Dagiti “Recordings” a Mangiyeg Dayaw ken Jehova
“TI MAYSA nga aldaw a mabusbos idiay Bethel nga agpatokar iti musika ket napatpateg ngem ti sangaribo a mabusbos iti sadinoman.” “Ibilangko dayta a kas ti kangatuan a musikal a pribilehio nga adda pay laeng itatta.” “Mariknak a maysa a dayaw ti mangusar kadagiti paglaingan a sipaparabur nga impaay ni Jehova kaniak a mabalin a mangawis kadagiti dadduma iti kinapudno babaen iti musika.” Dagitoy ti sumagmamano kadagiti komento manipud kadagiti propesional a musiko, dagiti Saksi ni Jehova, a nangiboluntario iti tiempoda ken bannogda a mangpataud iti musika nga addaan iti naisangsangayan nga orkestra.
Apay a dagitoy a musiko iboluntarioda dagiti paglainganda nga awan baybayadna no mabalin met nga aramidenda ti kasta met laeng a kita ti trabaho a maipaay a pakagunggonaan? Bay-anyo ida a sumungbat a mismo. Ni Jim nagtoktokaren iti double bass bayat iti 22 a tawtawenen a kadua ti New York Philharmonic orchestra. Kinunana: “Mariknak a nagdakkelan a pribilehio ti umay iti sangalubongan a hedkuarter dagiti Saksi ni Jehova a mangirekord iti musika.” Ni Joe, maysa a biolinista ken guitarista, nakairekorden iti musika iti propesional a pamay-an. Kastoy ti mariknana: “Sungbat dagiti karkararagko ti panangusar ni Jehova kaniak babaen iti aniaman nga adda kaniak.” Ni Harold, maysa a pianista, ket naaddaanen kadagiti nakaad-adu a nagsasayaatan a pribilehio iti responsabilidad kas ministro dagiti Saksi ni Jehova. Kankanayon a pinagbalinna a maikadua iti ministeriona ti karerana iti musika. Kunana: “Ti panangirekod iti musika a maipaay kadagiti Saksi ni Jehova ket maysa kadagiti kararagsakan a pribilehio nga adda kaniak iti organisasion ni Jehova.”
Kadagitoy nga al-aldaw a ti negosio a panagirekord nakaro unayen ti pannakisalisalna, multi-milion nga industria, mabalin a kasla narigaten para kadagiti dadduma ti mamati a 60 a tattao ti agtitipon a mangirekord iti musika bayat iti uppat nga al-aldaw nga awan ti aw-awatenna nga aniaman a gunggona a kuarta ken iti bukodda pay a gastos! Nupay kasta, ti mangidadaulo iti daytoy a proyekto ti panagirekord isu ti Watchtower Society—maysa a di agganansia nga organisasion a mangipabpablaak iti daytoy a magasin. Ket tunggal maysa a nairaman iti orkestra—manipud ti konduktor agingga iti teknisian—ket ministro dagiti Saksi ni Jehova. Ti motiboda nga agtrabaho a sigagaget? Tapno mangiyeg ti dayaw iti Dios.
Manipud iti Panagiprenta Agingga iti Panagirekord
Kasano, nupay kasta, a ti Watchtower Society—a nalatak gapu iti panagiprentana—ket nairaman iti panagirekord? Idi 1966 inyurnos ti Sosiedad ti maysa a nakawesan a drama ti Biblia a maiparang iti tinawen a kumbension distritona. Daytoy a panangidrama kadagiti paspasamak iti Biblia idi ugma ket nagsayaatan ti pannakaabrasana ta dagiti umasping a panangiparang ket nagbalinen a kankanayon a paset dagitoy a kumbension.
Nanipud idin, dagiti immuna a drama ti Biblia ket imparangen dagiti tattao a mismo. Kamaudiananna, naikeddengen a dagiti immun-unan ti pannakairekordna a tapes ket mabalin a patauden tapno manginayon iti musika ken dagiti timtimek iti panangiparang. Gapuna, dagiti aktor iti entablado ti basta iyaktoda laengen dagiti timtimek a nairekorden kadagiti tape. Ti Sosiedad addaan kadagiti kamkameng ti hedkuarter idiay Brooklyn a mangipaay kadagiti aktor ken teknisian, ket maysa nga studio a mangirekord ti naipasdek. Ngem idi naaramiden kamaudiananna ti pangngeddeng a mangpataud iti orihinal a musika a maipaay kadagitoy a drama, maysa a baro a karit ti naiparangarang.
Panangtipon iti Maysa nga Orkestra
Nangrugin ti panangsapul kadagiti kompositor ken dagiti musiko kadagiti Saksi ni Jehova idiay Norte America a situtulok a mangidonar kadagiti tiempoda ken laingda a mangpataud iti Nakristianuan a musika. Bayat dagiti adun a tawtawen, ti orkestra ti Watchtower Society dimmakkelen agingga iti ngangnganin maysa a simponia—60 agingga iti 70 a boluntario. Adu kadakuada ti propesional a musiko. Nupay kasta, ibagadanto kadakayo no ania ti kangrunaan a propesionda. Ni David nagtoktokaren iti cello a kadua ti Denver symphony orchestra iti sumagmamanon a tawen. Ti panangmatmatna iti industria ti musika ket naapektaran babaen iti kinapudno ti Sao ti Dios. Inyebkasna iti kastoy: “Impababakon ti personal nga ambisionko ken tarigagayko a maipaay iti irarang-ay iti lubong ti musika. Maragsakanak a mangsuportar iti pamiliak kas maysa a musiko ken kasta met maaddaan iti tiempo a makiraman iti amin-tiempo a ministerio.”
Ti panangmatmat ni John iti industria ti musika ket, kas kunaenna, “nagbalbaliwen iti kasta unay. Nupay no agtartrabahoak pay laeng idiay Broadway kas managtokar iti bajo idi nabautisaranak kas maysa a Saksi ni Jehova, nangrugi a nakitak a narigat ti panangtimbengko iti panagayatko ken ni Jehova ken ti panagayatko iti musika. Nasarakak a ti industria ti musika ti agbalin nga apok. Diak maipaay ti amin a kararuak ken ni Jehova iti trabaho a panangasaba no ammok nga agtokarak iti musika iti rabii. Addada adu a gundaway a pangikompromisuan iti pammatik. Gapuna simrekak iti amin-tiempo a ministerio.”
Ngangngani 50 kadagiti nakipaset iti proyekto ti Sosiedad a panangirekord iti musika, agraman dagiti managkopia iti musika ken dagiti teknisian, ti agserserbi kadagiti lokal a kongregasion dagiti Saksi ni Jehova kas papanglakayen ken ministerial nga ad-adipen. Agarup 35 ti nakabael a nangipaay ti amin a tiempoda iti ministerio, agraman ti panagserbi idiay Brooklyn Bethel ken Watchtower Farms.
Idi 1980 pinalawa ti Sosiedad ti trabaho daytoy naisangsangayan nga orkestra. Ti pannakaurnos dagiti kankanta nga us-usaren dagiti Saksi ni Jehova kas naragsak a paset iti panagdayawda ti magun-odanen babaen kadagiti cassette tapes. Dagiti delegado kadagiti 1980 a kumbension distrito ket naragsakanda iti pannakairuar ti Kingdom Melodies No. 1—ti immuna kadagiti serie iti tapes ti musika a pinataud ti orkestra ti Watchtower a maipaay a pakaidayawan ni Jehova.
Ni Tom, maysa a propesional a musiko iti adun a tawtawen, ket nairaman iti proyekto ti Sosiedad a panagirekord iti musika iti napalabasen a 15 a tawtawen. Kinunana: “Pudno a ti panangikagumaanmi ket saan a kas ti maaramidan ti propesional a simponia nga orkestra. Ngem ti mabalin a pagkuranganmi iti kapadasan ket pudno a manayonan iti kinaregta ken kinabara.” Ni Sallie addaan iti adu a tawen a kapadasan a kas propesional a biolinista. Isu apresiarenna “ti espiritu ti panagtitinnulong nga adda ditoy nga awan ti makaparis iti lubong.” Ni Bill, maysa a retirado a percusionista, ti nanggupgop iti dayta, a kunkunana: “Ti orkestra ket kaskasdi a saan pay a kas iti kualidad iti New York Philharmonic, ngem pagarupek a nasaysayaat ti panagtokarmi. Pagay-ayatko dayta! Sipapasnek nga in-inanamaek ti tunggal sesion ti panagirekord.”
Dagiti Drama ken Panagbasa ti Biblia
Dagiti timtimek a maipaay kadagiti drama ti Biblia ket nairekord kadagiti studio ti Sosiedad. Dagiti miembro iti kamkameng ti hedkuarter ti agserbi kas aktor ken artista. Dagiti eksena ti drama ket nairekord a nagsina ket kalpasanna maisagsagana a sangsangkamaysa. Kamaudiananna, mainayon dagiti timtimek ken ti musika.
Nanipud idi 1978 dagiti pasilidades ti Sosiedad a pagirekord ket nausaren iti sabali pay a pakausaran—ti panagirekord iti Nasantuan a Kasuratan. Bayat dagiti adun a tawtawen, nanipud iti immuna a pannakairuar ti cassette a The Good News According to John, ti intero a Biblia ket nairekorden. Itan siasinoman a dumngeg mabalinen a magunggonaan manipud iti Sao ti Dios.
Kasano a maaramid dagita a recordings? Kitaentayo ti maysa a sesion iti panagirekord. Maysa nga ordinado a ministro dagiti Saksi ni Jehova ti agbasbasa manipud iti New World Translation of the Holy Scriptures. Tapno matulongan a mangikabil iti kaipapanan iti basbasaenna ken tapno naannad a makitana ti kualidad ti recording, addada tallo pay nga agtugaw iti likudan ti soundproof a tawa iti uneg ti control room—ti enheniero, isu a mangpaandar iti recording console tapno masiguradona nga agan-andar a siuumiso ti alikamen; ti sumursurot, isu a naannad a mangsipsiput iti panagbasa tapno umiso ti linaonna; ken ti direktor, isu a mangipaay iti makatulong a panangiwanwan maipapan iti panangbalikas ken ti kalidad ti timek ti agbasbasa.
Bayat dagitoy a tallo ket okupadoda iti panagirekord, maysa nga editor ti mangikkat iti timek ti panangukag kadagiti panid ken dagiti dadduma pay a di matarigagayan a timtimek manipud iti dati a recording babaen ti pisikal a panangputedna iti nairekord a tape babaen iti labahas. Maysa a proofreader ti siaannad a mangimdeng kamaudiananna iti maudi a bersion tapno masigurado nga awan ti nalabsan.
Ti panangpataud iti musika, drama, dagiti tapes iti Watchtower, ken ti panagbasa ti Biblia ket dakkel a trabaho, ngem dagiti sursurat nga aggapu iti isuamin a lubong a mangiyeb-ebkas iti panangapresiar kadagitoy a tapes ti mangipamatmat a napateg ti bannog iti dayta. Nagunggonaankayon aya kadagitoy a naisangsangayan a recordings? Dagiti manangipablaak itoy a magasin ad-adda a maragsakanda a tumulong kadakayo a manggun-od kadakuada. Ta kalpasanna, saanda laeng a mangipaay iti pannakaisuro ken pagragsakan. Dagitoy mangiyegda iti dayaw ken Jehova a mismo.
[Dagiti ladawan iti panid 25]
Dagiti propesional a musiko a Saksi makiramanda iti amin a paset ti orkestra
[Dagiti ladawan iti panid 26]
Dagiti nadumaduma a paset iti orkestra agtitiponda a mangaramid iti musika a mairekord idiay studio ti Watchtower