Ibibisita ti Papa Pabaruenna ti Dati a Sugsugat
BAYAT ti ibibisita ti papa idiay Alemania idi napalabas a Mayo, tinukoyna “ti rigat a linak-am ti Iglesia idi panawen dagiti Nazi.” Impadamag ti Kölner Stadt-Anzeiger daytoy, ket innayonna: “Saanna a dinakamat a dadduma a kangrunaan a klero a Katoliko ti awanan iti tured, a mangikasabada kadagiti sermon a pangsuportar kadagiti eskuelaan iti denominasion ngem saanda a busoren ti pannakaidadanes dagiti Judio.”
Ti seremonia iti pannakaikeddeng ni Edith Stein a bendita idiay langit—maysa a Judio a nakumberte iti Katolicismo—ket nagbalin met a sentro iti suppiat. Dagiti Judio agkedkedda iti pannakairepresentarna a kas maysa a Katoliko a martir. Ti Nürnberger Nachrichten kinunana: “Ni Edith Stein ket naikeddeng a maysa a martir a maipaay iti Nakristianuan a pammati, isu a saan a naan-anay a pudno. Isut’ napapatay iti gas chamber idiay Auschwitz idi 1942 kas maysa a Judio, saan a kas maysa a Katoliko a madre.” Maysa a grupo dagiti Katoliko ti nagkuna a ti pannakaikeddengna a bendita ket maysa a panangikagumaan a mangpalag-an wenno mangpabassit iti “nakababain a kinaulimek ti Iglesia Katolika kalpasan ti panagturay dagiti Nazi.” Ti sabali pay a Katoliko a grupo ti nagkuna a ti pannakaikeddengna a bendita “saan koma a mangbulsek kadatayo iti kinapudno a dagiti obispo a Katoliko saanda a nagkedked, no di ket sipapanayag a nakitinnulongda iti sistema ti National Socialist.”
Dadduma a kritiko kalikagumanda iti panangamin ti Iglesia Katolika iti basol gapu iti kinaulimekna bayat iti Holocaust, ngem awan ti dimteng. “Bayat ti pannakigimongna kadagiti obispo iti napalabas a rabii,” kinuna ti report ti Süddeutsche Zeitung, “ti papa kasta unay ti kinaannadna iti panangsagidna iti daytoy a siit iti konsiensia ti iglesia. Bayat ti kinadiktador ti Nazi, ti Apostoliko a Seseda sinapulna babaen iti pannakitulag ‘ti manglapped iti kadadaksan’ ngem ‘saanna a nabaelan a pinasardeng ti makadidigra a napasamak.’ Kinuna ti papa a di makakita iti rason a mangpabasol kadagiti obispo nga Aleman gapu iti kinaulimekda.”