Dagiti Saludsod Manipud Kadagiti Managbasa

◼ Maitutop kadi para iti Kristiano a gumatang iti tiket ti loteria a kas paglinglingayan laeng no ti mapastrek ket maipaay a pangtulong?

Ti Biblia pudno a saanna a paayen ti umiso a panaglinglingay, ta ni Jehova isut’ “naragsak a Dios.” (1 Timoteo 1:11) Mabalin a tagiragsaken ti ilina ti musika, nadayaw a panagsala, di aglablabes a pannangan wenno panaginum, ken natimbeng nga sports wenno ay-ayam. (Salmo 150:4; Eclesiastes 2:24) Nupay kasta, ti panagsugal ket nalawag a maikaniwas iti masirib a balakad ti Dios, ket pudno daytoy iti pannakiraman kadagiti loteria.

Ania a talaga ti loteria? Iraman dayta ti pananggatang iti tiket tapno maddaan gundaway a mangabak kadagiti premio. Maammuan dagiti mangabak babaen iti panangbunot wenno babaen iti dadduma a wagas ti insigida a panangpili iti maysa a numero.a Masansan nga adda maysa a dakkel a premio, a nalabit aggatad iti minilion a doliar, pisos, wenno pounds. Ti panangawis ti kastat’ kadakkelna a premio ket nakapigpigsa a ta ti loteria nagbalinen a “kasasaknapan a porma ti panagsugal.” (The World Book Encyclopedia) Ginasgasut a milion a tattao ti agsugsugal babaen kadagiti loteria.

Dadduma a tattao inkalinteganda a ti pannakiraman iti loteria ket saan a di umiso wenno dakes gapu ta ti bayad ti maysa a tiket (gundaway) ket nalaka, gapu ta dagidiay makiramraman situtulok nga aramidenda dayta, ken agsipud ta dadduma kadagidiay mapastrek ket maipaay a pangtulong, a kas iti panangtulong kadagiti napanglaw. Kasanot’ kinaumiso dagita a panagrasrason?

Nupay kunaen ti dadduma a ti pananggatang iti tiket ti loteria ket simple, di nagastos a paglinglingayan, awan makailibak iti adda a kinaagum. Gumatang ti tattao iti tiket ti loteria a manginanamada a mangabak iti adu a kuarta. Daytoy ti talaga a maikontra iti nadiosan a balakad a maibusor iti kinaagum, a mabalin a maysa a serioso a bisyo ta malapdanna ti maysa a tao manipud iti ‘panangtawidna iti pagarian ti Dios.’ Gapuna, no ti maysa a Kristiano ipakitana ti agtultuloy a kinaagum babaen iti panagsugal, mabalin a mailaksidto iti kongregasion. (1 Corinto 5:11; 6:10) Ti Biblia kunana: “Ti tawid magun-od a nadaras iti damdamona, ngem ti panungpalanna saanto a nagasat.” (Proverbio 20:21) No maaddaan ti maysa a Kristiano iti aniaman a rikna a ‘makigasanggasat’ iti loteria, masapul a panunotenna a siseserioso ti kinaagum a nakaibatayan ti loteria. Ti Efeso 5:3 kunaenna a ‘ti kinaagum saan man la koma a madukit kadakayo,’ anianto ketdin no makiraman ti Kristiano iti dayta.

Ti kadadakkelan a paset dagiti managay-ayam iti loteria ket masansan a masarakanda kadagiti nakurapay a komunidad. Gapuna nupay no nalaka ti bayad ti loteria, sabali ti pakaiturongan dagiti pundo a kasapulan koma a maipaay kadagiti pudno a kasapulan ti pamilia​—ad-adu a taraon, umdas a kawes, naparang-ay a medikal a panangaywan. Ti maysa a tao nga agkunkuna a Kristiano ngem maliwayanna met dagita a kasapulan ti pamilia “ket dakdakes ngem iti saan a mamati.”​—1 Timoteo 5:8.

Uray no ti gatad ti tiket a loteria saanna unay a madangran ti pinansial a kasasaad ti maysa wenno iti pamiliana, dina kayat a sawen a dina nadangran dagiti dadduma. Apay a kasta? Agsipud ta ngangngani asinoman a gumatang iti tiket ti loteria ket kayatna ti mangabak. Sadinot’ paggapuan ti premio? No ti tiketna ket aggatad iti sangapulo a pisos ket maysa a milion a pisos ti premio, kayatna a sawen dayta nga alenna ti kuarta ti tiket manipud sangagasut a ribo a sabali a tattao. Maitunos kadi dayta iti balakad ti Dios maibusor iti panangagum kadagiti kukua ti sabsabali? (Deuteronomio 5:21) Kinapudnona, ti premiona iramanna ti kuarta a maala manipud ad-adu pay a tattao, ta ad-adu pay nga amang ngem sangagasut a ribo a tiket ti kasapulan a mailako. Dakkel a gatad ti kuarta iti tiket ti mapan kadagiti nagastos iti panangaywan, kasta met a dadduma ti mapan iti panangtulong a panggep a maiwarwaragawag kas nakaibatayan ti loteria. Gapuna nupay no ti maysa ket kabaelanna ti sangapulo a pisos para iti bukodna a tiket, ania met ngay ti maipapan kadagiti nakaad-adu a dadduma? Kasta met, ti panangabakna nalabit maipablaakto, a mangtignay kadagiti adu a mangrugi nga agay-ayam iti loteria wenno gumatang iti ad-adu a tiket, uray no saanda a kabaelan daytoy.

Di met mailibak a mainaig iti loteria isut’ panangarapaap iti panangabak iti kuarta nga awan panagbannog a maipaay iti dayta. Wen, ti loteria iparegtana ti kinasadut, wenno awisenna dayta. Nupay kasta, ti Biblia igunamgunamna iti ili ti Dios ti panagin-inut, kinagaget, ken kinasaet nga agtrabaho. Imbes nga iyadelantar ti ‘manggun-odka manipud iti awan,’ nga espiritu, ibalakadna: “No adda madi nga agtrabaho, di met koma mangan.”​—2 Tesalonica 3:10; Proverbio 13:4; 20:4; 21:25; 1 Tesalonica 4:9-12.

A dagiti dadduma makiramanda iti loteria iti bukodda a pagayatan ken dayta ket legal dina ikalintegan ti pannakiraman ti Kristiano iti dayta. Sumagmamano a gobierno pagbalinenda a legal ti dadduma a porma ti sugal, kasta met iti kinabalangkantis ken poligamia. Nupay no mabalin a legal dagita ken adu a tattao ti situtulok a makiraman kadakuada, dina kayat a sawen daytoy a dagita nga ar-aramid ket umisoda iti imatang ti Dios. Imbes ketdi, dagiti Kristiano pagreggetanda koma nga iyanninag ti panangmatmat ni David: “Iparangmo kaniak dagiti daldalanmo, O Jehova; isurom kaniak dagiti dandanam. Iturongnak iti kinapudnom ket isuronak, ta sika ti Dios ti pannakaisalakanko.”​—Salmo 25:4, 5.

No ti maysa a Kristiano pudno a kayatna a tulongan dagiti napanglaw, addaan an-anayen, wenno natataengan, mabalin a maaramidanna dayta a direkta wenno iti pamay-an a saanna nga iraman ti panagsugal.

[Dagiti Footnote]