Eskandalo iti Sekso Ibutaktakna dagiti Ebanghelista iti TV
KADAGITI nabiit pay a tiempo nagsasaruno dagiti ebanghelista iti TV a naibutaktak gapu iti di umiso a seksual a kababalin. Naibutaktak a ti anak ti dati nga ebanghelista a ni Pat Robertson, maysa a kandidato iti kinapresidente iti E.U., ti nainginaw iti ruar iti panagasawa. Ket ti sabali pay nga ebanghelista, ni Jim Bakker nga isu ti kalalatakan, ti naibutaktak a mannakikamalala.
Ti naud-udi pay nga eskandalo, nupay kasta, ti nagrikos ken ni Jimmy Swaggart, ti ebanghelista a nangbabalaw ti seksual nga aramid ti karibalna a manangaskasaba iti TV a da Jim Bakker ken ni Marvin Gorman. Sigun kadagiti damdamag, ni Gorman, met, ti nanggun-od kadagiti ladladawan ni Swaggart a kaduana ti maysa a balangkantis. Iti panangusigna iti narugit a gulo, ti kolumnista iti New York Post a ni Carl T. Rowan napaliiwna:
“Ti kadadaksan a banag a naaramidan ni Swaggart, a pampanunotek, ket saan a ti panangikuyogna ti balangkantis iti motel. Isu ti managinsisingpet a panangikagumaanna a mangdadael ken ni Rev. Jim Bakker kalpasan a naammuan a ti pangulo iti PTL Ministry ket addaan iti narugit a relasion iti sekretaria ti simbaan a ni Jessica Hahn.
“Ti managinsisingpet a panangatake ni Swaggart ken ni Bakker a mangiyeg iti sakopna kadagiti doliar nga ipaay dagiti maal-allilaw iti masaksakopan ni Bakker.
“Daytat’ maiyasping unay iti maysa a pangulo iti panaglako iti droga a nalawag a panangikagumaan a mangpukaw iti sabali ket sumublat iti lugarna.
“Saan nga adayu ti panangidilig,” kuna ni Rowan. “Dagiti Swaggarts, Bakkers, Gormans ken dagiti dadduma pay mangipaayda iti narkotiko a maawagan relihion, ket iti panangaramid iti dayta mangipaayda iti pudno a relihion iti dakes a nagan.”