Manipud Managbasatayo

Nalaka a Panagimemoria

Agsursuratak kadakayo maipapan iti artikulo a “When Memorizing Comes Easy.” (Hulio 22, 1987 nga Awake!) Adda maysa a paset iti tema nga addaan koma iti nasayaat nga epekto ngem bassit laeng ti pannakadakamatna. Dayta ti panangsalimetmet kadagiti ubbing a saan nga agbalin a natangsit gapu ta nalakada a makaimemoria. Kunak dayta gapu iti bukodko a kapadasan. Idi uppat ti tawenko, agimemoriaak kadagiti teksto ti Biblia; idi lima ti tawenko agbalaybalayakon iti ministerio; ket idi innem ti tawenkon mangipapaayakon kadagiti palawag iti eskuelaan iti ministerio. Pagtangtangsitko dayta, ket pagarupko a siak ti kalaingan. Itatta makitak no kasano a kinamaag dayta. Adda ti maysa nga agtutubo iti kongregasionmi a mangar-aramid kadagita met laeng a bambanag, ket saan a matubngar! Pangngaasiyo ta pakdaaranyo dagiti nagannak a dida baybay-an dagiti annakda a tumangsit tapno ti napasamak kaniak saan a mapasamak kadakuada.

F. R., Brazil

Pudno nga apresiarenmi ti kinapateg ti panangar-aramid dagiti Kristiano a nagannak kadagiti amin a kabaelanda a mangpatanor kadagiti annakda dagiti kualidad iti kinapakumbaba, kinaemma, ken ti kinanainkalintegan. (Proverbio 11:2; Mikias 6:8; Roma 12:3; Santiago 3:17; 4:6, 10) Kuna ti artikulo: “Ti napateg a banag, kalpasanna ket, saan a gapu ta ti anakyo pagsiddaawenna dagiti dadduma no di ket dakayo ken isu addaan iti nabara, naayat a tiempo a mangammo no ania ti kunaen ti Sao ti Dios.” Ngem maragsakankami a mangpalawa iti dayta a kapanunotan ditoy. Ti kangrunaan a nakaisentruan iti artikulo ket dagiti ubiing mabalin a makasuroda iti nasapa pay nga edad ken dagiti Kristiano a nagannak masapul a gundawayanda daytoy nga abilidad babaen iti panangirugi a mangisuro kadakuada kadagiti napapateg a bambanag, nangnangruna kadagidiay a naadaw manipud iti Biblia, isu a makaipaay iti napaut a gunggona kadagiti ubbing agraman dagiti dadakkelda.​—ED.

Naapgad nga Inumen a Mangispal Biag

Agyamanak iti kasta unay iti nakaskasdaaw nga artikulo a “Naapgad nga Inumen a Mangispal Biag!” (Pebrero 22, 1986) Ti ingungotenmi nga anak a lalaki kanayon agibleng ket iti malem nagsarsarwa ken napakapsutanen. Limneken dagiti matana, nagluyloyen ti kudil ti tianna. Pinanunotmin nga ipan idiay ospital, ngem idin ti asawak nalagipna dayta nga artikulo, ket sinapulmi iti salansanmi. Nangisaganakami ti inumen sigun iti artikulo ket intedmi iti anakmi. Di nakapapati no kasano ti panagimbagna. Iti sumaganad nga aldaw isut’ ngangngani maimbaganen. Agyamankami iti kasta unay iti daytoy nga impormasion.

M. S., Brazil

Maay-ayokami a makakita a dayta a simple a remedio ket nakatulong. Siempre, kayatmi nga ipaganetget a dayta a naisingasing a panangagas ket saan a nairanta a kasukat iti kasapulan a propesional a medikal a panangagas.​—ED.

Agyamankami iti kasta unay iti artikuloyo a “Naapgad nga Inumen a Mangispal Biag!” Nabiit pay ti asomi a naopera a serioso iti dori. Sumaruno iti pannakaopera, adda komplikasionna a porma iti nakaro a panagibleng gapu iti resulta dagiti nairesita a pangpakalma iti ut-ot. Saan a nagballigi ti beterenario a nangpasardeng iti kumarkaro a kasasaadna. Nalagip ti asawak ti naibaga iti ngato nga artikulo. Kalpasan ti panangsapulmi iti dayta, dagus a pinunnomi ti pingganna iti solusion ket binuyami a nanginum iti dayta a sigagagar. Iti nagpatnag simmayaaten ti kasasaadna, ket itan agpapaimbagen. Ti artikuloyo ket pudno a manangispal-biag para kadagiti amin, agpadpada kadagiti tattao ken an-animal.

S. M., Estados Unidos