Dakayo a Managbilag Agannadkayo!
BAYAT ti panagturong dagiti tattao itan kadagiti napupudot nga igid ti baybay kadagiti dadduma a paspaset iti lubong ken kadagiti pagbilagan a silsilaw kadagiti dadduma a luglugar, masapul nga ipangagda ti pakdaar nga inted ti ACS (American Cancer Society).
“Ti nalabes a pannakaisarang iti init,” kuna ti ACS, isu ti kaaduanna a gagangay a makagapu iti kanser iti kudil. Siasino dagiti ad-adda nga agpeggad? Nupay no awan ti mailaklaksid kadagiti makadadael nga epekto iti init, maysa a polieto ti ACS a, Fry Now. Pay Later., mamakdaar kadagiti “managbilag a gagaraenda nga isarang dagiti bagbagida iti radiasion ti ultraviolet iti silnag ti init.” Kunaenna: “Dagiti tattao a nalaka a mauram ti kudilda babaen iti init ken dagiti napudaw ti kudilda ken nalabaga ken olandes ti buokda ti ad-adda a nalaka a makapataud iti kanser iti kudil.” Ket ti peggad nangatngato kadagiti luglugar a sadiay nakaro ti pudot iti intero a makatawen.
Kadagiti 450,000 a kabbaro a kaso iti kanser iti kudil a maipadamag iti tinawen idiay Estados Unidos, ngangngani 22,000 a kaso ti naresita a kas malignant melanoma—ti saan unay a gagangay ngem ad-adda a serioso a kangrunaan a kanser iti kudil—isu a mangrugi iti selula ti kudil a mangpataud kadagiti nasudi a kolor a maawagan melanin. Dagiti melanoma ti mabalin a mangrugi iti mismo wenno asideg iti kamiding. Dagitoy ti nailasin babaen iti kolor kape wenno nangisit a kolor ket napartak nga agsaknap kadagiti dadduma a paspaset iti bagi.
Kasano a mailasin ti maysa ti gagangay a kamiding ken ti melanoma? Nupay no ti laeng pamay-an ti panangammo tapno sigurado isu ti panangkita iti mangngagasyo, ti polieto a Why You Should Know About Melanoma, nga impablaak ti ACS iti pannakitinnulong iti American Academy of Dermatology, ilistana dagiti uppat a pakdaar nga “ABCD” a pagilasinan iti melanoma: ti Asymmetry (ti kagudua sabali ti itsurana iti kagudua), Beddeng wenno igidna saan nga agpapada (ti igidna saan nga agpapada, adda girayna, wenno nakusnaw), Kolor (saan nga agpapada ti kolorna), ken Diametro dakdakkel ngem 1/4 pulgada (6 mm) (aniaman a kellaat ken panagtultuloy ti idadakkelna ti nangnangruna a pakaseknan).
No mailasinen ti sakit a nasapsapa pay, nasaysayaat dagiti gundaway iti pannakaagasna. Ngem ti nasaysayaat pay, ipaganetget ti ACS, kaaduan a kanser iti kudil ti mabalin a malapdan babaen iti basta panangusar iti nasayaat a pangngeddeng ken ti panangliklik iti napudot nga init iti tengngat’ aldaw, babaen ti panangusar kadagiti sunscreens idiay igid ti baybay wenno kadagiti paglanguyan, ken babaen ti panaglinong.