‘No Matayen dagiti Baybay’
“NO MATAYEN dagiti baybay—kayatna a sawen, no ti biag kadagiti baybay ket kellaat, nga agpatingga—daytanto ti kamaudianan ken ti kadadakkelan a didigra iti nariribuk nga estoria iti tao ken dagiti dadduma nga an-animal ken mulmula isu a kadua ti tao itoy a planeta.” Kasta ti insurat ni Jacques Cousteau iti introduksionna iti Tomo 1 iti librona a The Ocean World of Jacques Cousteau.
Intuloyna ti buya: “No awan ti biag kadagiti baybay ti carbon dioxide iti atmospera mabalin nga umadu unay. No daytoy a kaadu ti CO2 malabsanna ti naikeddeng a kaaduna mapasamaken ti ‘greenhouse effect’: ti pudot a rummuar manipud iti daga a mapan iti law-ang malapdan iti babaen ti stratosphere, isu a mangpabara iti temperatura ti baybay. Agpadpada iti North ken South Poles malunag dagiti abbungot a hielo. Nalabit umadalem dagiti baybay iti 30 metros iti bassit laeng a tawtawen. Malapunos dagiti amin a kangrunaan a siudad iti daga. Tapno maliklikan ti pannakalmes kakatlo iti populasion ti daga ti mabalin a mapilit nga agkamang kadagiti turturod ken bambantay, dagiti turturod ken bambantay a saan a naisagana nga umawat kadagitoy a tattao, a saan a makapataud ti taraon a maipaay kadakuada.”
Intuloy ngarud ni Cousteau ti panangisalaysayna iti nakalkaldaang a tungpalna: “Napuspusekda a sangsangkamaysa kadagiti nadumaduma a nangangato a dagdaga, mabisbisin, ket sagabaenda dagiti napipigsa a bagio ken saksakit, a nasinasina a naan-anay dagiti pamilia ken kagimongan, ti nabati iti sangatauan agsagaban manipud iti anoxia—kinakurang iti oksihena—a patauden ti pannakatay dagiti plankton algae ken ti panagkurang dagiti mulmula iti daga. Gaput’ naisaaden iti akikid a lugar iti nagbaetan dagiti natay a baybay ken dagiti di nabunga a kabambantayan ti tao iruarna ti maudi a kanito ti di masarita a rigatna. Mabalin a tallopulo agingga iti limapulo a tawen kalpasan ti ipapatay ti baybay ti maudi a tao ditoy daga matayto metten. Ti organiko a biag iti planeta makitanto laengen kadagiti bakteria ken dagiti sumagmamano nga insekto a managkaan iti basura.”
Gapu iti pannakaparsua ti tao, nupay kasta, daytoy a pakdaar ken dagiti umasping a pakdaar a maipakpakaammo itatta saandanto a maipangag bayat a dagiti agmauyong iti kuarta a tattao itultuloyda ti panagturongda iti didigra. Kas imbaga ni Jehova iti nabayagen: “Saan nga agtaud iti tao a magna ti panangiturong kadagiti addangna,” ket kasapulan a bumallaet ni Jehova a mismo ket pasardengenna “dagidiay mangdaddadael iti daga.”—Jeremias 10:23; Apocalipsis 11:18.