Manipud Managbasatayo
No Nalaka ti Panagimemoria
Tarigagayak a patalgedan no kasano a makagunggona ti artikuloyo maipapan iti panagimemoria. (Hulio 22, 1987) Ti uppat-ti-tawenna nga anakko nakabusbosen iti adu a tiempo a kaduak iti ministerio a panagbalaybalay. Tapno matulongak a saan a mautoyan, impaimemoriak kenkuana ti Salmo 83:18, isu a pagragsakanna met a saritaen iti ruangan, a nakaukag ti Bibliana. Iti uneg ti dua a lawas, nabasak ti artikuloyo maipapan iti panagimemoria ket inkeddengko a tulongan a makaammo ti ad-adu pay a kasuratan. Daytoy a bulan sarsaritaennan ti Juan 17:3 iti ruangan no maitutop dayta. Daytoy a lawas maysa a lalaki nagkedked iti panangiramanko iti maysa a bersikulo kenkuana, ket idi iserrana koman ti ruangan, ti uppat-ti-tawenna nga anakko kinunana: “Mabalinko kadi ti mangiraman ti kasuratan kenka?” Dagdagus a kinunana a wen ket linukatanna manen ti ruangan.
B. C., Estados Unidos
Namnama Maipaay kadagiti Agsakit ti Isipna
Bayat iti 12 a tawtawen maysaak a biktima iti sakit ti isip, nga agsagsagaba iti adu a rigat, pannakaupay, ken kinakurang iti pannakaawat dagiti dadduma, nupay adda ti medikal a panangagas ken pannakaaywan manipud iti maysa a naayat nga asawa. Makitayo, diak awaten ti kinapudno nga agsakit ti isipko no di ket ipabiangko dagiti parparikutko kadagiti dadduma a makagapu. Dagiti artikuloyo iti “Namnama maipaay kadagiti Agsakit ti Isipna” (Pebrero 8, 1987) ti nangtignay kaniak a mangamin. Naawatak a ti sakitko ket saan a nagtaud iti demonio, a kas ti pagarupko, ket inawatko ti sabali a panangilawlawag ket timmulokak a nagpaagas. Anian ti panagyamanko iti Agriingkayo! a maipaay iti tulong nga impaayna iti daytoy ken kadagiti dadduma pay a bambanag!
A. A. C., Brazil
Pannakibagay iti Kabsat a Lalaki wenno Babai
Kayatko ti agyaman kadakayo maipaay iti artikulo nga “Agimtuod dagiti Agtutubo . . . Apay a Nakarigrigat ti Makibagay kadagiti Kakabsatko?” (Hulio 22, 1987) agtawenak iti 16 ket addaanak iti dua a kakabsat a lallaki. Masansan a parurodendak, ket no dadduma tinarigagayakon nga adda koma dakes a mapasamak kadakuada. Nupay kasta, nabigbigko nga iti kaungan ti pusok inay-ayatko ida. Pudno nga inkagumaak ti mangliklik iti panagpungtot iti tunggal angawendak. Ti maudi a parapo iti sidong dagiti subtitulo a “Kaykayatnaka ni Nanang!” ken ti “Panangparmek iti Panagimon” ti nangtulong iti kasta unay kaniak. Makitak itan a kaslaak laeng kadagiti kakabsat ni Jose nga agimon kenkuana.
S. L., Guadeloupe
Kayatko ti agyaman kadakayo maipaay iti artikulo nga “Agimtuod dagiti Agtutubo . . . Apay a Nakarigrigat ti Makibagay kadagiti Kakabsatko?” Addaanak iti dakkel a kabsat a lalaki a kankanayon a kaap-apak, ngem sumaysayaaten ti pannakilangenko kenkuana. Ket gapu ta nabasak ti artikuloyo, ikagumaak pay nga aramiden ti kasta. Agyamanak manen.
L.M., England
Dagiti Artikulo Maipapan iti Papa
Kas dagiti Kristiano a Katoliko, nabasami dagiti addaan impormasion a magasin a buyogen iti interes, ket agyamankami iti panangiparangyo iti pudno nga impormasion maipapan iti papa. (“Karkararag a Maipaay iti Kappia—Siasino ti Dumngeg?” Hunio 8, 1987; “Ti Isasarungkar ti Papa iti Australia—Panagbiahe Laeng Aya a Nasantuan?” Hulio 8, 1987) Nupay no dagiti sursuroyo ket maikontra iti Katolicismo, maragsakanak a makakita a nainkalintegan ti panangtamingyo kadagita a tema.
P.O., Pederal a Republika ti Alemania