Ti Kaiyulogan dagiti Damdamag
Panagebanghelio iti TV—Pamay-an ti Dios?
No adda koma ni Jesus ditoy daga ita, kuna ti ebanghelista a ni Jim Bakker, “isu komat’ adda iti TV.” Apay nga iti telebision? Agsipud ta, sigun ken Bakker, “dayta laeng ti kakaisuna a pamay-an a pannakadanonna kadagiti inay-ayatna a tattao.” Kas ken ni Bakker, ti umad-adu a bilang dagiti manangaskasaba a pundamentalista idiay Estados Unidos ti makarikna a ti telebision ti kasayaatan a pamay-an ti panangisaknap iti Sao ti Dios. Ngem, maysa a panagadal idi 1984 impakitana a, kaaduanna, dagiti ebanghelista iti TV “pabpabilgenda laeng dagiti tattao a napasneken iti ebanghelikal a relihion.”
Makapainteres, iti maysa a surat iti editor iti magasin a Ministry, maysa a managbasa nagsurat: “Kunayo a dagiti [telebision] isu dagiti kabibilgan nga alikamen ti iglesia a mangimula kadagiti bukel ti ebanghelio, ngem kunaen ti Dios a ti kapapatgan a trabaho isu ti panagsarungkar iti balaybalay—mangsapul kadagiti kararua. . . . Pagay-ayat ti Manangisalakantayo ti umadayo kadagiti umariwekwek, ket Isu napan nagbalaybalay—mangsapul kadagiti kararua. Ti maymaysa a kararua nga agdengngeg pagragsakanna. . . . Ditay kadi mabalin nga aramiden ti kasta?”
Sigun ken Jesu-Kristo, ti panggep iti Nakristianuan a ministerio saan laeng a ti ‘panangisaknap iti Sao’ no di ket “mangaramid kadagiti ad-adalan.” (Mateo 28:19, 20) Inturongna dagiti paspasurotna a mapan kadagiti pagtaengan dagiti tattao. (Mateo 10:7, 11-13) Inawat ni apostol Pablo daytoy a wagas ti panangasaba ket kinunana maipapan iti ministeriona: “Ta awan aniaman a makapalaing a binaybay-ak nga impakaammo kadakayo ket insurok kadakayo iti sanguanan dagiti tao ken kadagiti balaybalay.” Ti personal a panagbalaybalay a ministerio dagiti ad-adalan nagani kadagiti naimbag a gunggona.—Aramid 5:42; 20:20.
No impaganetget ni Jesus daytoy a pamay-an iti panangasaba tapno mangaramid kadagiti ad-adalan, apay nga adu nga ebanghelista kaykayatda ti TV kas ti pamay-anda? Ti The Courier-Mail iti Brisbane, Australia, napaliiwna a dagiti ebanghelista iti TV “makasapulda ti agingga iti $120 milion iti tinawen a mangilaklako iti pannakaisalakan. Agparangda iti sidong ti naranga a bileg ti elektrisidad ken dayag iti 300 nga estasion iti TV. Ket madaydayawda a kas kadagiti idolo ti pop. . . . Kadagiti amin a taktikada, dagitoy a lallaki kunaenda a maiturongda uray pay ti Dios, ket agpatinggadanto iti nasayaat a pannakitulag. Mangipatulodkayo kadakuada iti $10 ket ipandakayo sadi langit.”
Awanan Pammati a Panangipangulo
Kinuna ni Jesus: “Siak ti panagungar ken ti biag.” (Juan 11:25) Ngem, “adu kadagiti teologo a Katoliko a nangpunno kadagiti unibersidad ken seminario ti di makaipapati kadagiti bagbagida, wenno literal a mamati, iti panagungar,” kuna ti pagiwarnak a magasin nga Insight.
Kasano a dagiti Romano Katoliko a sipapasnek nga agtarigagay a sumurot kadagiti sursuro ti Biblia mapabilegda ti pammatida babaen kadagita a mannursuro? Saanda a makapabileg, ta nagsurat ni apostol Pablo: “No ngarud no awan ti panagungar dagiti natay, saan met a napagungar ni Kristo. Ket no ni Kristo saan a napagungar, ngarud ti kaskasabami awan kapapay-anna ket ti pammatiyo awan met kapapay-anna.”—1 Corinto 15:13, 14.
Awan ti Talna
Idi Oktubre 24, 1985, ti United Nations General Assembly inwaragawagna ti 1986 kas ti Internasional a Tawen ti Talna. Ti resolusion kinunana a ti tawen ti “maipamaysa iti panangikagumaan ti Naciones Unidas ken dagiti Miembrona nga Estado iti panangparang-ay ken panangibanag iti pangpanggep iti talna iti amin a pamay-an a mabalin.” Kasano ti inanamaenda a panangibanag iti daytoy? Babaen ti “agtultuloy ken positibo a panagtignay dagiti Estado ken dagiti tattao nga agpanggep a manglapped iti gubat.”
Itan ta dandanin ti panagngudo ti tawen ti “Talna,” ania ti masarakantayo? Ti kasta a natan-ok a panggep ti kasta unay a linab-awan dagiti namilitaran a panagdadangadang a nagtultuloy a napaglalabanan iti sangalubongan. “Ti iyaalsa dagiti gerilia, panagsusuppiat iti teritoria, panagduduma ti kapanunotan ken rasa ken dagiti ‘nasantuan’ a gubgubat ti mainayon pay kadagiti 19 a kangrunaan a panagdadangadang, ken kadagiti adu a babbabassit pay,” kuna ti The West Australian. Intudo ti artikulo ti pagiwarnak a ngangngani maysa a milion a soldado ti makidangdangadang iti sangalubongan. Nalawag, a para kadagiti minilion a biktima ti kasta a panaggugubat, awan ti talna.
Mainanama kadi dagiti natauan a papangulo iti pudpudno a solusion babaen ti masanguanan a panangiwaragawag iti talna? Saan, ta ti Jeremias 10:23 kunaenna: “O Jehova, ammok a ti dalan ti tao saan nga agtaud kenkuana met laeng. Saan nga agtaud iti tao a magna ti panangiturong kadagiti addangna.” (Idiligyo iti Jeremias 6:14.) Pudno, ti pudno a talna dumteng laeng manipud iti Dios.