Aniat’ Mapaspasamaken iti Lubong ti Panagay-ayam?

Babaen ti koresponsal ti Agriingkayo! idiay Italia

DAGITI kadi report iti kasungani a panid deskribirenna ti kaudian a coup d’état iti maysa a pagilian ti Latin America wenno ti sabali a panangatake ti terorista iti maysa a daga iti Europa. Saan, dagitoy ken dagiti umasping a report ket, kas kuna ti maysa nga inaldaw a pagiwarnak nga Italiano, ket maysa “laeng a gagangay nga aldaw iti panagay-ayam.”

Ti panagay-ayam ken ti kinaranggas ket kasla agkuykuyogda kadagitoy nga al-aldaw. Kas pangarigan, adut’ makalagip pay laeng iti rabii ti Mayo 29, 1985, idi 39 a tattao ti natay ket 200 dagiti nasugatan kadagiti panagrurupak dagiti agrayo kadagiti managay-ayam sakbay ti final iti kinakampeon iti soccer iti European Champions’ Cup.

Nupay kasta, dagiti mapasamak a kinaranggas a patauden dagiti managay-ayam ken dagiti managbuya saan laeng a maipaay iti maymaysa a panagay-ayam, kas iti soccer, no di ket mapasamakda kadagiti amin a kita iti ay-ayam​—baseball, boksing, hockey.

Ti pagsasao a, “Sapay koma ta mangabak ti kalaingan” ken, “Napatpateg ti makipaset ngem ti mangabak,” nalausdan iti lubong ti panagay-ayam. Apay a dagiti managay-ayam ken managbuya ipakatda dagiti dakes a kababalinda, di magawidan ti kinaagresiboda, kadagiti ay-ayam a pagsasalisalan? Ania ti adda iti likudan ti kinaranggas iti panagay-ayam? Ken kasano ti kinakaro ti parikut?