo ti dadduma nga agpaypayso a kapadasan.