Manipud Managbasatayo

Salaknib nga Ozone Pagyamanan iti napnot’ impormasion nga artikuloyo. (Enero 22, 1989) Naammuak daytoy a parikut babaen kadagiti immuna nga isyu ti magasinyo ket naikeddengko a no mabalin, liklikakto ti panangusar kadagiti bambanag a mangpakaro iti daytoy a parikut, kas iti aerosols ken dagiti artikulo a naaramid iti plastik a foam.

G. C., Republika iti Sud Africa

Dagiti Kristiano itatta masapul a raemenda koma ti komon nga aglawlaw ti sangatauan. Nupay kasta, saan a kanayon a praktikal wenno posible a liklikan nga interamente ti panangusar kadagiti makarugit a bambanag. Ti laeng napaut a solusion iti parikut iti polusion isu ti panangimaton ti Pagarian ti Dios iti daga. (Apocalipsis 11:18)​—ED.

Dagiti Recordings iti Pagarian Pagarupek a masapul nga itudok ti maysa a biddut iti artikuloyo. (Enero 8, 1989) Maysa kadagiti musiko a naadaw sadiay kinunana a dagiti panangikagumaanda adut’ pakaatiwanna iti musika a tokaren ti maysa nga orkestra ti simponia. Diak umanamong. Mabalin a saan a propesional, ngem kasla pumada iti dayta​—pudno a maysa nga arte.

R. L., Estados Unidos

Krismas Imbangon ti Agriingkayo! ti saludsod no ti Krismas ket Nakristianuan. (Disiembre 8, 1988) Dadduma, nga agkunkuna laeng a Kristiano, selebraranda dayta babaen ti nalabes a panagin-inum ken panagragragsak, ket umanamongak nga iti kastoy a pamay-an ti Krismas ket pagano. Ngem para kadagiti adu, maselebraran ti Krismas babaen iti panaglalangen dagiti aggagayem a kas agkakabsat iti simbaan. Dakes aya daytoy?

E. L. L., Brazil

Awan duadua nga adut’ mangikagumaan a mangselebrar ti maipagarup a pannakaipasngay ni Jesus iti nadayaw a pamay-an. Nupay kasta, ti artikulo nangipaay iti nalawag a pammaneknek a (1) pulos a di inanamongan ni Jesus ti kasta a selebrasion, (2) mabalin a naipasngay ni Jesus iti Setiembre/Oktubre (saan a Disiembre), ken (3) adu nga ug-ugali a mainaig iti Krismas ket nalawag a nagtaud iti pagano. Gapuna a maipasango kadagidiay agtarigagay a mangay-ayo iti Dios iti panagdayawda ket, saan a no kasano a ti kasta a selebrasion ket maitultuloy, no di ket no ti Krismas aniaman ti pormana ket anamongan ti Dios.​—ED.

Kinaranggas Pangngaasiyo ta dikay paregtaen dagiti managbasayo a mangikabit kadagiti kandado a makasapul iti tulbek a manglukat iti uneg. Daytoy ket pagpeggadenna iti biag no adda uram no dagiti agnaed iti dayta dida magaw-at ti tulbek ken/wenno awanen ti tiempoda a mangusar iti dayta sakbay a malapunosda iti apuy wenno asuk.

R. M., Bureau of Building Inspection, San Francisco, California

Aminenmi dagiti komento ni R. M. maipapan iti Abril 22, 1989, a bilangmi, panid 9 agingga iti 10. Umanamongkami a ti peggad iti pannakasallama bayat ti uram ad-adut’ peggadna ngem ti naranggas a krimen. Awan duadua a daytoy ti makagapu no apay a dagiti kandado a makasapul iti tulbek tapno makaruar iti kuarto wenno patakder ket iparit dagiti kaaduan a kodigo ti panagbangon idiay Estados Unidos. Nagbiddutkami a nangipakita iti daytoy a kita ti kandado iti ladawanmi. Dagiti managbasa mabalakadanda a nataltalged no maaddaanda ti kandado a mabalin a malukatan manipud iti uneg a saanen a kasapulan ti tulbek.​—ED.

Mamalmalo nga Assawa Pagyamanan iti dayta a serie dagiti artikulo. (Nobiembre 22, 1988) Kas maysa a kameng iti pagkamangan dagiti mamalmalo a babbai, inramanko daytoy a magasin iti manangbalakad, isu a mangus-usaren kadagitoy nga artikulo iti pannakipagtrabahona a kadua dagiti biktima. Nangnangruna a magustuak ti paset a “Ti Linteg ti Dios ken ti Panangmatmat ti Kristiano.” Adu kadagiti biktima ti maseknan maipapan iti panangmatmat ti Dios iti kasasaadda. Nagpedidoak kadagiti umdas a kopia daytoy a magasin tapno iwaras kadagiti amin a pagkamangan dagiti marangranggasan iti daytoy nga estado.

M. W., Ohio, Estados Unidos