Ti NU​—Pamay-an ti Dios nga Agturong iti Talna?

“Maallukoyak a ti Naciones Unidas mangipaay iti kasayaatan a dalan nga agturong iti masanguanan para kadagidiay nga addaan panagtalek iti kabaelantayo a mangbukel iti bukodtayo a pagtungpalan iti daytoy a planeta.”

DAYTA a kapanunotan ti inyebkas ti dati a Sekretario-Heneral a ni Kurt Waldheim iti librona a The Challenge of Peace. Nupay aminenna dagiti pagkapuyan ti NU, inlawlawagna met: “Ti maysa masapul a bigbigenna koma a ti Naciones Unidas ket, kalpasan dagiti isuamin, maysa a bassit a lubong. Dagiti pagkapuyanna ngarud ti mabalin a maigapu a nangnangruna kadagiti panagsusuppiat a mangilasin iti komunidad ti lubong a mismo.” Innayonna pay: “Masapul nga itudok a dayta [ti NU] ket maysa laeng a mangisarming iti lubong a pagserserbianna. Dayta a lubong ket maysa a nagtitiponan dagiti kasta unay ti panagdudumada, masansan nasukir, nauyong, ken manangbusor a nasnasion.” Ngem saan amin a managkomento makitada ti NU iti kasta a nasayaat a kasasaad.

Iti libroda nga A Dangerous Place​—The United Nations as a Weapon in World Politics, da Propesor Yeselson ken Gaglione agrasonda a manipud pay idi immuna nga al-aldaw ti NU nagbalinen a lugar a pangiyebkasan iti nauyong a kababalin, ket dayta ti maysa a lugar a gubuayan dagiti panangbusor ken dagiti napolitikaan a panangtengngel isu a mangrubrob laeng kadagiti internasional a panagsusuppiat. Ket ti ngay lubong a pagan-andarannna? “Ti maisupadi ken simple a kinapudno a ta ti politika iti lubong ket pumada unay iti maysa a kabakiran. Ti nasional a kababalin kangrunaanna nairamut iti bukod a pagimbagan ken pannakalasat. Ti pannakariribuk iti naud-udi ti mangipaay iti sistema ti nasion-estado saan laeng a ti linteg iti kabakiran no di ket kasta met ti moralidadna.” Kas banagna, “ti gubat nagbalinen nga agnanayon a paset iti internasional a panaglalangen.”

Anian a maisupadi unay kadagiti natan-ok a pananginanama nga adda kadakuada idi a napirmaan ti Charter iti Naciones Unidas idi 1945! Dagiti umuna a sasao a mangisalaysay iti panggepna (preamble) kunaenna: “DAKAMI A TATTAO ITI NACIONES UNIDAS DETERMINADOKAMI a mangispal kadagiti sumaganad a kaputotan manipud iti saplit iti gubat, a naminduan iti panagbiagmi nangyeg kadagiti di maisalaysay a ladingit iti sangatauan . . . KET INKEDDENGMI TI PANAMAGKAYKAYSA ITI PANANGIKAGUMAANMI A MANGIBANAG KADAGITOY A PANGGEP.”

Uppat a pulo a tawtawen kalpasanna dayta ti kasla awanen mamaayna. Imbes nga agkaykaysada, dagiti nasion nagsisinada. Uray pay ita ti gubat ti inaldawen a kasasaad dagiti minilion iti maysa a paset iti daga wenno iti sabali! Inaldaw agsagaba dagiti tattao ken matayda kas biktima iti gubat​—nupay adda ti NU.

Siasino ti Pudno nga Adda iti Likudan ti NU?

Nupay addaanda kadagiti nagduduma a panangmatmat, dagiti dua a liblibro a naadaw nga immun-una agkaykaysada iti di ipagpagarup a detalye. Kuna ni Waldheim a ti NU ‘isarmingna ti lubong a pagserserbianna,’ ket ni Yeselson ken Gaglione ipadisda dayta a napolitikaan a lubong iti maysa a kabakiran. Gapuna ti NU masapul a pudno nga iparangarangna ti isu met laeng a linteg iti napolitikaan a kabakiran isu a pagnanaedan dagiti miembrona.

Babaen iti panangpanunottayo iti daytoy, dakkel ti interestayo a mangpaliiw kadagiti simbolismo a nausar iti Biblia. Ti Biblia saritaenna ti maysa nga “atap nga animal” ken kasta met ti “ladawanna,” a nadeskribir kas “maysa a nalabaga ti kolorna nga atap nga animal.” (Apocalipsis 13:1, 2, 14; 17:3, 8, 11) Ti umuna nga atap nga animal irepresentarna ti intero a sangalubongan a napolitikaan nga organisasion a timmaud iti napalabas a 4,000 a tawtawen ket dayta ti nagpatingga iti napolitikaan a panagdudumaduma a makita iti lubong ita.a Ngarud ania ti irepresentar ti “ladawan” dayta animal?

Sigun kadagiti gubuayan a naadawen iti ngato, ania nga organisasion ti mangisarming iti agdama a napolitikaan a sistema? Nalawag, ti NU nga addaan iti 159 a miembro a nasnasion, dagitoy ti mangbukel iti ngangngani sapasap a panangirepresentar. (Kitaenyo ti panid 11.) Ket dagiti simbolo iti Biblia iti atap nga animal maitunos a naimbag iti ladawan ti ‘napolitikaan a kabakiran.’ Nakalkaldaang ngem pudno nga adu a politiko ti nangibanagen ken mangibambanag pay laeng kadagiti napolitikaan a pilosopiada a kas atap nga an-animal​—a sirurungsot a mangpapatay kadagiti minilion a tattao, mannakigubat ken sibilian, kadagiti gubatda ken napolitikaan a panagdadangadangda. Dagiti grupo dagiti manangtutuok ken manangpapatay isuda idi ken isuda pay laeng dagiti alikamen ti napolitikaan a panangibanag iti panggep. Ket kaaduan kadagitoy met laeng a gobgobierno ken pilosopia addaanda iti mararaem a panangibagi idiay NU.

Maigapu iti naibagan, nainkalintegan kadi ti mamati a ti NU ti pamay-an ti Dios nga agturong iti kappia, nangnangruna no, babaen iti simple a dipinasion, “Ti Dios isut’ ayat”? (1 Juan 4:8) Ngem no ti NU isu ti sungbat ti Dios a maipaay kadagiti parikut, siasino ti pudno nga adda iti likudan ti NU?

Ti Biblia di mangibati iti panagduadua maipapan iti nagtaudan iti napolitikaan a sistema iti “atap nga animal” ken ti “ladawan” ti NU. Idiay Apocalipsis 13:2 mabasatayo: “Ket inted daydi dragon kenkuana ti pannakabalinna ken ti tronona ken ti dakkel a kinaturay.” Ania ti iladawan “ti dragon”? Ti isu met laeng a mannurat iti Biblia lawlawaganna dayta a “ti dragon” isu “ti managan Diablo ken Satanas, isu a mangallilaw iti isuamin a mapagnaedan a daga.” Ngem iti ania a pamay-an a ni Satanas ti mangal-allilaw iti lubong?​—Apocalipsis 12:9.

Babaen iti amin a mabalin a napolitikaan a gakat ken pilosopia, agraman ti NU, ni Satanas, ti dati a managulbod isisiasina ti sangatauan manipud iti kakaisuna a pudno a dalan nga agturong iti talna ken talged​—ti turay iti Pagarian ti Dios iti daytoy a daga. (Juan 8:44) Bayat iti ngangngani dua ribo a tawtawen, dagiti agkunkuna a Kristiano ikarkararagdan, “Umay koma ti pagariam.” Ngem ti kaaduanna awan ti nalawag a kapanunotanda no ania ti kaipapanan ti Pagarian ti Dios. Ania ti kaipapananna kadakayo? Itan ta dayta a Pagarian nakaas-asideg unayen nasken ti manggun-od iti umiso a pannakaawat iti dayta.​—Mateo 6:9, 10.

Dagiti koresponsal iti Agriingkayo! ammoda manipud iti personal a pannakilangen nga adu a napasnek ken dedikado a tattao ti agtartrabaho a mangitandudo kadagiti pangpanggep iti NU. Dagitoy a napasnek a tattao met makitada dagiti pagkapuyan ti organisasion, ngem kas ken Kurt Waldheim ken dagiti dadduma, patienda a dayta ti kakaisuna a namnama ti tao a maipaay iti agnanayon a talna ken kinatalged. Saanda nga ammo ti aniaman a nasaysayaat a solusion. Ngem adda pamusposan a mabalin a nalipatanda​—ti turay ti Pagarian ti Dios.​—Apocalipsis 11:15.

Ti Kakaisuna a Pudno a Pamay-an nga Agturong iti Talna

Ti Biblia ipakitana a ti Pagarian ti Dios tuktukoyenna ti nailangitan a panangituray wenno gobierno iti daga manipud iti naespirituan a pagturayan. (Daniel 2:44; Apocalipsis 21:1-4) Daytoy a gobierno ti Pagarian babaen ken Kristo ti agan-andaren iti sangalubongan ket agsagsagana a mangituray kadagiti adu a nasnasion dagiti tattao a maipaay iti agnanayon a biag iti sidong ti panangiturayna. Daytoy a naan-anay a nagkaykaysa a bagi dagiti tattao manipud kadagiti amin a nasnasion ken amin a pagsasao maawaganda kas Saksi ni Jehova. Dagitoy ti pudno a “nagkaykaysa a nasnasion” a ‘nangpitpiten kadagiti kamkampilanda a pinagbalin a dingding ti arado.’ Pinugsatda metten dagiti panangreppet iti racismo ken ti bassit saklawenna a nasionalismo, isu a maawagan “ti kabibilgan ken makadadael unay a puersa iti internasional a politika.” Dagidiay met laeng a reppet ti nangreppet pay laeng ken nanglapped iti NU.​—Isaias 2:2-4.

Babaen iti personal a panagadal iti Biblia, dagiti Saksi ni Jehova ammoda a ti laeng Pagarian ti Dios ti makaiyeg iti pudno ken agnanayon a talna iti daytoy a daga ken asidegen ti tiempo a panagtignay ti Pagarian ti Dios. (Lucas 21:31-33; Apocalipsis 16:14, 16) ‘Ania a panagtignay?’ mabalin nga imtuodenyo. Ti pannakadadael dagidiay sipapakinakem a mangdaddadael iti daga. (Apocalipsis 11:18) Daytoy iramanna ti panangdadael kadagiti amin a nabingaybingay a napolitikaan nga elemento. (Daniel 2:44) Gapuna dagiti Saksi ni Jehova dida awaten ti di umiso ken mangallilaw a solusion​—ti NU. Ngem apay a daytat’ di umiso?

Ti maika-17-siglo a pilosopo a Dutch a ni Spinoza depinarenna ti talna kas “saan a ti kinaawan ti gubat” no di ket ad-adu pay ti saklawenna. Kinunana: “Dayta ket maysa a kababalin, kasasaad iti panunot, maysa a kapanunotan iti kinaimbag, panagtalek, kinahustisia.” Dayta maibanag laeng babaen ti panangsursuro kadagiti tattao iti ayat ken panagtutunos imbes nga iti gura ken panagsisina. Kas inlanad ti nannurat iti Biblia a ni Santiago: “Ti bunga ti kinalinteg maimula iti talna a maipaay kadagiti agar-aramid ti talna.” (Santiago 3:18) Babaen iti sangalubongan a trabahoda a panangisuro dagiti Saksi ni Jehova isursuroda dagiti daldalan ti Dios a maipaay iti talna, ta kunaen ti Saona: “Ket amin dagiti annakmo maisuronto kadakuada ni Jehova ket dakkelto ti talna kadagiti annakmo.”​—Isaias 54:13.

No tarigagayanyo a maammuan ti ad-adu pay maipapan iti gobierno ti Pagarian ti Dios, sapulenyo laeng dagiti Saksi ni Jehova iti lugaryo. Maragsakandanto a tumulong kadakayo a mangammo iti dalan ti Dios nga agturong iti talna.

[Dagiti Footnote]

[Kahon iti panid 11]

Kangrunaan a Parparikut a Mangapektar ti NU

1. Salisal iti nuklear nga armas ken ti panagkinnarit ti E.U.A.-U.S.S.R.

4. Droga, internasional a negosio

5. Internasional a terorismo

7. Panagwaywayas ti Namibia manipud Sud Africa

8. Riribuk ti Israel ken Palestina

9. Riribuk idiay Lebanon

10. Panagrupak ti Iran-Iraq

11. Makin-abagatan nga Asia, panangsakop ti Vietnam, iti Kampuchea

13. Afghanistan, pannakibiang ti Union Soviet

15. Panangabuso kadagiti kalintegan ti tao

Daytoy a listaan naibatay kadagiti palpalawag a naiparang idiay maika-39 a gimong iti General Assembly iti NU idi 1984 babaen kadagiti 150 a pannakabagi, agraman dagiti 16 a papangulo iti estado wenno gobierno. (Kitaenyo ti UN Chronicle, Tomo XXI, Numero 8/1984.)

[Kahon iti panid 11]

No Kasano nga Immadu dagiti Miembro ti NU

[Ladawan iti panid 9]

Dagiti bandera dagiti 159 a miembro a nasnasion a naipakita iti sango ti NU

[Ladawan iti panid 10]

Siasino dagiti ‘nangpitpiten kadagiti kampilanda a pinagbalin a dingding ti arado’?