Manipud Managbasatayo

Nasayaat a Salun-at

Pagyamanan iti artikulo a “Good Health Is Good for Business.” (Pebrero 22, 1987 nga Awake!) Diak agtartrabaho iti ruar ti pagtaengan, kasta unay ti panagtrabahok iti pagtaengan nanipud idi rinugiak ti kanayon a panagehersisio makatawenen ti napalabas, ken kasta met limmag-anak iti 80 libra.

J. W.., Estados Unidos

Acne

Ti artikuloyo maipapan iti acne ket naisangsangayan ti panaginteresko, agsipud ta daytoy a parikut rurodennak iti kasta unay idi maysaak pay a tin-edyer. (Pebrero 22, 1987 nga Awake!) Ti nakatulong kaniak ket maysa a remedio nga inted ti maysa a baket a taga Bolivia. Adtoy. Manganka iti adu a natural a yogurt, nasaysayaat no awan ti asukarna. Agdiram-os nga inaldaw iti danum a nalaokan iti tubbog ti lemon (maysa a lemon iti maysa a litro a danum). Mangipunas iti diro iti rupa iti maminsan iti maysa a lawas, a baybay-an dayta iti uneg ti maysa nga oras.

J. D. S., Brazil

Maragsakankami ta nakatulong ti remedio. Ti “Agriingkayo!” saan a mangirekomendar iti aniaman a partikular a remedio. Ti agkurri iti maysa a tao mabalin a saan a kanayon nga agkurri iti sabali.​—ED.

Namnama Maipaay kadagiti Agsakit ti Isipna

Kasta unay ti pannakaawismi kadagiti artikuloyo maipapan iti “Namnama Maipaay kadagiti Agsakit ti Isipna.” (Pebrero 8, 1987) Ti grupomi, ti Nova Scotia Friends of Schizophrenics, ket addan nanipud pay idi 1981. Naglasatkami kadagiti adu a panagaburido ken parparikut kas gagayyem ken kakabagian dagiti agsagsagaba manipud iti schizophrenia. Main-inot ti panagballigimi a “mangikkat” iti sakit no mataming dayta ken maay-wanan. Ti panagsirarakyo ken ti umiso unay a panangipadamagyo kadagiti tallo nga artikulo ket nagsayaatan ket adu ti maitulongna iti panangsursuro iti publiko tapno makaawatda ken makatulongda.

C.L.C., Canada

Pannakaipasngay? Wenno Aborsion?

Nabasak dagiti artikuloyo maipapan iti “Pannakaipasngay? Wenno Aborsion?” (Abril 8, 1987) Nasarakak dagitoy a nagsayaatan, nasayaat ti pannakaisuratna ken napno ti impormasion. Agsuratak saan laeng a kas managbasa no di ket kas maysa a mangngagas a mangkomendar kadakayo. Maipaspasangoak kadagiti pasiente a magaramid iti pangngeddeng maipaay iti aborsion. Itedkonto daytoy nga isyu kadagidiay pasiente a mangpampanunot iti panangipatingga iti sikog. Agsuratak manipud iti kapadasan maipapan iti daytoy a banag. Saan a gapu ta mangaramidak iti aborsion no di ket naminsan siak a mismo ti ngangngani nairegreg. Nagsikog ni nanangko sumagmamano a bulan laeng kalpasan ti pannakaipasngay ti kabsatko a babai. Agpadada ken ni tatangko a nangpili iti aborsion, ta dida kabaelan ti maaddaan iti sabali pay nga anak iti kasta a kaasideg. Iti dalanna a mapan iti opisina ti doktor, nagbaliw ti panunot ni nanang. Naipasngayak maysa a tawen ket dua nga aldaw kalpasan ti pannakaipasngay ti kabsatko a babai. Maysaakon a mangngagas iti obstetrics-gynecology, maysa nga asawa a lalaki, ken ama. Inanamaek a dagitoy nga artikulo tulongannanto dagiti pasiente a makakita iti kinapateg iti biag iti nainlangitan nga Amatayo.

R.R., M.D., Estados Unidos

Agyamanak iti Adda Kaniak

Kalkalpasko pay laeng a binasa ti “Agyamanak iti Adda Kaniak” a surat ni Lindsay Stead. (Mayo 8, 1987) Daytoy ti makatignay-unay-puso nga estoria a nabasak bayat iti nabayagen a tiempo. Dayta pagbalinennak a makabasol unay no panunotek a no dadduma agreklamoak nga awan ti gapgapuna. Pinagluanak ti salaysay.

S. v. A., Simbabwe