Kasano nga Agbalin a Nakalatlatak ti Maysa a Kanta?
AGKARABALIW ken nakapigpigsa a kompetision ti industria ti musika. Nalaka a mauma dagiti tao iti dengdenggenda, malaus dagiti dati a nalatak ket dagiti baro nga uso ken teknolohia ti mangsukat kadagiti daan. Sigun ken Kelli S. Burns nga eksperto iti social-media, dagiti promoter “ket kanayon nga agsapsapul iti kabaruan a musika.” Ngem saan a kaskarina a mapagbalin dayta a nakalatlatak. “Arapaap ti nagadu nga ubbing ti agbalin a nalatak a kumakanta, . . . ngem masansan nga aglasatda pay iti adu a rigat sakbay a makapirmada iti kontrata,” kuna ti maysa a libro iti industria.—Kitaem ti kahon a “Dagiti Panagbalbaliw iti Industria ti Musika,” iti panid 6.
Panagputar iti Liriko
Panggep dagiti mannurat iti kanta (1) ti agputar kadagiti liriko a mangabbukay iti emosion ti tattao—a mangyanninaw kadagiti kalat, arapaap, ken kaunggan a riknada. Ania ti kalatakan a tema? No ayat ti sungbatmo, hustoka. Ikagkagumaan met dagiti mannurat iti kanta ti agputar iti makaallukoy a melodia ken sasao a dagus a magustuan ken nalaka a tandaanan dagiti dumngeg.
Kalpasanna, ti mannurat iti kanta kadawyanna a mangaramid iti sampol a recording wenno demo ti kanta. No pagarupen dagiti manedyer iti kompania nga adunto ti gumatang iti dayta, ti kumakanta ket mabalin a pagpirmaenda iti recording contract (2). Ngem no pagduaduaanda (nalabit gapu ta saan unay a nalatak), mabalin a gatangenda ti kanta tapno irekord ti nalatlatak a kumakanta.
Iti Studio
Para iti panagrekord (3), dagiti recording company kaaduanna a mangtangdanda iti nalaing a producer. Isu ti mangikeddeng no mabalinen ti kanta ken estilo dayta. Isu met ti mangontrata ken mangimanehar kadagiti music arranger, copyist, backup vocalist, recording engineer, musikero, kasapulan nga alikamen, ken iti recording studio tapno makapataud iti napintas ken naganar a produkto.
Kaaduanna nga agsasaganad a mairekord ti kada paset ti recording. Masansan nga umuna dagiti tambor, gitara, baho, ken organ. Sumaruno dagiti kangrunaan a boses, segundario a boses, ken solo nga instrumento. Kalpasanna, mainayon ti aniaman a naisangsangayan a sound effect sa maurnos dagita tapno makapataud iti master digital recording (4).
Panangilako
Tapno lumatak dagiti produktoda, masansan nga agaramid dagiti recording company kadagiti music video (5). Mabalin a makapagagar dagitoy a 3-5 a minuto a video ta dagiti kumakanta ket aktual a mabuya ken mangngeg iti media. Dakkel met a panguartaan dagita.
Kanayon nga ad-adu nga album ti malako dagiti recording artist kadagiti pakaaramidan ti aktual a konsierto (6). Isu a masansan nga i-promote-da ti baro nga albumda babaen ti iyaapanda ken panagkonsiertoda iti nadumaduma a lugar. Kaaduan nga artist ket mangaramid iti bukodda a Web site (7) a kompleto kadagiti sampol ti kantada, retrato, video, personal blog, damag maipapan iti asidegen a konsiertoda, dagiti link kadagiti fan club, ken kangrunaanna, kadagiti paglakuan iti musika.
Siasino ti mangikeddeng no agbalin a nakalatlatak ti maysa a kanta? Awan sabali no di sika nga agdengdengngeg. Ania ngarud ti pagibatayam no agpilika iti musikam? Ti la kadi unina wenno ti kumakanta, wenno ikabilangam met dagiti prinsipiom? Napateg dagita a saludsod ta nagdakkel ti epekto kadatayo ti musika. Ipalagip dayta ti balakad ti Namarsua kadatayo: “Ad-adda ngem iti isuamin a sabali pay a maaluadan, saluadam ta pusom, ta aggubuay iti dayta dagiti ubbog ti biag.”—Proverbio 4:23.
Kasanom a matungpal dayta a nainsiriban a balakad no maipapan iti musika? No maysaka nga ama wenno ina, kasanom a matungpal ti responsabilidadmo a mangsalaknib iti annakmo kadagiti mamagpeggad iti isip, puso, ken relasionda iti Dios?
[Kahon iti panid 6]
Dagiti Panagbalbaliw iti Industria ti Musika
Dakkel ti namalbaliwan ti industria ti musika gapu iti Internet ken nababa ti presiona a recording hardware ken software. Makairekord itan dagiti musikero kadagiti de kalidad a musika iti mismo a balayda ken mailakoda dagita iti intero a lubong. Sigun iti magasin a The Economist, ti “sumagmamano a nalatak nga artist ket nakairekord ken nakailako iti musika a didan pulos dimmalan iti recording company.”