Manipud Kinabaknang a Nagturong iti Kinapanglaw—Ken Kinaragsak
Kuarta. Droga. Sekso. Dagitoy a bambanag ti nangawis kadagiti adu nga agtutubo nga agbiag a maipaay ita nga aldaw nga estilo ti panagbiag. Ngem dagiti kadi kakasta a panggep pudno a makaiyeg iti kinaragsak? Basaenyo ti pudpudno iti biag a salaysay ti maysa a babai a nakasursuro iti narigat a pamay-an—manipud personal a kapadasan. Ipakitana no kasano a dagiti prinsipio ti Biblia ket maysa a nabileg a puersa a mangbalbaliw iti personalidad a maipaay iti nasaysayaat.
IDI 1948, idi agtawenak pay laeng ti tallo nga aldaw, tinagibinak ti upper-middle class a pamilia. Limakami iti pamilia—dagiti nangtagibi a dadakkelko, ti dua nga annakda a babbai, ken siak. Sadiay tinagiragsakko ti makapnek, natalged a biag. Iti pagalagadan ti lubong addaankamin kadagiti isuamin. Kaaduan a panageskuelak ket idiay eskuelaan publiko, nupay iti dua a tawen pudno a nageskuelaak iti maysa nga eskuelaan a Katoliko a kasapulan ti panagnaedmo sadiay.
Impaay dagiti dadakkelmi ti isuamin a tarigagayanmi—dagiti leksion iti ballet, tennis, panagsakay ti kabayo. Addaankami iti bukodmi a paglanguyan, ket nairamanak iti pannakisalisal iti panaglangoy ken ti water ballet. Pudno a diak nabigbig a ti biag dagiti dadduma ket naiduma iti panagbiagmi agingga nga addaakon iti kinatin-edyerko ken ngangnganiakon agraduar iti high school. Ngem idin dagiti panagmartsa a maigapu iti sibil a kalintegan idi 1960’s ti namagbalin kaniak a managpanunot maipapan iti panangidumduma ken ti kinapudno a saan a tunggal maysa ket napanglaw gapu iti kinasadut.
Rinugiak ti nagduadua kadagiti bambanag a naisuro kaniak idiay eskuelaan a Katoliko. Maysaak a napasnek iti panagdayaw. Kinapudnona, bayat iti sumagmamano a tawtawen tinarigagayak ti agbalin a madre. Ngem dagiti salsaludsodko saanda a nasungbatan. Nangrugin a nagduaduaak iti pammatik.
Nakitak a sumagmamano laeng a tattao ti makabael nga agbiag a kas kaniak, ket impagarupko a saan a nainkalintegan daytoy. Dagiti dadakkelko bassit laeng ti pannakipagriknada kadagiti napapanglaw a tattao. Mariknada, a ‘No agtrabaho laeng dagiti napanglaw a sigagaget ken adda panangikagumaanda, mabalinda met ti maaddaan iti adda kadakami.’ Mariknak a kasla diak maikari kadakuada; nagbalinak a naliday.
Babaen kadagiti kakasta a kababalin a nanglikmut kaniak, nagturongak kadagiti dadduma pay a bambanag—nangnangruna ti panaginum ken lallaki. Inar-arapaapko ti pannakiasawa iti maysa a managkanta iti rock, gapuna nakikaduaak laeng kadagiti lallaki iti grupo a rock. Indiankon dagiti ar-aramid ti pamilia ket nagbalinak a parikut nga anak. Idi agtawenakon iti 16, nasukirakon ken din magawidan, a mangpatpataudak iti adu a rigat iti pagtaengan. Iti rabii, rummuarak nga uminum ken makiturog kadagiti lallaki ket naaddaanak iti dakes a pakasarsaritaan idiay eskuelaan. Nauman dagiti dadakkelko, ket idi nagraduarakon idi Hunio 1966, nangabangda iti kuarto a maipaay kaniak idiay San Francisco ket pinapanawdakon iti balay.
Nasabetko ti maysa a lalaki a managan Patrick. Nagayatak kenkuana ket inkeddengmi ti mapan idiay Nueva York, a sadiay ti naggapuanna. Nakipagnaedak kenkuana ken ti pamiliana bayat ti sumagmamano a bulan. Di nagbayag nauman kaniak ket inyam-ammonak ken Parish, maysa a babai a naam-ammona idiay Greenwich Village. Nakikuyogak kenkuana.
Bassit laeng ti kuartana idi nagam-ammokami, ngem dayta di nagbayag naibusen, ket nagnaedkamin kadagiti kalsada. No dikam makasarak iti siasinoman a mabalinmi a pakiturogan iti rabii, agtomarkami iti droga ket siririingkami nga agpatnag, nga agpalpalimos iti kuarta kadagiti kankanto ti kalsada wenno kadagiti estasion iti subway. No dadduma makagun-odak iti trabaho iti bar ket agdawatak kadagiti inumen manipud kadagiti lallaki tapno paaduen ti paglakuan, ta suelduannak ti bar iti panangaramidko iti daytoy. Nagtrabahoak met kas modelo a pornograpiko ken kas maysa a balangkantis. No dadduma sigaganetget nga agsapulkami iti taraon kadagiti pagbasuraan iti ruar dagiti restaurant. Wenno sumrekkami iti restaurant ket kanenmi dagiti sobra ti maysa iti plato. Kalpasanna takawenmi ti tip tapno makagatangkami iti kape.
No dadduma ti laeng kawesmi isu ti adda iti bagimi. Literal a naggapuak iti kinabaknang a nagturong iti kinapanglaw. Dagiti kabbaro a kawes no dadduma ti agtaud kadagiti baknang, a gumatang iti kawesmi a kasukat iti panangpennek iti sekso. Naminsan, tarigagayak unay ti maysa a kagay ta simrekak iti maysa a dakkel a department store, insuotko ti napintas a kagay a maipaay iti kalam-ekna, ket rimmuarak—a diak nagbayad, siempre!
Maysa kadagiti grupo iti musika sadiay Village ti nakigayyem kadakami, ket babaen kadakuada a naiyam-ammo kaniak ti marihuana. Bayat dagiti sumaganad a lima a tawtawen, nagtomarak kadagiti dadduma a droga—LSD (literal a ginasgasut a daras), THC, amphetamines, heroin, cocaine, opium, hashish, ken adu a dadduma pay. Kalpasanna nagtrabahoak iti maysa a dakkel a grupo iti droga, nga agbiabiahe iti nagbaetan ti San Francisco ken Nueva York nga addaan kadagiti maleta a napno iti marihuana.
Kalpasan ti sumagmamano a bulan idiay Nueva York, ni Parish ken siak ti nakasarak iti pagluganan a mapan idiay Hollywood. Sadiay naam-ammok ni Carol, maysa a babai a nakaduak iti boarding school. Impalubosna a ni Parish ken siak ti makikadua kenkuana.
Iti daytoy a tiempo agtomtomarkami kadagiti “nalabaga,” a dagitoy ti barbiturates (pangpakalma). Agtomarak iti innem agingga iti pito a pildoras iti inaldaw. Adu a rabii a maulawkami iti droga, kalpasanna mapankami idiay Sunset Strip tapno agimdeng iti musika a nakapigpigsa a matokar kadagiti klab. Maysa a rabii idi inaramidmi daytoy ken ni Carol, dua a lallaki ti immay kadakami a nangitukon iti marihuana, isu nga inawatmi. Inlugandakami iti kotseda, ket ti nagbanaganna namaloak ken narames.
Nakatalaw ni Carol ket nangayab iti polis. Immay a dagus ti polis ket tiniliwna ti lalaki a nangabuso kaniak. Inusisadak ket naammuanda a sapsapulendak gapu iti tiket ti pannakiluganko a diak binayadan, gapuna inarestodak. Isut’ winayawayaanda. Naibaludak.
Maysa a tawen kalpasanna, idi Mayo 1968, nagbiaheak a napan idiay Nueva York ket nakikaduaak manen ken ni Patrick. Di nagbayag nagsikogak iti anak ni Patrick. Dina tarigagayan ti ubing, gapuna nagsubliak idiay San Francisco. Saanak a naasawaan ken agmaymaysa, ket ngangnganiakon agbalin nga ina. Maamakak unay ta rinugiakon ti mangpanunot iti panagsusaid.
Idi walo a bulanen ti sikogko, immawag ni Patrick ket imbagana a tarigagayanna ti agsubli. Kasapulanna ti $450.00, ket intedko kenkuana. Sisasaganaak a mangaramid iti aniaman tapno mapagsublik! Kasapulanna met ti sumagmamano a sursurat manipud kaniak a maipaay iti draft boardna. Nagsuratak kadagiti sursurat nga imbagak a supsuportarannak ni Patrick. Pagarupek a dagiti sursuratko ti nakatulong, ket, inikkatda ni Patrick kadagiti inkapilitan a panagserbi iti militaria. Ngem kalpasanna awanen a pulos a naammuak maipapan kenkuana. Dua a lawas laeng kalpasanna, idi Pebrero 18, 1969, nagpasngayak iti maysa nga ubing a babai.
Iti daytoy a tiempo nabigbigko a saan laeng a kastoy ti biag iti lubong nga ammok. Napadasak nga agpadpada ti kasasaad ti dua a lubong—kinapanglaw ken kinabaknang—ngem kaskasdi a saanak a naragsak. Rinugiak ti nagsapul iti sadinoman a maipaay iti sungbat.
Gaput’ agsapsapulak pay laeng iti sungbat, idi Disiembre 1970 nakikaduaak iti movimiento a Jesus a maawagan The Way. Makikabkabbalayak iti maysa nga agtutubo a lalaki a managan Steve, ngem awan kadagiti adda iti movimiento ti mangdildillaw iti dayta. Iti dayta a tiempo nakasabetak ti maysa a Saksi ni Jehova. Addaak iti Market Street idiay San Francisco idi a maysa a Saksi ti immasideg kaniak. Inimtuodna no maysaak a Kristiano. “Wen!” kinunak. Maragsakanak unay iti pannakisaritak iti maysa a tao maipapan iti Biblia.
‘Apay a nakaad-adu ti riribuk iti lubong?’ inimtuodko kenkuana. Impakitana kaniak ti Mateo 24:3-13, ket inlawlawagna a ti agdama a kasasaad ti lubong ket paset iti maysa a “pagilasinan” a mangipakpakita nga agbibiagtayon iti tiempo ti panungpalan. Kalpasanna imbagana kaniak no kasano a ti Pagarian ti Dios din agbayag iyegnanton ti talna ken kinatalged iti sangatauan ket pukawenna ti ipapatay, panaglakay, ken sakit. (Apocalipsis 21:3, 4) Anian a nagpintasan a masanguanan ti imbalabalana! Nangituding iti panangirugina iti maysa a panagadal iti Biblia kaniak iti dayta a rabii iti alas siete.
Idi nagawidak, dagus nga imbagak ken ni Steve dagiti amin a makaparagsak a bambanag a naammuak. Ngem di nakiraman iti ragsakko. Kinapudnona, imbagana a dagiti Saksi ket Antikristoda ket al-allilawenda dagiti kabbaro a Kristiano. Imbagana kaniak a saanak a makisarita kadakuada. Nagtalekek ken ni Steve, gapuna siniguradok nga awanak sadiay no umay ti Saksi.
Sumagmamano a lawas kalpasanna nagsikogak iti anak ni Steve. Dina tarigagayan ti ubing ket timmalaw. Gapuna adtoyak manen, di naasawaan, agmaymaysa, ken masikog. Diak kayat ti aglasat manen iti sabali a panagsikog, gapuna idi uppat a bulankon, napanak iti maysa a lokal nga ospital tapno agpairegreg. Nasaem agpada iti pisikal ken emosional. Ginargarida ti panagpasikal, ket idi rimmuaren ti ubing, imbatidan iti maysa a garapon iti sanguanak bayat ti rabii. Isut’ maysa a lalaki. Ania ti inaramidkon? Awan ti kalintegak a mangilibak iti anakko a lalaki iti kalintegan nga agbiag. Dayta ti mangrirriribuk kaniak agingga itoy nga aldaw.
Sumagmamano a bulan kalpasanna, idi Agosto 1971, nasabetko ti maysa a babai a nakaduak idi iti pagtaengan a komon idiay San Francisco. Isut’ nagbalinen a maysa a Saksi. Nagsaritakami iti kasta unay. Inyam-ammonak iti maysa a Saksi a babai, isu a nangitukon a makipagadal kaniak iti Biblia. Iti daytoy a tiempo diak sinayang ti tiempo a nangrugi a nakipagadal iti Biblia iti daytoy nga ingungoten a babai, isu a nagbalin a kasla maysa nga ina kaniak. Isu ken ti asawana ti nangisuro kaniak saan laeng a ti Biblia no di ket ti pay personal a panagdalus, panangaywan iti ubing, panagtagibalay, panaggatang, ken dadduma pay a praktikal a bambanag. Inggatangandak kadagiti kawes ken maysa a nabara a kagay a maipaay iti kalam-ekna.
Ammok nga addada dagiti panagbalbaliw nga aramidek. Uray pay sakbay ti umuna a panagadal, simmardengakon a nagsigarilio (agsigarilioak iti tallo a pakete iti inaldaw) ket indianko metten ti droga. Inkarikon iti pusok a suroten ti linteg ni Jehova maipapan iti seksual a moralidad. Rimmang-ayak agingga iti punto nga, idi Hunio 17, 1972, insimbolokon ti dedikasionko ken Jehova a Dios babaen iti panagpabautismok.—1 Corinto 6:9-11.
Itan, agarup 13 a tawtawenen kalpasanna, simamatalek pay laeng nga agserserbiak iti Namarsuak. Ti anakko a babai, nga itan 16 ti edadnan, nabautisaranen idi Marso 12, 1983. Idi Oktubre 1975 nakiasawaak iti maysa a lalaki, maysa a Saksi ni Jehova, a maysa a nagsayaatan nga ulo ti pamilia, ken naayat nga asawa ken ama iti tallo nga annakmi. Ket nanipud idi Pebrero 1, 1982 naaddaanak iti rag-o a nagserbi iti ministerio kas maysa a regular a payunir, a mangipapaay iti 90 nga or-oras iti binulan iti dayta a trabaho.
Kamaudiananna nasarakakon ti kinaragsak!—Naipatulod.
[Blurb iti panid 17]
Idi addaakon iti high school, nasukirakon ken din magawidan, a mangpataudak iti adu a rigat iti pagtaengan
[Blurb iti panid 18]
Awan ti kalintegak a mangilibak iti anakko a lalaki iti kalintegan nga agbiag. Dayta a kapanunotan ti mangrirriribuk kaniak agingga itoy nga aldaw
[Blurb iti panid 19]
Nanipud idi 1982 naaddaanak iti rag-o a nangipaay iti 90 nga or-oras iti binulan iti panangisuro ti Biblia kadagiti dadduma