Gatel iti Paripa—Ti Sugal ti Lubong
“KASAPULAM laeng ti maysa a doliar ken arapaap.” Ti arapaap isut’ panangabak iti jackpot a 45 milion a doliar iti paripa sadi Nueva York. Ti maysa a doliar mabalinna ti mangabak. Minilion dagiti managarapaap nga immay. Nakapilada tapno gumatang kadagiti tiket, pagsasaritaandat’ maipapan kadagiti yate, nangina nga amerikana ken dagiti mansion—bambanag a mabalinda a gatangen no abakenda ti premio a kuarta. Iti maysa a lugar, iti intero nga estado, gumatangda kadagiti tiket iti kapartak a 28,000 tunggal minuto. Iti maudi a tallo nga aldaw sakbay ti panagripa, gimmatangda iti 37.4 milion a tiket.
Idiay Japan kanayon nga okupado ti negosio kadagiti 10,000 nga autorisado a paglakuan ti paripa a sadiay ti arakan ti tattao tapno gumatang ti tiket iti Ngudot’-Tawen a Jumbo a Takarakuji (Paripa). Iti maysa a paglakuan a naireport a nakagatangan ti lima a nangabak ti umuna-premio a tiket iti napalabas a tawtawen, agarup 300 a tattao ti nakalinean idi manglukat ti paglakuan. Maysa a balassitang, a mamati a ti gasat umay iti kasapaan, nagur-uray manipud ti 1:00 t.b. Ti matarigagayan a jackpot idi napan a tawen: 100 milion yen ($714,285, E.U.) a kangatuan pay laeng.
Iti maysa a kabisera ti Makinlaud nga Africa, ti aw-awagan dagiti katutubo a Lotto College a lugar ket kanayon nga araken ti tattao nga umay gumatang iti tiket ken mangpaspasarak kadagiti masanguanan a numero. Ti atiddog a listaan dagiti napalabas a nangabak a numero ti mailaklako kadagidiay mangnamnama a makasarak kadakuada iti pamalatpatan kadagiti masanguanan a kombinasion. Kadagidiay mamati iti misterioso a pannakaammo, adda dagiti propeta a lotto nga agipadto, nga addaan bayad, kadagiti numero a pustaanda.
Karkarna a paspasamak? Saan a pulos. Ti gatel iti paripa nakasaksaknapen. Agramaram dayta iti tunggal kontinente. Rumayray dayta kadagiti nabaknang ken nakurapay a pagilian. Parasukenna dagiti agtutubo ken natataengan nga adda iti tunggal ekonomiko, sosial ken edukasional a tukad ti kagimongan.
Wen, dagiti paripa ket dakkel a negosio, ket rumang-rang-ay ti negosio. Idiay laeng Estados Unidos, dagiti paripa ti Estado nakapastrekdat’ $18.5 bilion idi 1989. Iti 27 laeng a tawen a napalabas, dayta a numero ket zero. Ngem itan dagiti paripa maikaduadan a kadakkelan a porma ti panagsugal sadi Estados Unidos, ket ti industria dumakdakkel iti 17.5 porsiento tunggal tawen, a kas kapartak ti industria ti komputer.
Ti sangalubongan a naglakuan iti paripa idi 1988, sigun iti kaudian a bilang a magun-odan iti magasin a Gaming and Wagering Business ket $56.38 bilion, maysa a nagdakkelan a bilang. Dayta aggatad iti nasurok a sangapulo a doliar iti tunggal lalaki, babai, ken ubing ditoy daga! Ket makatawen laeng dayta!
Nupay awan makailibak a dagiti paripa ket rumangrang-ayda, adut’ nakaro nga ibubusor kadakuada. Ti sumaganad a dua nga artikulo usigennat’ dumakdakkel a kinapopular dagiti paripa ken ti suppiat nga adda iti likudanda. Bayat nga usigenyo dagiti kinapudno, maikeddengyonto no dagiti paripa ket para kadakayo. Nainsiriban kadit’ makiraman? Kasano kalaka ti mangabak? Mabalin kadi a mapukawyo ti ad-adu pay ngem ti kuarta?