Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • g86 1/8 pp. 22-23
  • Dagiti Loteria—Siasino ti Mangabak?

Awan video-na ti napilim.

Pasensiakan, adda problema iti pannakai-load ti video.

  • Dagiti Loteria—Siasino ti Mangabak?
  • Agriingkayo!—1986
  • Subtitulo
  • Umasping a Material
  • Panagbalin a Baknang?
  • Nangatngato a Pusta
  • Nasaysayaat Ngem Naimbag a Sugal
  • Dagiti Saludsod Manipud Kadagiti Managbasa
    Ti Pagwanawanan Mangibumbunannag iti Pagarian ni Jehova—1989
  • Dagiti Paripa—Asinot’ Mangabak? Asinot’ Maabak?
    Agriingkayo!—1991
  • Dagiti Paripa Apay Popularda Unay?
    Agriingkayo!—1991
  • Gatel iti Paripa—Ti Sugal ti Lubong
    Agriingkayo!—1991
Kitaen ti Ad-adu Pay
Agriingkayo!—1986
g86 1/8 pp. 22-23

Ti Panangmatmat ti Biblia

Dagiti Loteria​—Siasino ti Mangabak?

“NO TARIGAGAYANYO ti mangabak masapul nga agay-ayamkayo.” “Dua a jackpot a maipaay iti gatad iti 1.” “Ad-adu a tiro maipaay iti maysa a doliar ngem idi!” Kumaro ti panagregget ken panagragsak. Gaput’ matignay kadagitoy a sasao, dagiti lallaki, babbai, ken uray pay agtutubo, iti sadinoman paggastuanda dayta iti kasta unay. Masinga pay uray dagiti resepsion iti kasar. Maaw-awiskayo kadi a makipaset iti loteria!

Kamaudiananna, naiyanunsion ti “nagasat a numero.” Adda ti panagragsak dagiti sumagmamano a napili. Rinibribo, nalabit minilion, a doliar ti dagdagus nga agbalin a kukuada. Ti panangabak iti maysa-milion a doliar a loteria, intangsit ti maysa a nangabak, ket “‘maysa laeng a kanayonan’ iti makagunggona a panagbiag.” Kuna ti maysa, “makapainana a maammuan a saankanton a pulos nga agkurang iti kuarta.” Ngem para kadagiti kaaduan​—dagiti naabak​—dagiti ar-aramid iti panagbiag agsubli iti gagangay a kasasaad.

Naawiskayo kadin iti pangawis iti loteria? Kasano a maapektarankayo ken maapektaran ti masanguananyo iti dayta? Siasino ti pudno a mangabak?

Panagbalin a Baknang?

Ti loteria mabalin a tignayenna dagiti puspuso dagiti managay-ayam nga agtarigagay a bumaknang. Nupay kasta, ti Biblia kunaenna a daytoy nga “ayat ti pirak isu ti maysa a ramut ti isuamin a kita ti dakes, isu nga idi inaguman dagiti dadduma . . . nasalputda kadagiti adu a ladladingit.” Saan a mailaksid dagiti loteria.​—1 Timoteo 6:9, 10.

Dagiti managay-ayam agbalinda nga adikto iti panagsugal. Ni Dr. John Watt, medikal a direktor iti Homewood Sanitarium idiay Guelph, Canada, kunaenna a ti indibidual agbalin a ‘nairuamen a managay-ayam iti loteria, kas iti maysa a tao nga agbalin nga alkoholiko,’ iti panangikagumaanna a manglisi iti kinapudno. Awaganna dayta iti lotteryitis.

No mangabak ti maysa, tumaud dagiti kabbaro a parparikut. “Pagarupek nga agbalinakon a baknang iti natda pay iti panagbiagko,” kuna ni Erika, maysa a nangabak iti maysa-milion-doliar a loteria. Ngem kalpasan ti dua a diborsio ken ti kankanayon a panagkalikagum dagiti managsingir iti buis, isut’ nagsennaay: “No ammok la koma no aniat’ mapasamak, pinisangko koman dayta a tiket.” Dadduma ti agkomento a ti panangabak iti ‘loteria isut’ pangrugian iti biag a nasaplit kadagiti sakit, panagbuteng, ken kamaudiananna gura.’ “Amin dagiti kinapalangguad iti panangabak ti nasukatan kadagiti nadadagsen a rebbengen.” “Diakon agtalek kadagiti tattao​—dayta ti inaramid ti panangabak iti loteria kaniak.” Para kadagiti nangabak iti loteria, dagiti opisiales isuhereda pay ti panangtangdan iti bodyguard ken ti mangimaton iti ar-aramid a mangsalaknib kadagiti “premioda ken ti bagbagida.” Wen, uray pay dagiti nangabak agbalinda a naabak.

Nangatngato a Pusta

Dadduma, agraman dagiti nalatak a relihiuso a papangulo, irasonda a ti panagay-ayam iti loteria ket umiso no la ket dayta ti legal. Ngem, ti kinapudno a ti loteria ket legal kadagiti dadduma a pagpagilian dina pagbalinen dayta nga umiso. Tapno iyilustrar: No ti lokal a gobiernoyo pagbalinenna a legal ti panagbalangkantis, dayta kadi pagbalinenna nga umiso? Saan sigun iti Biblia. (1 Corinto 6:9, 10) Ti maysa a tao nga agtarigagay a mangay-ayo iti Dios maseknan kangrunaanna no ania ti ipamatmat ti Saona, ti Biblia. Mabalin a dayta met ti pakaseknanyo. Ngem adda kadi aniaman a kunaen ti Biblia maipapan iti loteria?

Saan a direkta, ngem agsipud ta ti kangrunaan a pangawis ti loteria ket ti panagayat iti kuarta, dayta nairamut iti kinaagum. Ti kinaagum pataudenna dagiti dakes a bungbunga. Ti Biblia balakadannatayo a saan a mangpataud iti kinaagum dagiti puspusotayo. (1 Juan 2:15, 16) “Ngem . . . ti agum saan man la a madukit kadakayo.”​—Efeso 5:3.

Ti panagayat iti loteria naibatay iti kinaagum. Saan kadi a tunggal makipaset sapulenna ti bukodna a pagimbagan, ti panangabakna iti imbayad iti kaarrubana? Ti Biblia, nupay kasta, paregtaenna ti maysa a “saan nga agagawa iti kabukbukodanna, no di ket iti pagimbagan ti sabali.” Gapuna, saan kadi a dakes ti pananggun-od iti ragsak ken gunggona manipud iti pukaw dagiti dadduma a tattao?​—1 Corinto 10:24; Proverbio 17:5.

Ti loteria agbalin met a silo ti napanglaw, nga alaenna kenkuana ti banag a kasapulanna ken kasapulan ti pamiliana​—ti kuarta. Mammano ti gundaway a panangabak ti indibidual. Kuna dagiti autoridad nga ad-adu pay ti gundawaymo a nakimat ngem ti panangabakmo iti loteria. Ket sigun iti Lightning Protection Institute, ti gundaway a pannakakimat ti maysa ket maysa iti maysa a milion. Ngarud, ti gundaway a panangabak iti dakkel ket sumagmamano a milion iti maysa!

Ngem adda pay dadduma a rason a pakaseknan. Dagiti managay-ayam iti loteria agpannurayda iti gasat ket saan a ti laingda, ti panangaramid iti maysa a banag nga awan iti panagpanunot saan a babaen iti panagrason. Kas banagna, adu ti maawis iti an-anito. Ania ti pagturongan daytoy? Saritaen ti Biblia dagidiay a “nangsagana iti maysa a lamisaan a maipaay iti dios ti Gasat.” Ti idolatria ket maysa a nagan a maipaay iti dayta. Ngarud, dagitoy saanda laeng a busoren ti panangabak iti loteria a mismo, no di ket dayta mabalin nga isu ti damo nga addang nga agturong iti idolatria isu a mangikabil kadakuada a maibusor ken Jehova a Dios.​—Isaias 65:11-14.

Nasaysayaat Ngem Naimbag a Sugal

Ti Biblia palagipannatayo a “naragragsak ti mangted ngem ti umawat.” Pudno, ti ragsak iti loteria saanna a parang-ayen ti espiritu ti awanan-agum a pannangted, isu a pudno a makagunggona.​—Aramid 20:35.

Ti pudno a kinaragsak masarakan no ikabiltayo ti namnamatayo “saan nga iti kinabaknang a pagduaduaan, no di ket iti Dios, isu a mangted kadatayo iti nawadwad iti isuamin a pagnam-ayantayo; nga agaramid koma iti naimbag, a nabaknang koma kadagiti naimbag nga aramid, . . . nalaka a makipagrikna.” Iti kasta, mabalin a sitatalged nga urnongentayo a maipaay kadagiti bagbagitayo ti “nasayaat a pamunganayan a maisagana iti aldaw a mapasungad” ken “mangsalimetmet iti biag a pudno.”​—1 Timoteo 6:17-19.

Iti kastoy a pamay-an, mabalin a mainanama a nangabakkayo. Ket dayta saanto a maysa a banag a naiparna laeng wenno panangtengngel iti “nagasat a numero.” Imbes ketdi, kas kinuna a silalawag ni Jesu-Kristo, masapul ‘a gun-odenyo ti pannakaammo iti maymaysa a pudno a Dios’ ken dagiti pangpanggepna. Kalpasanna, agtignaykayo a maitunos iti dayta. Agbiagkayo a maitunos iti Saona. Ti masanguananyo agpannuray iti dayta, “ta isu ipaayna kadatayo ti balligi.” Ti gunggona napatpateg ngem ti jackpot iti loteria. Dayta ti “agnanayon a biag”!​—Juan 17:3; 1 Corinto 15:57.

[Blurb iti panid 22]

Uray pay dagiti nangabak agbalinda a naabak

[Blurb iti panid 23]

Ad-adu ti gundawaymo a makimat ngem ti panangabakmo iti loteria

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share