Manipud Managbasatayo

Medikal a Tulong

Pagyamanan iti artikulo a “Dakayo a Managbilag Agannadkayo!” (Setiembre 22, 1987). Iti sumagmamano a tiempo naaddaanak iti bassit a limmitem iti sakak ngem diak inkankano dayta. Kalpasan ti pannakabasak iti artikulo, nagkonsultaak iti dermatologo, ket nagbanag a dayta ket maysa a nakaro a melanoma a maikatlo a degree. Dayta innalana ti 29 a dait a mangserra iti sugat kalpasan a naikkat ti kanser, ket agpapaimbagak pay laeng. Agyamanak unay kadakayo maipapan iti impormasion.

D. S., Brazil

Masapul nga ikkanmi ti dua nga indieksion iti maysa nga aldaw ni nanangko, isu a matmatayen iti kanser. Dagitoy nasakitda unay para kenkuana, ket dayta, agingga a nabasami iti Agriingkayo! (Hunio 22, 1987) a ti panangikabil iti hielo iti lugar a nasakit ti mangpipikel iti dayta ket saanna unay a pagut-oten dayta. No malipatanmi, dawatenna dayta. Isut’ nalaka a maugotan, ket ti “naapgad a danum a mangispal ti biag” (Pebrero 22, 1985) ti nangtulong kenkuana a nangpasayaat ti riknana ket naibturanna agingga a naipanmi iti ospital. Dayta laeng ti inumenna.

D. A., Estados Unidos

Di Umiso a Kababalin dagiti Klerigo

Siak ken dagiti gagayyemko ti nasaktan a naimbag babaen iti Hunio 22, 1987, nga artikulo a “Homoseksualidad ken ti Klero.” Ania ti punto iti panangibaga kadagiti dadduma a dadduma a klerigo, nangnangruna dagiti Katoliko, ket homoseksual? Siguradoak a ti klero dagiti Saksi ni Jehova ket saanda met a mailaksid iti impluensia ti seksual a basol iti sosiedadtayo.

Aminek a tunggal padi ket saan a santo. Ngem pagarupek a ti Iglesia sipsiputanna ti kinamatalek agingga ti kinadalus ken ti kaipapanan ti seksualidad a mabalin a mangpasiddaaw kadagiti adu a taga ruar. Kas maysa a Katoliko, no dadduma itudok dagiti biddut dagiti dadduma a relihion. Ngem diak mangatake ti personal a kinatarnaw dagiti ministroda. Dayta ket panangidumduma.

Ti punto iti panangibaga kadagiti dadduma a dadduma a klerigo ket imoral ket isu met laeng ti punto nga inaramid ni Jesus iti panangibagana a dadduma a klero idi tiempona ti “maipadis kadagiti tanem a napapudaw nga iti ruar pudno a nalibnosda, ngem iti uneg napno kadagiti . . . isuamin a rugit. Kasta met kadakayo pudno nga iti ruar agparangkayo a kasla naimbag a nasingpet a tattao, ngem iti uneg addakayo a napno iti panaginsisingpet ken iti kinadakes.” (Mateo 23:27, 28, “Jerusalem Bible” a Katoliko) Umisokayo a dagiti panglakayen dagiti Saksi ni Jehova saanda a naan-anay a mailaksid manipud iti impluensia iti seksual a basol. Ngem ti sumagmamano nga agbasol ti dagus a maikkat manipud iti kasta a saadna. Iti kasumbangirna, dagiti di umiso a kababalin ti klerigo kadagiti adu nga ig-iglesia ti masansan nga agbanag laeng iti “pannakaiyakar” wenno “maag-agasan” malaksid no dayta ket eskandaloso unay. Daytoy ti nabiit pay nga inyilustrar ti artikulo iti “New York Times” a Hunio 12, 1988, maipapan iti sumagmamano a papadi a napabasol iti panangmolestia iti ubing, a maysa kadakuada ti “maag-agasan iti 10 a tawtawenen” bayat nga agserserbi pay laeng kadagiti paruko.​—ED.

Awan Ay-ayonanna a “Balo”

Apresiarek ti internasional a panangmatmat ken kasasaad ken ti historikal a nalikudan iti Agriingkayo! Ti linaonna ti nangawis kaniak. Ti kinamanagpanunot ti manggargari ti pannakaawat ket panamnamaannak. Impagarupko a ti organisasionyo ket aduan kadagiti di naayat a panangidumduma a gagangay unayen itatta. Maragsakanak a nangusig sakbay a simmukoak. Dagiti karkararagko ket maipaay iti pamiliak ken gagayyemko a saan pay a nangilukat iti daytoy a tawa a maipaay iti panangsirip iti dayta.

A. R., Estados Unidos